မကွေးတိုင်းထဲမှ စလင်းနှင့်ဆင်ဖြူကျွန်းမှ စစ်တပ်စခန်းများကို အပြီးသတ်သိမ်းပိုက်မည်ဟု NUG ၏ စလင်းပကဖ ကကြေညာလိုက်ပြီး ဆင်ဖြူကျွန်းမှအရပ်သားများ စလင်းဘက််သို့ ဒီဇင်ဘာ ၂၅ နံနက် ၈နာရီမှ ညနေ ၆နာရီအတွင်း ပြောင်းရွှေ့ကြရန်လည်း သတိပေးလိုက်သည်။
အမျိုးသားညီညွတ်ရေးအစိုးရ NUG လက်အောက်ခံ ပြည်သူ့ကာကွယ်ရေးတပ်မတော် – PDF များ၊ ပြည်သူ့ကာကွယ်ရေးအဖွဲ့ – ပကဖ များနှင့် မဟာမိတ်များသည် လူဦးရေ ၇ထောင်ခန့်နေထိုင်သော မကွေးတိုင်းထဲမှ ဆင်ဖြူကျွန်းမြို့၏ မြို့ပေါ်တွင်တပ်စွဲထားသည့် စစ်ကောင်စီတပ်စခန်းများကို ဒီဇင်ဘာ ၂၃ နံနက်ပိုင်းမှ စတင်တိုက်ခိုက်ခဲ့ပြီးနောက် ဒေသတွင်းတွင် တိုက်ပွဲများပြင်းထန်နေခြင်းဖြစ်သည်။
သုံးရက်တာ စစ်ပွဲအတွင်း ဆင်ဖြူကျွန်း ဆေးရုံ၊ ရဲစခန်းအနီးတဝိုက်၊ မြို့အထွက် နွယ်တမင်တံတား၊ စလင်း-တညောင်လမ်းတို့တွင် ဒီဇင်ဘာ ၂၅ နေ့လယ်ပိုင်းအထိ တိုက်ပွဲများ ဖြစ်ပွားနေသည်ဟု ဒေသခံတို့ကဆိုသည်။
ဒေသတွင်းတော်လှန်ရေးတပ်များသည် ဆင်ဖြူကျွန်းအနီးမှ ပျူစောထီး ပြည်သူ့စစ်များ အားကောင်းရာ ပွင့်ဖြူမြို့နယ် ကျောင်းကုန်းကြီးရွာကိုလည်း စီးနင်းတိုက်ခိုက်နေသည်ဟု သိရသည်။ ထို့အပြင် ဧရာဝတီမြစ် အနောက်ဘက်ကမ်း မြို့များဖြစ်ကြသည့် ပွင့်ဖြူနှင့်မင်းဘူးတို့မှ နေရာအချို့တွင်လည်း စစ်တပ်နှင့် NUG တပ်များ ပစ်ခတ်မှုအချို့ရှိသည်ဟု သိရသည်။
စလင်း-ဆင်ဖြူကျွန်းမြို့အကြား လမ်းတလျှောက်ကိုလည်း စစ်တပ်က တိုက်လေယာဉ်၊ Gyrocopter ဟုခေါ်သည့် အနိမ့်ပျံအသေးစားရဟတ်ယာဉ်များသုံး၍ ဗုံးကြဲတိုက်ခိုက်နေသည်ဟု ဒေသခံတစ်ဦးက ပြောသည်။
“လေယာဉ်ကတော့ နေ့၊ ည တောက်လျှောက်ကိုလာတာ။ ပြည်သူတွေ ထိခိုက်တာတွေရှိတယ်”ဟု အထက်ပါ ဒေသခံက ပြောသည်။
NUGလက်အောက်ခံ မင်းဘူးခရိုင်စစ်ဌာနမှ တာဝန်ရှိသူတစ်ဦးက တိုက်ပွဲအတွင်း အရပ်သား ၇ ဦး ဒဏ်ရာရသွားသည်ဟုလည်း ပြောသည်။
လက်ရှိတွင် ဆင်ဖြူကျွန်းနှင့် စလင်းမြို့ပေါ်ရှိ အရပ်သားများကို ဘေးလွတ်ရာသို့ တိမ်းရှောင်ကြရန် တိုက်တွန်းထားသည်။
“စစ်ရေးထပ်ပြီးတော့ အရှိန်မြှင့်တော့မှာဆိုတော့ မြို့ထဲက ပြည်သူတွေအနေနဲ့ မြို့ထဲကနေ အမြန်ဆုံးရှောင်စေချင်ပါတယ်။ အထိအခိုက်မရှိအောင်လို့ပါ”ဟု NUG ၏ မင်းဘူးခရိုင်စစ်ဌာနမှ တာဝန်ရှိသူက ပြောသည်။
စစ်တပ်သည် ဆင်ဖြူကျွန်းမြို့အပါအဝင် စလင်းမြို့နယ်ကို ဇန်နဝါရီ ၁၁ တွင် ကျင်းပမည့် ရွေးကောက်ပွဲ၏ အပိုင်း ၂ တွင် ထည့်သွင်းထားသော်လည်း နေရာအချို့တွင်သာ မဲပုံးထောင်မည်ဟု ကြေညာထားသည်။
စစ်တပ်သည် စလင်းမြို့ပေါ် ရပ်ကွက် ၁၁ ခုကို စိုးမိုးထားပြီး ရွေးကောက်ပွဲကျင်းပမည်ဖြစ်သည်။ သို့သော် ကျေးရွာအုပ်စု ၉၉ ခုအနက် ၁၄ ခုတွင်သာ မဲပုံးထောင်နိုင်ပြီး ကျန်ကျေးရွာအုပ်စု ၈၈ ခုသည် ရွေးကောက်ပွဲကျင်းပရန် မဖြစ်နိုင်သေးဟု စစ်တပ်လက်အောက်ခံ ရွေးကောက်ပွဲကော်မရှင်က ကြေညာထားသည်။
