ဖေဖော်ဝါရီ ၂၂ နေ့ကတည်းက ပြန်ပေးဆွဲခံထားရသည့် ကချင်ပြည်နယ်၊ လိုင်ဇာမြို့အနီးရှိ ဂျေယန်းဒုက္ခသည်စခန်းမှအသက် ၁၀ နှစ်အရွယ်မိန်းကလေးငယ်သုံးဦးကို ပြန်ပေးသမားက သတ်ဖြတ်လိုက်ပြီဟု ကချင်လွတ်လပ်ရေးတပ်မတော် (KIA) ၏ပြန်ကြားရေးအရာရှိကအတည်ပြုသည်။
ကလေးငယ်နှစ်ဦး၏ ရုပ်အလောင်းများကို ယမန်နေ့ ညနေပိုင်းတွင်လည်းကောင်း၊ အခြားတဦး၏ ရုပ်အလောင်းကို ယနေ့နံနက်ပိုင်းတွင်လည်းကောင်း ရှာဖွေတွေ့ရှိခဲ့ပြီးနောက် ဓားစာခံသုံးဦးစလုံး သတ်ဖြတ်ခံခဲ့ရကြောင်း KIA ဘက်ကအတည်ပြုခဲ့ခြင်းဖြစ်သည်။
အမှုအတွက် အဆိုပါဒုက္ခသည်စခန်းတွင်နေထိုင်သည့် အမျိုးသားတဦးကို သံသယမှုဖြင့်ဖမ်းဆီးထားကြောင်း၊ နောက်ထပ် ပူးပေါင်းပါဝင်သူများ ရှိ၊မရှိကိုလည်း ဆက်လက်စစ်ဆေးနေသည်ဟု KIAပြောခွင့်ရအရာရှိ ဗိုလ်မှူးကြီး နော်ဘူက ပြောသည်။
“စစ်ရှောင်စခန်းကြားမှာ သွားလာနေရင် ပြန်ပေးဆွဲသွားတယ်လို့ စစ်ဆေးရေးအဖွဲ့တွေက ပြောကြတယ်။ လောလောဆယ်တော့ တယောက်ပဲ ဖမ်းမိတယ်။ နောက်ထပ်(ကျူးလွန်သူ)ရှိမလားတော့ မပြောတတ်ဘူး” ဟု ၎င်းကပြောသည်။
လူသတ်မှု၊ပြန်ပေးဆွဲမှုသံသယများဖြင့် ဖမ်းဆီးခံထားရသူသည် အသက် ၂၅နှစ်အရွယ် အုန်းဆောင်းဒွဲအောင် (Ung Sau Doi Awng) ဆိုသူဖြစ်ကြောင်း ကချင်ပြည်နယ်အခြေစိုက် 7Stars News သတင်းဌာနက ရေးသားထားသည်။
ဖမ်းဆီးခံထားရသူ၏ဇနီးသည် သေဆုံးသွားသည့်ကလေးငယ်များ၏ဆရာမဖြစ်ကြောင်း၊ အဆိုပါအမျိုးသားသည် ကလေးငယ်များကို ဖမ်းဆီးသွားပြီးနောက် မိဘများထံသို့တရုတ်ငွေယွမ် ၃ သိန်းဖြင့် ပြန်ရွေးရန် ဆက်သွယ်ပြောဆိုခဲ့သည်ဟု 7Stars Newsက ဖော်ပြထားသည်။
ဓားစာခံများကို ငွေကြေးနှင့်လဲလှယ်ရန် ပြန်ပေးသမားက တောင်းဆိုသည့်အချက်ကို KIA ပြောခွင့်ရအရာရှိကလည်း အတည်ပြုသည်။
ဖမ်းဆီးရမိသည့် ပြန်ပေးဆွဲသမားမှာ ဂျေယန်းစစ်ရှောင်စခန်းတွင် နေထိုင်သူတစ်ဦးဖြစ်ကြောင်း၊ မိန်းကလေးငယ်သုံးဦးကို ဖမ်းဆီးပြီးနောက် တရုတ်ငွေ ယွမ်၃သိန်း (ကျပ်သိန်း ၁၂၀၀ခန့်) တောင်းယူသည်ဟု ဗိုလ်မှူးကြီးနော်ဘူက ပြောပြသည်။
၂၀၁၁ ခုနှစ်က စစ်တပ်နှင့် KIA တို့အကြား တကျော့ပြန် ဖြစ်ပွားသည့် တိုက်ပွဲများကြောင့် သိန်းနှင့်ချီသည့် ကချင်တိုင်းရင်းသားများမှာ နေရပ်စွန့်ခွာထွက်ပြေးခဲ့ကြရပြီး စစ်ဘေးရှောင်စခန်းများတွင် ယနေ့အထိ ခိုလှုံနေရဆဲဖြစ်သည်။
အဆိုပါစစ်ရှောင်စခန်းများအနက် တစ်ခုအပါဝင်ဖြစ်သည့် ဂျေယန်းစစ်ရှောင်စခန်းမှာလည်း စစ်ဘေးရှောင် ၈၀၀၀၀ ထက်မနည်း ခိုလှုံနေသည့် စစ်ရှောင်စခန်းတစ်ခုဖြစ်သည်။
