စစ်ရေးနဲ့ ထောက်လှမ်းရေး ကျွမ်းကျင်ပြီး စေ့စပ်၊ ဖျတ်လတ်သူလို့ နာမည်ကျော်တဲ့ ကချင်လွတ်လပ်ရေးတပ်မတော် KIA ရဲ့ ဒုတိယစစ်ဦးစီးချုပ် ဗိုလ်ချုပ်အောင်ဆိုင်းလာ ဟာ KIA ရဲ့ စစ်ဦးစီးချုပ် ဖြစ်လာပါတယ်။
အခုလ ၁၃ရက်နေ့က ကွယ်လွန်သွားတဲ့ KIA စစ်ဦးစီးချုပ် ဒုတိယဗိုလ်ချုပ်ကြီး R ခေါင်လွမ်းရဲ့ နေရာမှာ အစားထိုးဖို့ စစ်ဦးစီးချုပ်အသစ်ကို KIA က ရွေးချယ်ရာမှာ ဒုတိယစစ်ဦးစီးချုပ်ဖြစ်တဲ့ ဗိုလ်ချုပ်အောင်ဆိုင်းလာ က ဒုတိယဗိုလ်ချုပ်ကြီးရာထူးနဲ့ စစ်ဦးစီးချုပ်အဖြစ် မေလ ၁၈ရက်နေ့က ခန့်အပ်ခံခဲ့ရတာပါ။
အသက် ၆၀ကျော်အရွယ် ဒုတိယဗိုလ်ချုပ်ကြီးအောင်ဆိုင်းလာဟာ ကချင်ပြည်နယ် တနိုင်းဇာတိဖြစ်ပြီး၊ မန္တလေးတက္ကသိုလ်ကနေ ဘွဲ့ရခဲ့သူ ဖြစ်ပါတယ်။ KIA တပ်ထဲကိုတော့ ၁၉၈၅ခုနှစ်လောက်မှာ စတင်ဝင်ရောက်ခဲ့တယ်လို့ သိရပါတယ်။
စာရေးဆရာတစ်ယောက်ဖြစ်သလို၊ KIA ထဲ မဝင်ခင်က ကျောင်းဆရာတစ်ယောက်ဖြစ်ခဲ့တဲ့ ဒုတိယဗိုလ်ချုပ်ကြီးအောင်ဆိုင်းလာဟာ ရှေ့တန်းစစ်မြေပြင်မှာ တပ်ရင်းမှူးအပါအဝင် အဆင့်ဆင့်သော စစ်ရေးတာဝန်တွေ ထမ်းဆောင်ခဲ့ဖူးသလို၊ နောက်တန်း စစ်ဌာနချုပ်ရုံးမှာလည်း ထောက်လှမ်းရေးဌာနရဲ့ ညွှန်မှူးအဖြစ် လုပ်ကိုင်ခဲ့ဖူးတယ်လို့ KIA ရဲ့ ပြန်ကြားရေးအရာရှိ ဗိုလ်မှူးကြီးနော်ဘူ က ပြောပါတယ်။
ကချင်စစ်ရေးသတင်းရင်းမြစ်တစ်ဦးကလည်း ဒုတိယဗိုလ်ချုပ်ကြီးအောင်ဆိုင်းလာဟာ စစ်ရေးပရိယာယ်ကြွယ်ဝသူ၊ ပြတ်သားသူ၊ စည်းကမ်းကြီးသူအဖြစ် KIA တပ်ထဲမှာ နာမည်ကြီးပြီး၊ ရဲဘော်တွေရဲ့ ချစ်၊ ကြောက်၊ ရိုသေမှုကို ခံရသူ ဖြစ်တယ်လို့ ဆိုပါတယ်။
