ထိုင်းနိုင်ငံသို့ ရောက်ရှိနေသည့် အာဏာသိမ်း စစ်ခေါင်းဆောင် သမ္မတ ဦးမင်းအောင်လှိုင်ကို ထိုင်းနိုင်ငံရောက် မြန်မာပြည်သူများနှင့် လူ့အခွင့်အရေး တက်ကြွလှုပ်ရှားသူများက ယနေ့ ( ဩဂုတ်လ ၆ ရက်) မွန်းလွဲတွင် ဘန်ကောက်မြို့ရှိ ကုလသမဂ္ဂရုံးရှေ့၌ ကန့်ကွက်ဆန္ဒပြခဲ့ကြသည်။
ထိုင်းနှင့် မြန်မာနိုင်ငံသား လူ့အခွင့်အရေး တက်ကြွလှုပ်ရှားသူများ ပါဝင်သည့် ဆန္ဒပြသူများက “ မအလ မင်းလို ရာဇဝတ်ကောင်ကို ငါတို့ မကြိုဆိုပါ” ၊ “ စစ်ခေါင်းဆောင်တွေ ကျဆုံးရေး”၊ “ဖက်ဒရယ် ဒီမိုကရေစီ ရရှိရေး” စသည့် ကြွေးကြော်သံများဖြင့် ဆန္ဒပြ တောင်းဆိုခဲ့ကြသည်။
ယနေ့ (ဩဂုတ်လ ၆ ရက်) နံနက်ပိုင်းတွင် ဦးမင်အောင်လှိုင်သည် ထိုင်းနိုင်ငံ ဘန်ကောက်မြို့သို့ ရောက်ရှိနေပြီး အစိုးရ ဧည့်ဂေဟာတွင် ထိုင်းဝန်ကြီးချုပ် အနူတင် ချန်းဝီရာကူးလ် ( Anutin Charnvirakul) နှင့် ထိုင်းအစိုးရ အဖွဲ့ဝင်များက ကြိုဆိုခဲ့ကြသည်။
မြန်မာစစ်ခေါင်းဆောင်၏ ထိုင်းခရီးစဉ်အတွင်း အွန်လိုင်းလိမ်လည်မှု၊ မူးယစ်ဆေးပြဿနာ၊ နယ်စပ် ကုန်သွယ်ရေးပြန်လည် စတင်ရေးနှင့် မြစ်ရေညစ်နွမ်းမှုဆိုင်ရာ ကိစ္စရပ်များကို ဖြေရှင်းနိုင်ရန် ထိုင်း-မြန်မာ စုပေါင်း အလုပ်ဖွဲ့တစ်ခု ဖွဲ့စည်းရေး ဆွေးနွေးသွားမည်ဖြစ်ကြောင်း ထိုင်း သတင်းဌာနများက ရေးသားထားသည်။
အာဏာသိမ်း စစ်ခေါင်းဆောင် ဦးမင်းအောင်လှိုင်၏ ထိုင်းခရီးစဉ်ကို လူ့အခွင့်အရေး တက်ကြွ လှုပ်ရှားသည့် အဖွဲ့အစည်းများက ကန့်ကွက်စာများထုတ်ပြန်ထားပြီး ထိုင်းနိုင်ငံရေးပါတီ Fair Party ၏ လွတ်တော် အမတ် Kannavee Suebsang က လည်း ကန့်ကွက်ကြောင်း ထုတ်ပြန်ထားသည်။
