သက်တမ်းကုန်ခါနီး နို့ထွက်ပစ္စည်းများ ပြည်တွင်းသို့ အလုံးအရင်းဝင်ရောက်နေ

(ရန်ကုန်) – ပြည်ပမှ သက်တမ်းကုန်ခါနီး နို့ဆီ၊နို့မှုန့်များနှင့် နို့အစားထိုး ထုတ်လုပ်ထားသည့် ပစ္စည်းများသည် ပြည်တွင်းသို့ အလုံးအရင်းဝင်ရောက်နေပြီး၊ ပြည်တွင်းထုတ်လုပ်သူများ အခက်အခဲတွေ့နေရကြောင်း မြန်မာနိုင်ငံနို့လုပ်ငန်းအသင်း ဒုတိယဥက္ကဋ္ဌက ပြောသည်။

“Non-Dairy လို့ခေါ်တဲ့ အဲ့လိုပစ္စည်းတွေ အများကြီးဝင်လာတယ်။ (ဒီပစ္စည်းတွေကြောင့် ပြည်တွင်းက) နွားနို့တွေ နို့ဆီတွေ မစားတော့ မသုံးတော့ဘူးဆိုတာမျိုး ဖြစ်လာတော့တာပဲ ” ဟု မြန်မာနိုင်ငံနို့လုပ်ငန်းအသင်း ဒုတိယဥက္ကဋ္ဌ ဒေါက်တာခင်လှိုင်က ဇွန် ၂၈ ရက် ရန်ကုန်တွင်ပြုလုပ်သည့် သတင်းစာရှင်းလင်းပွဲတွင် ပြောသည်။

သက်တမ်းကုန်ခါနီး နို့ဆီနှင့် နို့မှုန့်များသည် မြန်မာ့ရိုးရာပွဲတော်များ ကျင်းပရန်နီးကပ်လာသည့် အချိန်တွင် ပြည်တွင်းဈေးကွက်သို့ အမြောက်အမြားဝင်ရောက်လာလေ့ရှိကြောင်း ၎င်းက ပြောသည်။

“ကျွန်တော်တို့အသင်းက ဒါနဲ့ပတ်သက်ပြီး အရင်အစိုးရလက်ထက်တုန်းက တင်ပြတာတွေရှိပေမယ့် ဘာမှထူးခြားမှုမရှိခဲ့ပါဘူး ” ဟု မြန်မာနိုင်ငံနို့လုပ်ငန်းအသင်းအဖွဲ့ဝင် ဦးဇော်မိုးသန့် က ပြောသည်။

အဆိုပါ နို့အစားထိုးပစ္စည်းများကို နွားနို့မဟုတ်သော အခြားကုန်ကြမ်းပစ္စည်းများက ထုတ်လုပ်ထားခြင်းဖြစ်ကြောင်းကို စာအညွှန်းပါလေ့ရှိသော်လည်း အဆိုပါအညွှန်းမှာ မြန်မာဘာသာ ဖြင့် ရေးသားထားခြင်း မဟုတ်သဖြင့် စားသုံးသူအများစုက မသိကြောင်း မြန်မာနိုင်ငံစားသုံးသူအခွင့်အရေး ကာကွယ်ရေးသမဂ္ဂမှ အတွင်းရေးမှူး ဦးမောင်မောင်က ပြောသည်။

ယခုဖြစ်ရပ်များမှာ အစားအသောက်များနှင့်ပတ်သက်သည့် အညွှန်းစာများကို စားသုံးသူများ နားမလည်နိုင်သည့် ဘာသာစကားများဖြင့် ရေးသားထားခြင်းကြောင့် ဖြစ်ကြောင်း၊ လက်ရှိတွင် ပြင်ဆင်နေသည့် စားသုံးသူအကာအကွယ်ပေးရေးဥပဒေတွင် အညွှန်းကို မြန်မာဘာသာဖြင့်သာ ရေးသားရမည်ဟု ပြင်ဆင်ထားပြီးဖြစ်ကြောင်း ဦးမောင်မောင်က ဆိုသည်။