(ရန်ကုန်) — ထိုင်းမြန်မာနယ်စပ် မယ်လအူး ဒုက္ခသည်စခန်းတွင် ပြီးခဲ့သည့် ရက်ပိုင်းအတွင်း ရေကြီးခြင်း၊ မြေပြိုခြင်းကြောင့် သေဆုံး သို့မဟုတ် ပျောက်ဆုံးသွားသည်ဟု ယူဆရသည့် ၈ ဦးအနက် ၄ ဦး၏ ရုပ်အလောင်းကို ပြန်တွေ့ကြောင်း ကရင်ဒုက္ခသည်များကော်မတီ ဥက္ကဋ္ဌ ဦးစောရောဘတ်ထွေးက စက်တင်ဘာ ၂၁ တွင် ပြောသည်။
စက်တင်ဘာ ၁၆ ရက်နေ့က ပေါ်ပေါက်ခဲ့သည့် သဘာဝဘေးဒဏ်ကြောင့် စခန်းထဲရှိ နေအိမ် ၁၃ လုံး ရေနှင့် မျောပါသွားကြောင်း၊ ရှာဖွေရေးလုပ်ငန်း ဆက်လက် လုပ်ကိုင်နေကြောင်း သူက ပြောပြသည်။
“ရှာတာကတော့ ရှာနေတုန်းပဲ။ မြေကြီးထဲ နစ်မြုပ်နေတာလားတော့ မပြောတတ်သေးဘူး။ ရေစီးထဲမျောပါသွားရင် ပြန်တော့ ပေါ်မှာပဲဗျ။ ဒဏ်ရာရခဲ့တဲ့သူတချို့က အဲ့ဒီစခန်းရှိတဲ့မြို့က ဆေးရုံမှာ၊ တချို့ကတော့ စခန်းထဲက ဆေးရုံမှာ။ စိုးရိမ်ဖွယ်ရာ လူနာမျိုးတော့ မရှိတော့ပါဘူး” ဟု သူက ဆိုသည်။
ရေကြီးမှုကြောင့် ဘုရားကျောင်း ၂ ကျောင်းလည်း ပျက်စီးသွားကြောင်း၊ ယခင်နှစ်များက ယခုလောက် ရေးကြီးမှု မဖြစ်ပေါ်ခဲ့ဖူးကြောင်း သူက ဆက်ပြောသည်။
လူဦးရေ ကိုးထောင်ကျော် ခိုလှုံနေသည့် အဆိုပါစခန်းတွင် အများစုမှာ ကရင်တိုင်းရင်းသားများဖြစ်ကြသည်။ တောင်ကုန်း တောင်စောင်းပေါ် တည်ဆောက်ထားသော မယ်လအူစခန်းတွင် ရပ်ကွက်ပေါင်း ၁၃ ရပ်ကွက်ရှိပြီး ယခုရေကြီး ခဲ့သည်က ၁ ရပ်ကွက်တွင် ဖြစ်ကြောင်း သိရသည်။
ထိုင်းနိုင်ငံအတွင်းရှိ ဒုက္ခသည်စခန်းအများစုသည် ကရင်လက်နက်ကိုင်အဖွဲ့ KNU တောခိုပြီးနောက်ပိုင်း အစိုးရစစ်တပ်နှင့် တိုက်ပွဲများ ဆက်တိုက်ဖြစ်ပွားလာမှုကြောင့် ဒေသခံကရင်တိုင်းရင်းသားတို့ ထိုင်းနိုင်ငံအတွင်းသို့ ထွက်ပြေး ခိုလှုံရာမှ ပေါ်ပေါက်လာသော စခန်းများဖြစ်သည်။
ကရင်ပြည်နယ်၊ ကယားပြည်နယ်တို့နှင့် ကပ်လျက်တည်ရှိသည့် မယ့်ဟောင်ဆောင်ခရိုင်အတွင်းရှိ မယ်လအူစခန်းကို ၁၉၉၁ ခုနှစ်တွင် စတင်တည်ထောင်ခဲ့သည်။
ဤစခန်းသည်လည်း အခြားစခန်းများနည်းတူ နိုင်ငံတကာအကူအညီပေးရေးအဖွဲ့များ၏ အထောက်အပံ့ဖြင့် ရပ်တည်ခဲ့ခြင်း ဖြစ်ပြီး ယခုအခါ အကူအညီ လျှော့ချခံနေရသည်။
