ယနေ့နံနက်ပိုင်းက မကွေးမြို့နှင့် ဧရာဝတီမြစ်တစ်ဖက်ကမ်း မင်းဘူးမြို့တွင် တိုက်လေယာဉ် ၂ စင်း သီးခြားစီပျက်ကျခဲ့ပြီးနောက် အနည်းဆုံးလေယာဉ်မှူး ၂ ဦးနှင့်ကျောင်းသူ ၁ဦး သေဆုံးသွားခဲ့သည်။
ယနေ့နံနက် ၈နာရီခန့်က ပျက်ကျခဲ့သည့် တိုက်လေယာဉ်အပိုင်းအစနှင့် ထိမှန်ခဲ့သည့် အသက် ၁၁နှစ်အရွယ် မိန်းကလေးငယ်သည် ပြီးခဲ့သည့် မိနစ်ပိုင်းအတွင်းက အသက်ဆုံးပါးသွား ကြောင်း မင်းဘူး အထွေထွေအုပ်ချုပ်ရေးဦးစီးဌာနက အတည်ပြုခဲ့သည်။
လေယာဉ်ပျံသည် ငါးတန်းကျောင်းသူ နေထိုင်ရာ မင်းဘူးမြို့ ဆားဗွက်ချောင်းအတွင်း ပျက်ကျခဲ့ခြင်းဖြစ်ပြီး လေယာဉ်အပိုင်းအစ ထိမှန်ခဲ့သည့် ကလေးငယ်သည် မင်းဘူးဆေးရုံသို့ ပို့ဆောင်ခဲ့သော်လည်း သေဆုံးသွားသည်ဟု ဒေသခံများက ဆိုသည်။
ထို့အပြင် အဆိုပါလေယာဉ်ကို မောင်းနှင်ခဲ့သည့် လေယာဉ်မှူးလည်း သေဆုံးသွားခဲ့သည်ဟု ဒေသခံများက ဆိုသည်။
နောက်ထပ်လေယာဉ်ပျက်ကျမှုသည် မင်းဘူး မြောက်ဘက် သနပ်ပင်စုရွာအနီး ပျက်ကျခဲ့ခြင်းဖြစ်ပြီး အဆိုပါလေယာဉ်မောင်းနှင်သည့် လေသူရဲလည်း သေဆုံးသွားခဲ့ရသည်။
လေယာဉ်မှူးသည် ပြင်းထန်သောဒဏ်ရာများဖြင့် လယ်ကွင်းပြင်တွင် လေထီးအုပ်လျက် သေဆုံးနေသည့် ရုပ်ပုံများကို မင်းဘူးမြို့နယ် ပြည်သူ့လွှတ်တော်အမတ် ဦးဝင်းဝင်း၏လူမှုကွန်ရက် Facebook စာမျက်နှာတွင် တွေ့ရှိခဲ့ရသည်။
မင်းဘူး အထွေထွေအုပ်ချုပ်ရေးဦးစီးဌာန၏အဆိုအရ အခင်းဖြစ်ပွားရာနေရာသို့ မကွေးတိုင်းဒေသကြီး ဝန်ကြီးချုပ် ဒေါက်တာအောင်မိုးညိုနှင့် အစိုးရအရာရှိများ သွားရောက်နေကြ သည်ဟုဆိုသည်။
လေယာဉ်နှစ်စင်းအနက် မည်သည့်လေယာဉ်သည် အရင်ပျက်ကျကြောင်းနှင့် အဆိုပါမတော်တဆမှု နှစ်ခုသည် ဆက်နွှယ်မှု ရှိမရှိကို မသိရှိရသေးပါ။
အဆိုပါမတော်တဆမှုကို တပ်မတော်သတင်းမှန်ပြန်ကြားရေးက အတည်ပြုခဲ့ပြီး အသေးစိတ်အခြေအနေကို သတင်းထုတ်ပြန်ပေးသွားမည်ဟု Myanmar Now ကို ပြောသည်။
