ဟိုတယ်ဇုန်လုပ်ရန် ဦးရဲမင်းဦးနှင့် အာဏာရပါတီအပေါင်းအပါများ ကုမ္ပဏီထူ‌ထောင်ထား 

ရခိုင်ပြည်နယ်တောင်ပိုင်းတွင် ဟိုတယ်ဇုန်စီမံကိန်းအကောင်အထည်ဖော်ရန် ဦးရဲမင်းဦးနှင့်အတူ အာဏာရ အမျိုးသားဒီမိုကရေစီအဖွဲ့ချုပ်ပါတီ (NLD) မှ လွှတ်တော်ကိုယ်စားလှယ်များ၊ ၎င်းတို့၏ ဇနီးများနှင့် စီးပွားရေးလုပ်ငန်းရှင်များပူးပေါင်းကာ အများပိုင်ကုမ္ပဏီတစ်ခုကို တည်ထောင်ထားသည်။ 

ဦးရဲမင်းဦး ဥက္ကဋ္ဌအဖြစ် တာဝန်ယူခဲ့သည့် ရခိုင်ကမ်းရိုးတန်းဖွံ့ဖြိုးတိုးတက်ရေးအများပိုင်ကုမ္ပဏီကို ၂၀၁၈ ဧပြီလအတွင်း တည်ထောင်ခဲ့ခြင်းဖြစ်ပြီး ကုမ္ပဏီဒါရိုက်တာများတွင် NLD ပါတီ၏ ဂွမြို့နယ် ပြည်သူ့လွှတ်တော်ကိုယ်စားလှယ် ဦးရဲခေါင်ညွန့်၊ စမ်းချောင်းမြို့နယ် ပြည်သူ့လွှတ်တော်ကိုယ်စားလှယ် ဦးဘိုဘိုဦး၏ ဇနီး ဒေါ်ခင်မိုးအေးနှင့် ဇမ္ဗူသီရိမြို့နယ် ပြည်သူ့လွှတ်တော်ကိုယ်စားလှယ် ဦးဖြိုးဇေယျာသော်၏ ဇနီးဟောင်း ဒေါ်သင်းဂျူလိုင်ကျော်တို့  ပါဝင်နေသည်ကို တွေ့ရှိရသည်။ 

လက်ရှိ ရန်ကုန်တိုင်းစီမံဘဏ္ဍာဝန်ကြီးဖြစ်သူ ဦးရဲမင်းဦးသည် နေပြည်တော်စည်ပင်ဘဏ်ဥက္ကဋ္ဌနှင့် နေပြည်တော် ဒုတိယမြို့တော်ဝန် တာဝန်များရရှိပြီးနောက် ၂၀၁၉ ခုနှစ် စက်တင်ဘာလတွင် ရခိုင်ကမ်းရိုးတန်းဖွံ့ဖြိုးတိုးတက်ရေးအများပိုင်ကုမ္ပဏီ ဥက္ကဋ္ဌရာထူးကို ၎င်း၏ ဇနီးဖြစ်သူ ဒေါ်အေးနန္ဒာစိမ်းက ရယူထားသည်။ 

ဦးရဲမင်းဦးနှင့် ရင်းနှီးသော ဆက်ဆံရေးရှိသူ Innovative Systems ကုမ္ပဏီပိုင်ရှင် ဦးနီလင်းသည်လည်း ရခိုင်ကမ်းရိုးတန်းဖွံ့ဖြိုးတိုးတက်ရေးအများပိုင်ကုမ္ပဏီတွင် အုပ်ချုပ်မှုဒါရိုက်တာအဖြစ် တာဝန်ယူထားကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) မှတ်တမ်းများအရ သိရသည်။ 

