(စစ်ကိုင်း) – စစ်ကိုင်းကောင်းမှုတော်စေတီကို ယနေ့မှစ၍ အဖြူရောင်ဆေးသင်္ကန်း ပြန်လည်ကပ်လှူလျက်ရှိသည်။
သိန်း ၃၀၀၀ မှ ၄၀၀၀ နီးပါး အကုန်အကျခံမည့် စေတီတော် အဖြူရောင်သင်္ကန်းကပ်လှူမည့် လုပ်ငန်းကို တပေါင်းလပြည့် ( ၂၀၁၉ မတ် လ ၂၀) မတိုင်မီ အဆုံးသတ်ရန် စီစဉ်ထားကြောင်း ဂေါပကအဖွဲ့က ဆိုသည်။
စစ်ကိုင်းကောင်းမှုတော်စေတီကို မူလ အဖြူရောင်သင်္ကန်းကပ်လှူထားရာမှ ၂၀၁၀ ဒီဇင်ဘာတွင် ရွှေသင်္ကန်း ပြောင်းလဲကပ်လှူခဲ့ခြင်းဖြစ်သည်။
ထိုစဉ်က နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီ ဥက္ကဋ္ဌ ဗိုလ်ချုပ်မှူးကြီးသန်းရွှေက ကောင်းမှုတော်သို့ လာရောက်ဖူးမြော်စဉ် နှစ်စဉ် ထုံးသင်္ကန်းကပ်လှူရခြင်းအစား ရွှေဆေးသင်္ကန်းကပ်လှူလျှင် မကောင်းဘူးလားဟု မေးမြန်းခဲ့ရာမှ အဖြူရောင်သင်္ကန်းမှ ရွှေရောင်သင်္ကန်းဖြစ်လာခဲ့ရခြင်း ဖြစ်ကြောင်း ဒေသခံများက ဆိုသည်။
