အသက် ၁၇ နှစ်အရွယ် သမီးအရင်းဖြစ်သူအား ဖခင်ဖြစ်သူက သားမယားအကြိမ်ကြိမ်ပြုကျင့်မှု တစ်ခု စစ်ကိုင်းတိုင်းဒေသကြီး ကသာခရိုင် ကျောက်ထုံးကြီးကျေးရွာအုပ်စု ဝေဆွယ်ကျေးရွာတွင် ဖြစ်ပွားခဲ့သဖြင့် တရားခံဖြစ်သူ ဖခင်ကို ဖမ်းဆီးကာ အမှုစစ်ဆောင်ရွက်လျက်ရှိသည်ဟု နယ်မြေရဲစခန်း၏ စခန်းမှူးက ပြောသည်။
ပြီးခဲ့သည့်ဧပြီလ ၁၈ ရက်နေ့တွင် ဖခင်ဖြစ်သူ အသက် ၄၅ နှစ်ရှိ ဦးတင်ထွန်းက ၎င်းအား သားမယားအဖြစ် စတင်ပြုကျင့်ခဲ့ကြောင်းနှင့် ထိုအကြောင်းကို မည်သူကိုမျှ မပြောရန် ခြိမ်းခြောက်ခဲ့ကြောင်း၊ နောက်ရက်များတွင် လည်း အကြိမ်ကြိမ် ပြုကျင့်ခဲ့ကြောင်းနှင့် မေလ ၆ ရက်နေ့ညတွင်လည်း နှစ်ကြိမ်တိုင်တိုင် ပြုကျင့်ခဲ့ကြောင်း သမီးဖြစ်သူက ကသာမြို့မရဲစခန်းသို့ ယခုလ ၈ ရက်နေ့ (ယမန်နေ့) တွင် လာရောက်တိုင်တန်းခဲ့သည်ဟု ရဲစခန်း မှတ်တမ်းတွင် ဖော်ပြထားသည်။
“ပြစ်မှူကျူးလွန်သူကို ကျွန်တော်တို့ဖမ်းထားပြီး ရမန်ယူထားပြီးပါပြီ။ လုပ်ထုံးလုပ်နည်းတွေအရ အမှုကို ခိုင်မာအောင် တည်ဆောက်နိုင်ဖို့ ကူညီပေးနေပါတယ်” ဟု ကျောက်ထုံးကြီးကျေးရွာ နယ်မြေရဲစခန်းမှ စခန်းမှူး ရဲအုပ်ဝင်းမင်းထွန်း က Myanmar Now ကို ယနေ့ ပြောသည်။
ထို့ကြောင့် ကသာမြို့မရဲစခန်းက တရားခံဦးတင်ထွန်းအား အမှုကြီးအမှတ်စဉ် ၅/၂၀၁၈ ပြစ်မှုဆိုင်ရာဥပဒေပုဒ်မ (ပ) ၁၁၀/၂၀၁၈ ရာဇသတ်ကြီးပုဒ်မ ၃၇၆ (အလိုမတူဘဲ ကာမစပ်ယှက်မှု) ဖြင့် ယမန်နေ့တွင် အမှုဖွင့်စစ်ဆေးကာ ဆက်လက်ဆောင်ရွက်နေသည်။