ကုမ္ပဏီ၏ ဒါရိုက်တာအဖွဲ့ဝင်များအနက် ရန်ကုန်တိုင်းဒေသကြီး NLD သဘာပတိအဖွဲ့ဝင် ဦးလှကြိုင်၏ သမီးဖြစ်သူ ဒေါ်အမရာအောင်၊ Democratic Voice of Burma (DVB) လက်ထောက်အယ်ဒီတာဟောင်းဖြစ်ပြီး နိုင်ငံရေးအကျဉ်းသားဟောင်းတစ်ဦးလည်းဖြစ်သူ ဦးမြတ်ထွန်း၊ နိုင်ငံရေးအကျဉ်းသားဟောင်းတစ်ဦးဖြစ်ပြီး Jasmine Palace ဆောက်လုပ်ရေးလုပ်ငန်းစုကို လုပ်ကိုင်လျက်ရှိသည့် ဦးညီနိုင်အောင်တို့ပါဝင်သည်။ 

ကုမ္ပဏီ၏ ဒါရိုက်တာအဖွဲ့ဝင် အခြားသူတစ်ဦးမှာ ၂၀၂၀ ရွေးကောက်ပွဲတွင် ရခိုင်ပြည်နယ်တောင်ပိုင်း ဂွမြို့နယ်မဲဆန္ဒနယ်၌ ရွေးကောက်တင်မြှောက်ခံထားရသူ ဦးရဲခေါင်ညွန့်ဖြစ်ပြီး ၎င်းသည် ဂွမြို့နယ် NLD ပါတီ အလုပ်အမှုဆောင်တစ်ဦးလည်း ဖြစ်သည်။ 

ဂွမြို့နယ် ကမ်းသာယာကမ်းခြေအနီးရှိ ၃၆ ဧက ကျယ်ဝန်းသည့် ဇီးကုန်းကွင်းတွင် ဟိုတယ်ဇုန်စီမံကိန်းဖော်ဆောင်ရန် ရခိုင်ကမ်းရိုးတန်းဖွံ့ဖြိုးတိုးတက်ရေး အများနှင့်သက်ဆိုင်သော ကုမ္ပဏီကို ၂၀၁၈ ခုနှစ် ဧပြီလအတွင်း ဦးရဲမင်းဦး ဦးဆောင်ကာ တည်ထောင်ခဲ့ခြင်းဖြစ်ကြောင်း ဂွမြို့နယ် ပြည်သူ့လွှတ်တော်ကိုယ်စားလှယ် ဦးရဲခေါင်ညွန့်က Myanmar Now ကို ပြောသည်။ 

“ကိုရဲမင်းဦးကနေပြီးတော့ ဒီဟာကို စိတ်ဝင်စားတယ်။ ဒါနဲ့ ပတ်သက်ပြီးတော့ လုပ်ချင်တယ်ဆိုပြီးတော့ အစိုးရကို သွားပြီးတင်ပြတဲ့အခါမှာ အစိုးရက ကိုယ့်ဟာနဲ့ကိုယ် ဒေသခံပြည်သူတွေနဲ့ ပူးပေါင်းပြီးတော့ အများပိုင်ကုမ္ပဏီတစ်ခု တည်ထောင်ပြီးတော့ လုပ်ရင်တော့ ရနိုင်လောက်တယ်ဆိုပြီးတော့ အစိုးရကလဲ သူ့ကို ပြန်ပြောတယ်ပေါ့” ဟု ကုမ္ပဏီစတင်တည်ထောင်ဖြစ်ခဲ့ပုံကို ၎င်းက ရှင်းပြသည်။

သို့သော် ဦးရဲမင်းဦး နေပြည်တော် စည်ပင်ဘဏ်ဥက္ကဋ္ဌတာဝန်နှင့် နေပြည်တော် ဒုတိယမြို့တော်ဝန် တာဝန်များရယူခဲ့ပြီးနောက် စီမံကိန်းဆက်လက်အကောင်အထည်ဖော်ရန် ရခိုင်ပြည်နယ်အစိုးရထံ ထပ်မံလျှောက်ထားခြင်းမရှိတော့ကြောင်း ဦးရဲခေါင်ညွန့်က ပြောသည်။ 

