နိုင်ငံမြောက်ပိုင်း တော်လှန်ရေးအင်အားစုက စစ်ကောင်စီစခန်းများကို တိုက်ခိုက် သိမ်းပိုက်နေသော်လည်း နိုင်ငံတောင်ပိုင်းရှိ သက်တမ်းရင့် တော်လှန်ရေး အဖွဲ့ ကရင်အမျိုးသားအစည်းအရုံး (KNU) လှုပ်ရှားနယ်မြေတွင် အလားတူထိုးစစ် မရှိသဖြင့် ဝေဖန်ခံနေရသည်။ ကရင်ပြည်နယ်အတွင်း လက်နက်ကိုင်အဖွဲ့များမှာ ဘက်မတူ၊ အကျိုးစီးပွား မတူညီသဖြင့် လုံခြုံရေး၊ စစ်ရေးအခြေအနေမှာလည်း အခြားဒေသများနှင့် ကွဲပြားလိမ့်မည်ဟု ဒေသတွင်း နိုင်ငံရေး၊ စစ်ရေး လေ့လာသူ စောကပီက ပြောသည်။ ကရင်ပြည်နယ်အတွင်း စစ်ရေးအခြေအနေများ အပါအဝင် နိုင်ငံတောင်ပိုင်းအနှံ ပြန့်ကျဲနေသော ကရင့်လက်နက်ကိုင်တပ်ဖွဲ့များ ပေါင်းစည်းနိုင်မည့် အလားအလာများနှင့်ပတ်သက်ပြီး ထိုင်း မြန်မာနယ်စပ် အခြေစိုက် အုပ်ချုပ်ရေးနှင့် ပြည်သူ့ရေးရာ စီမံခန့်ခွဲရေး သင်တန်းကျောင်း တည်ထောင်သူ၊ နိုင်ငံရေးလေ့လာသုံးသပ်သူ စောကပီကို ဆက်သွယ်မေးမြန်းထားပါသည်။
