စစ်ကိုင်းတိုင်း၊ ပင်လည်ဘူးမြို့တွင် ပြီးခဲ့သည့် ဇူလိုင်လ ၆ ရက်က စစ်တပ်၏ လေကြောင်းထောက်ပို့ရဟတ်ယာဉ်ကို တော်လှန်ရေးအင်အားစုများက ဒရုန်းဖြင့် ဗုံးသီးချတိုက်ခိုက်ခဲ့ရာ လေယာဉ်အမြီးပိုင်း ပျက်စီးပြီး စစ်ကောင်စီတပ်ဖွဲ့ဝင်များ ထိခိုက်သေဆုံးမှုရှိခဲ့ကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက သတင်းထုတ်ပြန်လိုက်သည်။ MI 17 အမျိုးအစား ရဟတ်ယာဉ်ဖြင့် မြေပြင်တွင် ပစ္စည်းချခြင်း၊ ထိခိုက်ဒဏ်ရာရ စစ်ကောင်စီတပ်ဖွဲ့ဝင်များကို တင်ဆောင်နေစဉ် စစ်ကိုင်းတိုင်း ဒရုန်းလက်ရုံးတပ်ဖွဲ့က ဗုံးသီးချတိုက်ခိုက်ခဲ့ရာ အမြီးပိုင်းနှင့် လူတင်ဆောင်နေသည့် တံခါးပေါက်အနီးသို့ ကျရောက်ပေါက်ကွဲခဲ့သည်ဟု ဆိုသည်။ ထိုရဟတ်ယာဉ်မှ ပြုတ်ကျကျန်ရစ်သည့် အရေးပေါ်တံခါးပေါက်ကို သိမ်းဆည်းရမိထားသည်ဟု NUG က ထုတ်ပြန်သည်။ တိုက်ခိုက်မှုတွင် စစ်ကောင်စီတပ်ဖွဲ့ အရာရှိအပါအဝင် ၇ ဦးသေဆုံးပြီး ရဟတ်ယာဉ်မှူး အပါအဝင် ၁၇ ဦးထိခိုက်ဒဏ်ရာရရှိခဲ့သည်ဟု ဆိုသည်။ ကောလင်းမြို့နှင့် ကပ်လျက်ရှိ ပင်လည်ဘူးမြို့ကို တော်လှန်ရေးစပြီး တစ်နှစ်ခန့်အကြာ ၂၀၂၂ ခုနှစ် ဧပြီလတွင် တော်လှန်ရေးအင်အားစုများက မြို့ကို ဝင်ရောက်စီးနင်းတိုက်ခိုက်ခဲ့သည်။