အာဏာရပါတီမှ လွှတ်တော်ကိုယ်စားလှယ်များ၊ ၎င်းတို့၏ ဇနီးများကိုယ်တိုင် စီးပွားရေးစီမံကိန်းများတွင် ပါဝင်လာမှုကြောင့် လွှတ်တော်က ဒေသတွင်းစီးပွားရေးလုပ်ငန်းများကို စည်းမျဉ်းစည်းကမ်း ဥပဒေကျင့်ထုံးများနှင့် ညီမညီ စောင့်ကြည့်ထိန်းကျောင်းသည့် အခြေအနေနှင့် ကိုယ်ကျိုးစီးပွားပဋိပက္ခများ ဖြစ်ပေါ်လာနိုင်မှုကို စိုးရိမ်မကင်းမှုများ ရှိနေသည်။ 

လူကြားလို့တောင်မကောင်းဘူး 

အထက်ပါ ရခိုင်ကမ်းရိုးတန်းဖွံ့ဖြိုးတိုးတက်ရေးကုမ္ပဏီကို ဂွမြို့နယ်မှ ဒေသခံစီးပွားရေးလုပ်ငန်းရှင်များဖြစ်ကြသော ဦးဝင်းကို၊ ဦးပြည့်ဖြိုးပိုင်၊ ဦးလင်းထိုက်တို့သည်လည်း ဦးရဲမင်းဦးတည်ထောင်ခဲ့သော ထိုကုမ္ပဏီ၏ ဒါရိုက်တာအဖွဲ့တွင် ပါဝင်နေသည်ကို တွေ့ရသည်။

ရခိုင်ပြည်နယ်တွင် စီမံကိန်းတစ်ခုခုဖော်ဆောင်နိုင်ရေး စီးပွားရေးလုပ်ငန်းရှင်များနှင့် ချိတ်ဆက်ပေးရန် ရခိုင်ပြည်နယ်ဝန်ကြီးချုပ် ဦးညီပုက ၎င်း၏ ခင်ပွန်းကို အကူအညီတောင်းခံခဲ့ရာမှ ထိုအများပိုင်ကုမ္ပဏီကို တည်ထောင်ခဲ့ခြင်းဖြစ်ကြောင်း ကုမ္ပဏီဒါရိုက်တာတစ်ဦးဖြစ်သူ စမ်းချောင်းမြို့နယ် ပြည်သူ့လွှတ်တော်ကိုယ်စားလှယ် ဦးဘိုဘိုဦး၏ ဇနီး ဒေါ်ခင်မိုးအေးက ပြောသည်။

“ပွင့်ပွင့်လင်းလင်းပြောရရင် ကျွန်မက ဦးညီကို ကူညီချင်တာလေ။ အဲဒီမှာ Development က ဘာမှ မပြနိုင်သေးဘူးလေ။ ဒါလေးတစ်ခုပြနိုင်ရင်လည်း သူတို့မှာ ဖွံ့ဖြိုးမှုလေး ရှိလာနိုင်တယ်ပေါ့။ ဒီငါးနှစ်မှာ အကောင်အထည်ပေါ်လာရင် နောက်ငါးနှစ် ကိုယ့်ပါတီလည်း မဲရနိုင်တယ်ပေါ့ ဆိုပြီးတော့ ဝိုင်းလုပ်ပေးလိုက်ကြတာပါ” ဟု NLD ပါတီ၏ ရန်ကုန်တိုင်း အမျိုးသမီးလုပ်ငန်းကော်မတီဥက္ကဋ္ဌလည်းဖြစ်သူ ဒေါ်ခင်မိုးအေးက ပြောသည်။ 

