ဒီဇင်ဘာလအတွင်းစစ်ထောက်လှမ်းရေးအရာရှိတစ်ဦး ရန်ကုန်မြို့တွင် ပစ်ခတ်ခံရမှုနှင့် ဆက်စပ်ပြီး ၇ ဦးကို ဖမ်းဆီးထားသည်မှာ ရက်သတ္တ တစ်ပတ်ရှိပြီဖြစ်သည်ဟု စစ်ကောင်စီက ယမန်နေ့ (ဇန်နဝါရီ ၅) ရက်စွဲဖြင့် သတင်းထုတ်ထားသည်။
စစ်ဘက်ရေးရာ လုံခြုံရေးတပ်မှ ဗိုလ်မှူး ဇေယျာမင်းတို့မောင်နှမ ရန်ကုန်၊ မရမ်းကုန်းမြို့နယ် Apollo ဟိုတယ်အနီးတွင် ဒီဇင်ဘာ ၂၂ ရက်နေ့က ပစ်ခတ်ခံရပြီး ဒဏ်ရာရသွားသည်၊ ပစ်ခတ်မှုနှင့် ဆက်စပ်နေသူတချို့ကို ဒီဇင်ဘာ ၂၉ တွင် ဖမ်းဆီးလိုက်သည်ဟု ထုတ်ပြန်ချက်တွင်ဖော်ပြထားသည်။
ကိုနိုင်ဝင်းလတ်၊ ကိုခိုင်မင်းစိုး၊ ကိုမိုးထက်အောင်တို့ကို ဒီဇင်ဘာ ၂၉ တွင် ဖမ်းမိထားသည်၊
ထိုနေ့ နံနက်တွင် မိုးထက်အောင်၏ မိဘများဖြစ်သော ဦးသန်းအောင်၊ ဒေါ်ချိုမာလွင်တို့ကို ဖမ်းလိုက်ပြီး လွတ်မြောက်သွားသူစွမ်းထက်ဆိုသူ၏ မိခင်ဖြစ်သူ ဒေါ်ခင်ယုဆွေကိုလည်း နေ့လယ်ပိုင်းတွင် ဖမ်းလိုက်သည်ဟု ထုတ်ပြန်ချက်က ဆိုသည်။
ကိုထက်အောင်လှိုင် ဆိုသူကိုလည်း ဇန်နဝါရီလ ၂ ရက်နေ့တွင် ဖမ်းလိုက်သည်ဟု ဆိုသည်။ ဖမ်းထားသည့် ၇ ဦးအနက် ၆ ဦး၏ ဓာတ်ပုံများကို ထုတ်ပြန်ချက်တွင် ထည့်သွင်းထားသော်လည်း ကိုထက်အောင်လှိုင်၏ပုံ မပါဝင်ပေ။
ပစ်ခတ်မှုနှင့် ဆက်စပ်နေသည်ဟု ယူဆရသော ၁၂ ဦး လွတ်မြောက်နေသည်၊ Sig Sauer ပစ္စတို ၂ လက်၊ ခြောက်လုံးပြူး ၁ လက်၊ ကျည် တချို့ စသည့် လက်နက်များကို သိမ်းဆည်းရမိထားသည်ဟု ထုတ်ပြန်ချက်တွင် ဖော်ပြထားသည်။
ပစ်ခတ်မှုကြောင့် ဗိုလ်မှူးဇေယျာမင်း ညာဘက်လက်ဖျံ ဖောက်ဝင်ဒဏ်ရာရရှိခဲ့သလို ၎င်း၏ ညီမဖြစ်သူမှာလည်း ညာဘက်ခါး ထိမှန်ခဲ့သည်၊ ဒဏ်ရာများ မစိုးရိမ်ရဟု စစ်တပ်က ထုတ်ပြန်ထားသည်။
ဒဏ်ရာရသွားသည့် ဗိုလ်မှူးဇေယျာမင်း ဆိုသူ၏ ဓာတ်ပုံကို အွန်လိုင်းသုံးသူတချို့က မျှဝေထားကြရာ ပုံထဲတွင် အမျိုးသားတစ်ဦး ညာလက် ပတ်တီးစီးထားသည်ကို တွေ့ရသည်။
ပစ်ခတ်ခံရပြီးနောက် စစ်ကောင်စီတပ်သည် Apollo ဟိုတယ် အနီးမှ လူနေရပ်ကွက်များကို အင်အား ၄၀၀ ခန့်ဖြင့် စီးနင်းပြီး လူငယ် ၈၀ ခန့်ကို ဖမ်းဆီးလိုက်ကြောင်း၊ အဆိုပါဖြစ်စဉ်အတွင်း ပြောက်ကျားတပ်ဖွဲ့ဝင်တစ်ဦး ပါဝင်သွားဟန်ရှိပြီး ဆက်စပ်နေသူတချို့ ထပ်မံဖမ်းဆီးခံလိုက်ရခြင်းဖြစ်နိုင်ကြောင်း မြို့ပြပြောက်ကျားတပ်ဖွဲ့ဝင်များနှင့် နီးစပ်သူ အမျိုးသားတစ်ဦးက Myanmar Now ကို ပြောသည်။
အမှုနှင့် ဆက်စပ်မှုမရှိသူတို့ကို ပြန်လွှတ်မပေးဘဲ စစ်သင်တန်းသို့ ပို့ခဲ့သည်ဟု ယူဆရကြောင်း အဆိုပါသတင်းအရင်းအမြစ်က ပြောသည်။
“(ပစ်ခံရတဲ့စစ်တပ်အရာရှိ) ဇေယျာမင်းကို ရမယ်ရှာပြီးတော့ ပေါ်တာဆွဲတာပဲ (စစ်သားသစ်အဖြစ် စုဆောင်းတာပဲ)။ အဲဒီလူတွေအကုန်လုံး စစ်တပ်ထဲရောက်ကုန်တာ။ အဲဒီအချိန်မှာ ရဲဘော်တစ်ယောက်က ပါသွားတယ်လို့ ယူဆရတယ်”ဟု ၎င်းက ပြောသည်။
Yangon Phoenix နှင့် Together Urban Force တို့က ထိုတိုက်ခိုက်မှုသည် ၎င်းတို့လက်ချက်ဖြစ်ကြောင်း ကြေညာထားသည်။
