ရန်ကုန်၊ လှိုင်သာယာမြို့နယ်၊ ဘုရားလမ်းမီးပွိုင့် ယာဉ်ထိန်းရဲရုံးတွင် တပ်စွဲထားသည့် စစ်ကောင်စီတပ်ဖွဲ့ဝင်များကို ယနေ့ (အောက်တိုဘာ ၁) မွန်းတည့် ၁၂ ဝန်းကျင်၌ ပစ်ခတ်တိုက်ခဲ့ရာ ၂ ဦး သေဆုံးပြီး ၇ ဦးခန့် ဒဏ်ရာရရှိသွားသည်ဟု သိရှိရသည်။
ထိုတိုက်ခိုက်မှုကို ဆောင်ရွက်ခဲ့သူမှာ ရန်ကုန်အခြေစိုက် Burma Gunstars အဖွဲ့က ဆောင်ရွက်ခြင်းဟု သိရှိရသည်။ ထိုတိုက်ခိုက်မှုနှင့် ပတ်သက်ပြီး စစ်ကောင်စီက သတင်းထုတ်ပြန်ခြင်း မရှိသေးပေ။
Burma Gunstars အဖွဲ့သည် တပ်မ (၇၇) လက်အောက်ခံ ၁၀၆ တပ်ရင်းကို ပစ်ခတ်ခြင်းနှင့် ရန်ကုန် သာကေတ အမှတ် (၁) ရဲစခန်းကို ပစ်ခတ်ခြင်းများဆောင်ရွက်ခဲ့သော အဖွဲ့ဖြစ်ကြောင်း သိရှိရသည်။
စစ်အာဏာသိမ်းမှုကို ငြိမ်းချမ်းစွာ ဆန္ဒပြကန့်ကွက်သူများ အကြမ်းဖက်ပစ်ခတ်ခံရပြီးနောက် ဇွန်လမှစ၍ ရန်ကုန်နှင့် မြန်မာနိုင်ငံအနှံ့အပြားရှိ မြို့ကြီးများတွင် ဗုံးပေါက်ကွဲမှုများ ဆက်တိုက်ဖြစ်ပေါ်လာခဲ့သည်။
ရန်ကုန်မြို့ အချက်အချာမြို့နယ်များဖြစ်သည့် ကမာရွတ်၊ လှိုင်နှင့် မြောက်ဥက္ကလာမြို့နယ်များတွင် စက်တင်ဘာလအတွင်းက ဗုံးပေါက်ကွဲမှု၊ ပစ်ခတ်မှုများ မကြာခဏဆိုသလိုဖြစ်ပွားခဲ့ပြီး စက်တင်ဘာ ၂၈ နံနက်ပိုင်းက ရန်ကုန်မြို့လယ် ကျောက်တံတားရဲစခန်းရှိ ရဲဝန်ထမ်းများနေထိုင်ရာ ၄ လွှာတွင် ဗုံးပေါက်ကွဲမှုဖြစ်ပွားခဲ့သည်။
မှတ်ချက်။ မူရင်းသတင်းတွင် တိုက်ခိုက်သည့်အဖွဲ့မှာ (Myanmar Defence Force – MDF) ဟု မှားယွင်းစွာဖော်ပြထားပါသည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
Donate here > https://www.userroll.com/site/register/m1f6p