ဦးရဲမင်းဦး ဦးစီးတည်ထောင်ထားသော ရခိုင်ကမ်းရိုးတန်းဖွံ့ဖြိုးတိုးတက်ရေးကုမ္ပဏီမှာ ရခိုင်ပြည်နယ်ဝန်ကြီးချုပ် ဦးညီပု၏ သဘောထားဖြင့် တည်ထောင်ထားခြင်း ဟုတ်မဟုတ်သိရှိနိုင်ရန် ပြည်နယ်အစိုးရအဖွဲ့မှ စည်ပင်သာယာရေးဝန်ကြီး ဦးဝင်းမြင့်နှင့် စီမံကိန်းနှင့် ဘဏ္ဍာရေးဝန်ကြီး ဦးကျော်အေးသိန်းတို့ကို ဆက်သွယ်မေးမြန်းရာတွင် ထိုကုမ္ပဏီကို မသိရှိကြောင်း ၎င်းတို့က ဖြေကြားသည်။ 

ရခိုင်ပြည်နယ်သို့ လာရောက်ရင်းနှီးမြှုပ်နှံလိုသည့် လုပ်ငန်းရှင်နည်းပါးသည့်အတွက်ကြောင့် ကမ်းသာယာကမ်းခြေရှိ ဇီးကုန်းကွင်းတွင် ဟိုတယ်ဇုန်တည်ထောင်ရန်နှင့် ငပလီစျေးပြုပြင်ဆောက်လုပ်ရန် ဦးရဲမင်းဦးကို ကမ်းလှမ်းခဲ့ဖူးသော်လည်း အကောင်အထည်မဖော်နိုင်ခဲ့သည့်အတွက် ပြည်နယ်အစိုးရအနေဖြင့် အခက်တွေ့ခဲ့ရသည်ဟု ဝန်ကြီးချုပ်ဦးညီပုနှင့် ရင်းနှီးသော လွှတ်တော်ကိုယ်စားလှယ်တစ်ဦးက ပြောသည်။ 

စီးပွားရေးနောက်ခံရှိသည့်အတွက်ကြောင့် ဦးရဲမင်းဦးကိုသာ ကမ်းလှမ်းခဲ့ခြင်းဖြစ်ပြီး ပါတီနှင့် ပတ်သက်ဆက်စပ်နေသူများ အစုလိုက်ပါဝင်နေခြင်းအပေါ် ပါတီကို တင်ပြသွားမည်ဟုလည်း ၎င်းက ပြောသည်။

“NLD အင်အားစုတွေလို ဖြစ်နေတော့ အဲဒါကြီးကတော့ မကောင်းဘူး။ သူတို့လုပ်တဲ့အခါမှာ ရိုးရိုးသားသားလုပ်တယ်ဆိုပြီးတော့ ဟုတ်မလား။ လူကြားလို့တောင် မကောင်းဘူး” ဟု အမည်မဖော်လိုသူ ၎င်းက ပြောသည်။

ပြည်သူ့လွှတ်တော်ကိုယ်စားလှယ် ဦးဖြိုးဇေယျာသော်၏ ဇနီးဟောင်း ဒေါ်သင်းဂျူလိုင်ကျော်ကလည်း ဒေသခံများ အလုပ်အကိုင်အခွင့်အလမ်းများရရှိလာရန်နှင့် ဒေသခံများ အနည်းဆုံးဈေးနှုန်းဖြင့် အစုရှယ်ယာများဝယ်ယူရရှိနိုင်ရန် ရည်ရွယ်ပြီး အများပိုင်ကုမ္ပဏီတစ်ခုတည်ထောင်ရန် ဦးရဲမင်းဦးက အကူအညီတောင်းခံလာ၍ ကုမ္ပဏီတည်ထောင်ရာတွင် ပါဝင်ခဲ့သည်ဟု ဆိုသည်။ 

“အလုပ်ဖြစ်ဖို့အတွက် စပြီးထူထောင်ဖို့ လူလိုတယ်ဆိုတဲ့အနေအထားမှာ နီးစပ်ရာ ပတ်ဝန်းကျင်က ဝိုင်းပြီးတော့ ပါပေးလိုက်တယ်ဆိုတဲ့ သဘောပေါ့” ဟု ၎င်းက ပြောသည်။

