စစ်ကောင်စီရဲ့ အရှေ့မြောက်တိုင်းစစ်ဌာနချုပ်ရှိရာ လားရှိုးမြို့နဲ့ အနီးတစ်ဝိုက်က စစ်စခန်းတွေကို မြောက်ပိုင်းမဟာမိတ်ပူးပေါင်းတပ်တွေက ဇူလိုင်လ ၃ ရက်နေ့က စတင်တိုက်ခိုက်ခဲ့တာပါ။ အခုဆိုရင်တော့ တိုက်ပွဲတွေက မြို့ထဲအထိ ရောက်လာပါပြီ။ ကိုးကန့်တပ် MNDAA ဦးဆောင်တဲ့ မြောက်ပိုင်းမဟာမိတ်တပ်တွေဟာ လားရှိုးမြို့ကို အလုံးအရင်းနဲ့ ချဉ်းကပ်ဝင်ရောက်လာပြီး ဒီကနေ့ ဇူလိုင်လ ၂၄ရက် မနက်ပိုင်းအထိ တိုက်ပွဲတွေအပြင်းအထန်ဖြစ်နေပါတယ်။ ရှမ်းပြည်နယ်မြောက်ပိုင်းရဲ့ မြို့တော်လို့တောင် တင်စားကြတဲ့ လားရှိုးမြို့ရဲ့ဧရိယာ ထက်ဝက်နီးပါးမှာ တိုက်ပွဲတွေ ဖြစ်နေပြီး၊ လားရှိုးလေဆိပ်အနီးက အရှေ့မြောက်တိုင်းစစ်ဌာနချုပ်နားအထိ ကိုးကန့်တပ်တွေ ချဉ်းကပ်လာနေပြီလို့ မြို့ခံတွေက ပြောပါတယ်။ ကိုးကန့်တပ်တွေဟာ လားရှိုးမြို့ကို မကြာခင်မှာ အလုံးစုံသိမ်းပိုက်နိုင်လိမ့်မယ်လို့ စစ်ရေးအကဲခတ်တွေက သုံးသပ်နေကြပါတယ်။ သတင်း၊ တင်ဆက် – မြတ်ကြီး
