သတင်း

ရွှေဘို PDF က ပျူစောထီး ၄ ဦးကို ပစ်သတ်ပြီး လက်နက်များ သိမ်းဆည်း

စစ်ကိုင်းတိုင်း၊ ရွှေဘိုမြို့နယ်တွင် စစ်ကောင်စီ လက်အောက်ခံ ပြည်သူ့စစ် ခေါ် ပျူစောထီး ၄ ဦးကို သတ်ဖြတ်ခဲ့ပြီး ၎င်းတို့၏ လက်နက်များကို သိမ်းခဲ့ကြောင်း ပြည်သူ့ကာကွယ်ရေးတပ်မတော် (PDF) က ထုတ်ပြန်သည်။

မြို့အနောက်ဘက် ၁၀ မိုင်အကွာ မြင်းစီးကျေးရွာအထိုင်စခန်းမှ ပျူစောထီးအဖွဲ့ဝင်များ ဆင်အင်းရွာနှင့် မြင်းစီးရွာအကြား ကင်းပုန်းဝပ်နေချိန် ဇွန် ၂၀ ရက်၊ မွန်းလွဲ ၃ နာရီခန့်တွင် PDF ‌ရွှေဘိုခရိုင် အမှတ် (၄) တပ်ရင်းနှင့် ပြည်သူ့ကာကွယ်ရေးအဖွဲ့ (ပကဖ) က တိုက်ခိုက်ခဲ့ခြင်းဖြစ်သည်။

ထိုရွာနှစ်ရွာကြား စစ်ကောင်စီတပ် ရိက္ခာပို့ရာလမ်းကြောင်းတွင် ပျူစောထီးအဖွဲ့ဝင်များကို ကင်းပုန်းချထားရာ လူအနည်းဆုံးရှိသည့် နေရာကို ဝင်ပစ်ခဲ့ခြင်းဖြစ်သည်ဟု ရွှေဘိုခရိုင် တိုက်နယ် (၃) ပကဖအဖွဲ့ တာဝန်ရှိသူတစ်ဦးက ပြောသည်။

“လမ်းတစ်လျှောက်လုံး လမ်းဆုံတွေမှာ ကင်းတွေယူထားတာပေါ့။ ကျွန်တော်တို့ စပြီးဝင်ပစ်တာက ငါးမိနစ်လောက်ပဲ ကြာတယ်။ အကုန်သေသွားတာ” ဟု သူက ပြောသည်။

AK-47 ‌မောင်းပြန်ရိုင်ဖယ်တစ်လက်၊ ကာဘိုင်သေနတ် ၃ လက်၊ ကျည် ၂၉၆ တောင့်၊ လက်ပစ်ဗုံး ၃ လုံး၊ စစ်တပ်သုံး ကျည်ကာ ၄ ထည်တို့ကို ရရှိခဲ့သည်ဟု သိရသည်။

ထိုနေ့ ညနေတွင် ပျူစောထီးအလောင်းများကို စစ်ကောင်စီတပ်က လာရောက်ကောက်ယူသွားသည်။

စစ်ကောင်စီက အင်အားကြီးထွားလာသည့် စစ်ကိုင်းတိုင်း ဒေသအခြေစိုက်ကာကွယ်ရေးတပ်များကို တန်ပြန်ရန် ပြည်ထောင်စုကြံခိုင်ရေးနှင့် ဖွံ့ဖြိုးရေးပါတီဝင်များ၊ အမျိုးသားရေးအစွန်းရောက်သူများကို လေ့ကျင့်၊ လက်နက်တပ်ဆင်ကာ ပြည်သူ့စစ် ခေါ် ပျူစောထီးအဖွဲ့များ ဖွဲ့စည်းပေးထားသည်။

အဆိုပါ ပျူစောထီးများသည် စစ်ကောင်စီစစ်ကြောင်းနှင့်အတူ ကျေးရွာများကို စီးနင်းခြင်း၊ မီးရှို့ဖျက်ဆီးခြင်းများ ကျူးလွန်လေ့ရှိသည်ဟု ဒေသခံများနှင့် ကာကွယ်ရေးအဖွဲ့များက ပြောကြသည်။

ကာကွယ်ရေးအဖွဲ့များဘက်မှ ထုတ်ပြန်သော မင်းကင်းမြို့နယ်တွင် ဖမ်းဆီးရမိသည့် ပျူစောထီး ၅ ဦးကို ဇွန် ၁၂ က ထုတ်ပြန်ထားစဉ်။ (ဓာတ်ပုံ-SRF)

