လာမယ့် သြဂုတ် ၆ ရက်နဲ့ ၇ ရက်မှာ အာဏာသိမ်းခေါင်းဆောင် ဦးမင်းအောင်လှိုင် ထိုင်းနိုင်ငံကို လာရောက်မယ့် ခရီးစဉ်မတိုင်ခင်၊ မြန်မာနိုင်ငံဘက်က သတ္တုတူးဖော်မှုတွေကြောင့် နယ်စပ်မြစ်ရေညစ်ညမ်းနေတဲ့ ပြဿနာကို ဖြေရှင်းပေးဖို့ ထိုင်းသဘာဝပတ်ဝန်းကျင်အရေး လှုပ်ရှားသူတွေနဲ့ ဒေသခံတွေက ချင်းမိုင်မြို့ မြန်မာကောင်စစ်ဝန်ရုံးရှေ့မှာ ဒီမနက် ဆန္ဒပြခဲ့ကြပါတယ်။
ကော့၊ ဆိုင်၊ ရွတ်နဲ့ မဲခေါင်မြစ်များကာကွယ်ရေး ပြည်သူ့ကွန်ရက်က ဦးဆောင်တဲ့ ဆန္ဒပြသူတွေဟာ ချင်းမိုင်မြို့ ဝပ်ဆန်တီထမ်ဘုရားကျောင်းကနေ မြန်မာကောင်စစ်ဝန်ရုံးအထိ လမ်းလျှောက်ချီတက် ဆန္ဒပြခဲ့ကြပြီး အိတ်ဖွင့်ပေးစာ တစ်စောင်ကိုလည်း မြန်မာကောင်စစ်ဝန်ရုံးမှာ ပေးအပ်ခဲ့ကြပါတယ်။
ဆန္ဒပြသူတွေက မြန်မာနိုင်ငံ ရှမ်းပြည်နယ်ဘက်က မြေရှားသတ္ထုနဲ့ အခြားသတ္တုတူးဖော်ရေးလုပ်ငန်းတွေကြောင့် နယ်စပ်ဖြတ်ကျော် မြစ်ချောင်းတွေ ညစ်ညမ်းလာပြီး ထိုင်းနိုင်ငံဘက်ခြမ်းက ရေနေသတ္တဝါတွေ၊ စိုက်ပျိုးမြေတွေနဲ့ နယ်စပ်ဒေသခံတွေရဲ့ အသက်မွေးဝမ်းကျောင်းတွေ ထိခိုက်နစ်နာနေတယ်လို့ ဆိုပါတယ်။ မြန်မာစစ်အစိုးရအနေနဲ့ ရေထုညစ်ညမ်းမှုပြဿနာကို ဝန်ခံပြီး သတ္တုတူးဖော်ရေးလုပ်ငန်းတွေကို ချက်ချင်းရပ်ဆိုင်းဖို့လည်း တောင်းဆိုခဲ့ပါတယ်။
ထိုင်းဝန်ကြီးချုပ်ရဲ့ အဆိုအရ ဦးမင်းအောင်လှိုင်နဲ့ ပြုလုပ်မယ့် တွေ့ဆုံဆွေးနွေးပွဲမှာ နယ်စပ်မြစ်ရေညစ်ညမ်းမှုပြဿနာအပါအဝင် ကျားဖြန့်နှိမ်နင်းရေးနဲ့ စီးပွားရေးဆိုင်ရာ ကိစ္စတွေကို ဆွေးနွေးသွားဖို့ ရှိပါတယ်။ နယ်စပ်ဒေသခံတွေကတော့ နှစ်ရှည်လများ ကြုံတွေ့နေရတဲ့ မြစ်ရေညစ်ညမ်းမှုပြဿနာကို အခုတွေ့ဆုံဆွေးနွေးပွဲကနေ ထိထိရောက်ရောက် ဖြေရှင်းပေးနိုင်ဖို့ မျှော်လင့်နေကြပါတယ်။
ရိုက်ကူး၊ တည်းဖြတ် – မြတ်ကြီး/ Myanmar Now