အစုရှယ်ယာတစ်စုလျှင် ကျပ် ၁၀ သိန်း သတ်မှတ်ထားပြီး ယနေ့အချိန်ထိ ဦးရဲမင်းဦးက ငွေကြေးတောင်းခံခြင်းမရှိခဲ့ကြောင်း၊ ကုမ္ပဏီတည်ထောင်ပြီး လုပ်ငန်းများလည်ပတ်သွားပါက ဒေသခံပြည်သူများကို အစုရှယ်ယာတစ်စုလျှင် သောင်းဂဏန်းပမာဏဖြင့် ရောင်းချသွားရန် စီစဉ်ထားသည်ဟု ဒေါ်သင်းဂျူလိုင်ကျော်က ပြောသည်။

ဒါရိုက်တာအဖွဲ့ဝင်အချို့၏ အဆိုအရ ကုမ္ပဏီဖျက်သိမ်းရန်အတွက် ၂၀၁၉ ခုနှစ်အတွင်း လက်မှတ်ထိုးခဲ့ရသည်ဆိုသော်လည်း ၂၀၁၉ ခုနှစ် အောက်တိုဘာလတွင် ကုမ္ပဏီသက်တမ်းတိုးထားသည်ကို DICA မှတ်တမ်းများတွင် တွေ့ရသည်။

အာဏာရပါတီမှ လွှတ်တော်ကိုယ်စားလှယ်များနှင့် ပါတီဝင်အများစုပါဝင်ပြီး ထိုသို့ ကုမ္ပဏီတစ်ခုတည်ထောင်ထားခြင်းမှာ အကျိုးစီးပွားပဋိပက္ခဖြစ်နိုင်ခြေသို့ ဦးတည်သွားနိုင်ပြီး နိုင်ငံတကာမှ လာရောက်ရင်းနှီးမြှုပ်နှံမည့် ကုမ္ပဏီများကလည်း ထိုအချက်အပေါ်တွင် ထောက်ပြလာနိုင်သည်ဟု ကုမ္ပဏီများ၊ အစိုးရအဖွဲ့အစည်းများ၊ ကျင့်ဝတ်နှင့် ညီညွတ်ရန် စောင့်ကြည့်လေ့လာနေ​သော အရပ်ဘက်အဖွဲ့အစည်းတစ်ခုဖြစ်သည့် Myanmar Alliance for Transparency and Accountability အဖွဲ့ တာဝန်ခံ ဦးရဲလင်းမြင့်က ပြောသည်။

“အဓိကပြောချင်တာကတော့ အာဏာရပါတီအစိုးရအနေနဲ့ Conflict of Interest ပေါ့။ အကျိုးစီးပွားပဋိပက္ခမဖြစ်အောင် ဘယ်လိုတွေလုပ်ထားတယ်၊ မူတွေဘယ်လိုရှိတယ်၊ လုပ်ထုံးလုပ်နည်းတွေ ဘယ်လိုရှိတာကို ပွင့်ပွင့်လင်းလင်းရှိဖို့ လိုပါတယ်” ဟု ၎င်းက ပြောသည်။

ပါတီဝင်ဖြစ်လာပြီး တစ်နှစ်ကျော်အတွင်း ဦးရဲမင်းဦးသည် NLD အစိုးရအဖွဲ့တွင် ထိပ်တန်းရာထူး သုံးခုအထိ ရရှိထားပြီး ၂၀၂၀ ရွေးကောက်ပွဲတွင် ဦးရဲမင်းဦးသည် NLD ပါတီကိုယ်စားပြုကာ ဒဂုံမြို့နယ် တိုင်းဒေသကြီးမဲဆန္ဒနယ်အမှတ် (၁) မှ အနိုင်ရရှိခဲ့သည်။