မြင်းစီးကျေးရွာတွင်လည်း လွန်ခဲ့သည့် တစ်နှစ်ခွဲခန့်မှစတင်၍ စစ်ကောင်စီတပ်က အခြေချတပ်စွဲပြီး ပျူစောထီးအဖွဲ့ ဖွဲ့ထားသည်။

ကပ်လျက် ဆင်အင်းရွာတွင် လက်နက်တပ်ဆင်ပြီးသား ပျူစောထီးအဖွဲ့ဝင် ၅၀ ခန့် ရှိနိုင်ကြောင်း ဒေသကာကွယ်ရေးအဖွဲ့များက ခန့်မှန်းကြသည်။ အလားတူ မြင်းစီးရွာနှင့်၂ မိုင်အကွာ ဆင်အင်းတိုက်နယ်ရဲစခန်းတွင်လည်း စစ်ကောင်စီလက်နက်ကိုင်များ တပ်စွဲထားသည်။

အဆိုပါ ဆင်အင်းရွာရဲစခန်းကို ယမန်နှစ် နိုဝင်ဘာလက ဒေသခံကာကွယ်ရေးပူးပေါင်းအဖွဲ့များက ဝင်ရောက် တိုက်ခိုက်ခဲ့သည်။ စစ်ကောင်စီလက်နက်ကိုင်တို့ကလည်း အဆိုပါကျေးရွာရှိ နေအိမ် တစ်ထောင်ကျော်ကို မီးရှို့ဖျက်ဆီးခဲ့ပြီး အနီးအနားကျေးရွာများမှ အရပ်သားများကို သတ်ဖြတ်ခဲ့သည်။

ပြီးခဲ့သည့် ဇွန် ၁၇ တွင်လည်း ရွှေဘိုမြို့နယ်အနောက်ခြမ်း စစ်ကြောင်းထိုးသည့် စစ်တပ်က ကင်းဗျားရွာတွင် အရပ်သားများအား ဖမ်းခေါ်သွားပြီး ထိုအထဲမှ ၅ ဦးကို မိုင်းခွဲသတ်ဖြတ်ခဲ့သည်။

ဒေသခံများ ဖြစ်သောကြောင့် နယ်မြေကျွမ်းကျင်သည့် အားသာချက်ရှိသည့် ပျူစောထီးတို့ကို စစ်ကောင်စီက ရဲနှင့် စစ်သားများ အသုံးမပြုတော့သည့် လက်နက်ဟောင်းများ ပေးထားသည်။

ထိုကြောင့် PDF တို့ကလည်း စစ်သားများထက် လက်နက်အင်အားနည်းပါးသော ပျူစောထီးများကို ပစ်မှတ်ထားကာ တိုက်ခိုက်နေသဖြင့် ပျူစောထီးအခြေစိုက်ရွာများ၊ စခန်းများ မကြာခဏ စီးနင်း တိုက်ခိုက်ခံနေရသည်။

ဇွန် ၈ တွင်လည်း ကျောင်းသားတော်လှန်ရေးတပ်ဖွဲ့ (Student’s Revolutionary Force- S.R.F) က မင်းကင်းမြို့နယ်၊ အင်ကြင်းတောင်ရွာကို ဝင်ရောက်စီးနင်းခဲ့ပြီး ပျူစောထီး ၅ ဦးကို လက်နက်ခဲယမ်းများနှင့်အတူ ဖမ်းမိခဲ့သည်ဟု သိရသည်။

ပြီးခဲ့သည့် ဇွန် ၁၅ တွင်လည်း မကွေးတိုင်း၊ မင်းဘူးခရိုင်၊ စေတုတ္တရာမြို့နယ် တပွင်ရွာရဲစခန်းရှိ စစ်ကောင်စီ လက်နက်ကိုင် အင်အား (၄၀) ခန့်ကို PDF မင်းဘူးခရိုင် အမှတ် (၃) တပ်ရင်းက စီးနင်း တိုက်ခိုက်ပြီး ပျူစောထီး ၂ ဦးကို ဖမ်းမိခဲ့သည်။

ထိုစီးနင်းမှုအတွင်း ဆိုင်ကယ်တစ်စီးနှင့် ရိက္ခာအနည်းငယ် သိမ်းဆည်းရရှိခဲ့ပြီးနောက် ရဲစခန်းကို မီးရှို့ကာ ပြန်ဆုတ်ခွာခဲ့ကြောင်း NUG က ထုတ်ပြန်ထားသည်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)

Show More

Related Articles

Back to top button