အချိန်တိုအတွင်း အာဏာရ NLD ပါတီအတွင်း နေရာရလာသူ ဦးရဲမင်းဦးသည် Grand National Capital ကုမ္ပဏီအား ထူထောင်ကာ ဒီမိုကရေစီစံနှုန်းများအရ အငြင်းပွားဖွယ်ရှိသော စီမံကိန်းလုပ်ငန်းတစ်ခုတွင်လည်း ပါဝင်ရင်းနှီးမြှုပ်နှံလုပ်ကိုင်ခဲ့သည်။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးအစိုးရလက်ထက်က ပြည်ခိုင်ဖြိုးခေါင်းဆောင်တစ်ဦးဖြစ်သူ ဦနန္ဒာလှမြင့်အား ၂၀၁၄ ခုနှစ်တွင် ချထားပေးခဲ့သော တောင်ကြီးမြို့ရှိ အေးယာယာအိမ်ရာစီမံကိန်းတွင် ဦးရဲမင်းဦးပိုင်ကုမ္ပဏီက ဝင်ရောက်လုပ်ကိုင်ခဲ့သည်။

လက်ရှိတွင် ၎င်း၏ ဇနီးဖြစ်သူ ဒေါ်အေးနန္ဒာစိမ်း ဥက္ကဋ္ဌလုပ်နေသော ထို Grand National Capital ကုမ္ပဏီသည် အိမ်ရာစီမံကိန်းအတွက် ရှမ်းပြည်နယ်အစိုးရထံ ပေးသွင်းရန် အကြွေးကျပ်သန်း ၂၄၀၀ တင်ရှိနေသည်။

Grand National Capital ကုမ္ပဏီတွင် ဦးရဲမင်းဦးအနေဖြင့် တရားဝင်မပါရှိတော့သော်လည်း ကုမ္ပဏီကြွေးကျန်ကိစ္စဖြေရှင်းရန် ရှမ်းပြည်နယ်အစိုးရအဖွဲ့၊ ပြည်နယ်ဥပဒေချုပ်၊ ဦးနန္ဒာလှမြင့်၏ မင်းကျန်စစ်ကုမ္ပဏီတို့ ယခုနှစ်ဆန်းပိုင်းက တွေ့ဆုံဆွေးနွေးရာတွင် ဦးရဲမင်းဦးကိုယ်တိုင် တက်ရောက်ခဲ့ကြောင်း ရှမ်းပြည်နယ်အစိုးရအဖွဲ့အတွင်းရေးမှူး ဦးနေလင်းက Myanmar Now ကို ပြောကြားထားသည်။ 

NLD ပါတီဝင်များနှင့် ၎င်းတို့၏ မိသားစုဝင်များမှာ နိုင်ငံသားများသာဖြစ်ပြီး ကုမ္ပဏီတည်ထောင်ကာ စီးပွားရေးလုပ်ကိုင်ခွင့်ရှိသော်လည်း စီမံကိန်းများကို လျှောက်ထားရာတွင် အထူးအခွင့်အရေးများရယူခဲ့ပါက တည်ဆဲဥပဒေများနှင့် ငြိစွန်းမည်ဖြစ်ပြီး ပါတီ၏ စည်းမျဉ်းစည်းကမ်းများနှင့်လည်း မညီညွတ်ကြောင်း ပါတီပြောရေးဆိုခွင့်ရှိသူ ဒေါက်တာမျိုးညွန့်က ပြောသည်။

“အထူးအခွင့်အရေးများ ရနေမလားလို့ တွေးရင်တော့ Conflict of Interest ပေါ့။ အကျိုးစီးပွားအရ ဆန့်ကျင်နေမယ်လို့ သံသယရှိစရာဖြစ်ပါတယ်” ဟု ၎င်းက ပြောသည်။

သို့သော် NLD ပါတီ၏ ထိပ်သီးလွှတ်တော်ကိုယ်စားလှယ်များပါဝင်နေသည့် ရခိုင်ကမ်းရိုးတန်းဖွံ့ဖြိုးတိုးတက်ရေးကုမ္ပဏီအနေဖြင့် ကမ်းသာယာကမ်းခြေဟိုတယ်ဇုန်စီမံကိန်း လုပ်ပိုင်ခွင့်ရရှိရန် ရခိုင်ပြည်နယ်အစိုးရထံတွင် ဆက်လက်လျှောက်ထားခဲ့ခြင်းမရှိသည့်အတွက် မှတ်ချက်ပေးရန် မလိုအပ်ဟု ဒေါက်တာမျိုးညွန့်က ယူဆသည်။ 

ပုဂ္ဂလိကကုမ္ပဏီများတွင် အစိုးရအဖွဲ့ဝင်ဝန်ကြီးများ၊ လွှတ်တော်ကိုယ်စားလှယ်များ၏ အကျိုးစီးပွားပါဝင်နေခြင်းသည် နိုင်ငံရေးအဂတိလိုက်စားမှုဖြစ်ပြီး အာဏာရပါတီအနေဖြင့် စုံစမ်းဖော်ထုတ်သင့်ကြောင်း နိုင်ငံရေးလေ့လာသုံးသပ်သူ ဒေါက်တာရန်မျိုးသိမ်းက ဆိုသည်။ 

“ဒီလိုဖြစ်စဉ်မျိုးကို အစိုးရအနေနဲ့ရော အဂတိလိုက်စားမှုတိုက်ဖျက်ရေးကော်မရှင်အနေနဲ့ရော စောင့်ကြည့်ပြီး စုံစမ်းစစ်ဆေးဖော်ထုတ်ဖို့ လိုအပ်တယ်။ အာဏာပိုင်တွေနဲ့ နီးစပ်တဲ့ အာဏာရပါတီနဲ့ နီးစပ်တဲ့ ပုဂ္ဂိုလ်တွေက ဦးဆောင်ပြီး ကုမ္ပဏီတွေထောင်မယ်၊ လုပ်ငန်းတွေလုပ်မယ်ဆိုရင် မလျော်ကန်တဲ့ နည်းလမ်းနဲ့ အသာစီးယူတဲ့ သဘောမျိုးဖြစ်နေတယ်” ဟု ၎င်းက ပြောသည်။

အကျိုးစီးပွားပဋိပက္ခဆိုသည်မှာ အဂတိလိုက်စားမှုကျူးလွန်သည့် အဆင့်မဟုတ်သေးသော်လည်း အဂတိလိုက်စားမှုဖြစ်နိုင်ခြေရှိသည့်အတွက် အန္တရာယ်ကြီးမားကြောင်း အဂတိလိုက်စားမှုတိုက်ဖျက်ရေးကော်မရှင်ဥက္ကဋ္ဌဖြစ်သူ ဦးအောင်ကြည်က ယခုနှစ် ဇွန်လတွင် Myanmar Now ကို ပြောကြားထားသည်။ 

လူပုဂ္ဂိုလ်တစ်ဦး၊ အဖွဲ့အစည်းတစ်ဖွဲ့၊ လူ့အသိုက်အဝန်းတစ်ခု၏ အကျိုးစီးပွားကို အများပြည်သူအကျိုးစီးပွားထက် ဦးစားပေးဆုံးဖြတ်၊ဆောင်ရွက်ခြင်းဆိုသည့် အဂတိတရားများဖြစ်ပေါ်လာနိုင်သည့်အတွက် ဌာနဆိုင်ရာများအနေဖြင့် ပြစ်မှုကျူးလွန်ချိန်ထိ မစောင့်ဆိုင်းပဲ ကြိုတင်ကာကွယ်သင့်ကြောင်းလည်း ကော်မရှင်ဥက္ကဋ္ဌရာထူးမှ မကြာသေးမီက အနားယူခဲ့သူ ဦးအောင်ကြည်က ဆိုသည်။ 

အာဏာရပါတီအသိုင်းအဝိုင်းမှ ပုဂ္ဂိုလ်များနှင့်အတူ ရခိုင်ကမ်းရိုးတန်းဖွံ့ဖြိုးတိုးတက်ရေးအများပိုင်ကုမ္ပဏီတည်ထောင်ခဲ့ခြင်းနှင့် ပတ်သက်၍ ဦးရဲမင်းဦးကို Myanmar Now က ဆက်သွယ်မေးမြန်းခဲ့သော်လည်း ပြန်လည်ဖြေကြားခြင်း မရှိပေ။