ခုခံတော်လှန်မှုအားကောင်းပြီး တော်လှန်ရေးတပ်ဖွဲ့ PDF တွေ အနီးဆုံးရှိနေတဲ့ စစ်ကိုင်းနဲ့ မကွေးကနေ ရွေးကောက်ပွဲဝင်ပြိုင်ဖို့ ဒုတိယဗိုလ်ချုပ်ကြီးနှစ်ယောက်ကို စစ်ခေါင်းဆောင်က ရွေးချယ်လိုက်ပါတယ်။
မကြာသေးခင် တပ်ကအနားပေးခံရတဲ့ အဆင့်မြင့်တပ်အရာရှိကြီး အနည်းစုထဲက ဒုတိယဗိုလ်ချုပ်ကြီးဟောင်း စိုးတင့်နိုင်က မကွေးမြို့နယ်နဲ့ ဒုတိယဗိုလ်ချုပ်ကြီးဟောင်း သက်ပုံက စစ်ကိုင်းမြို့နယ်ကနေ ရွေးကောက်ပွဲဝင်ပြိုင်ရမှာပါ။
၂၀၂၁ စစ်အာဏာသိမ်းမှုအပြီး ပြည်သူလူထုကို ပစ်ခတ်သတ်ဖြတ်မှုမှာ အဓိကတာဝန်ရှိသူ ထိပ်တန်းစစ်ဗိုလ်ချုပ်ကြီးတွေထဲကနှစ်ယောက် ရွေးကောက်ပွဲဝင်ပြိုင်ကြမယ့် စစ်ကိုင်းမြို့နဲ့ မကွေးမြို့ဟာ တိုင်းအစိုးရအဖွဲ့ရုံးစိုက်တဲ့မြို့တွေဖြစ်ပြီး မြို့ပေါ်ကလွဲလို့ ကျေးလက်ဒေသအများစုကို တော်လှန်ရေးအင်အားစုတွေက ထိန်းချုပ်ထားတာ ဖြစ်ပါတယ်။
ဒီလိုအခြေအနေမှာ ဒုဗိုလ်ချုပ်ကြီးဟောင်း စိုးတင့်နိုင်နဲ့ သက်ပုံတို့က စစ်တပ်ကျောထောက်နောက်ခံ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီကိုယ်စားပြုပြီး ရွေးကောက်ပွဲဝင်ပြိုင်ရမှာလည်း ဖြစ်ပါတယ်။
“မဲဆန္ဒနယ်က သာမန်အားဖြင့် ကိုယ်တိုင် ရွေးခွင့်မရကြဘူး။ ကိုယ်ရေးမှတ်တမ်းနဲ့ တာဝန်ထမ်းဖူးတဲ့နေရာတွေကိုကြည့်ပြီး စစ်ခေါင်းဆောင်က သတ်မှတ်တာ” လို့ နေပြည်တော်စစ်ရုံးနဲ့နီးစပ်တဲ့ တပ်အရာရှိဟောင်းတစ်ဦးက ပြောပါတယ်။
စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ ဒုဗိုလ်ချုပ်ကြီးသက်ပုံတို့ဟာ တစ်တပ်ထဲမှာ အတူနေခဲ့ဖူးပါတယ်။ သက်ပုံရဲ့ဇနီးဟာ စစ်တက္ကသိုလ်ကျောင်းအုပ်ကြီးရဲ့သမီးဖြစ်ပြီး အဲ့ဒီကျောင်းအုပ်ကြီးဟာ ဗိုလ်ချုပ်မှူးကြီးမင်းအောင်လှိုင်ရဲ့ ဆရာလည်း ဖြစ်ပါတယ်။
၂၀၁၄ခုနှစ်က အလွတ်တန်းသတင်းထောက် ကိုပါကြီး သတ်ဖြတ်ခံရမှုမှာ အဲ့ဒီကာလက တပ်မ ၂၂ရဲ့ တပ်မမှူးဖြစ်သူ သက်ပုံဟာ အဓိကတာဝန်ရှိသူ ဖြစ်ပါတယ်။ ကိုပါကြီးရဲ့ အလောင်းကို တူးဖော်စစ်ဆေးရာမှာ အမှုမှန်ပေါ်ပေါက်ခဲ့ပေမယ့် သက်ပုံက တာဝန်မယူဘဲ သူ့လက်အောက်က ခေတ္တတပ်ရင်းမှူးတစ်ယောက်ကို အပြစ်ပုံချခဲ့တယ်လို့ အဲ့ဒီအခြေအနေကို သိရှိတဲ့ တပ်အရာရှိဟောင်းတစ်ဦးက ပြောပြပါတယ်။
၂၀၁၉ခုနှစ်ကလည်း အမျိုးသားရေးအမည်ခံတွေနဲ့ဖွဲ့ထားတဲ့ မဘသအဖွဲ့အမည်ပြောင်း ဗုဒ္ဓဓမ္မပရဟိတဖောင်ဒေးရှင်းညီလာခံကို ရန်ကုန်တိုင်းရဲ့ စစ်တိုင်းမှူးတာဝန်ယူစဉ်က ဗိုလ်ချုပ်သက်ပုံ ကိုယ်တိုင်တက်ရောက်ပြီး ငွေကျပ်သိန်း ၃၀၀ လှူဒါန်းခဲ့ပါတယ်။
အဲ့ဒီနောက် ၂၀၂၀နှစ်လယ်မှာ ရန်ကုန်တိုင်းလုံခြုံရေးကို အဓိကတာဝန်ယူတဲ့ အမှတ်(၅)စစ်ဆင်ရေးအထူးအဖွဲ့၊ ကစထ(၅)မှာ အဖွဲ့မှူးအဖြစ် ၅နှစ်နီးပါး တာဝန်ယူခဲ့ပါတယ်။
၂၀၂၁ စစ်အာဏာသိမ်းပြီးနောက် ရန်ကုန်က ဆန္ဒပြပြည်သူလူထုကို ပစ်ခတ်ဖြိုခွင်းမှုမှာ ဒုဗိုလ်ချုပ်ကြီးသက်ပုံက အဓိကတာဝန်ရှိသူတစ်ယောက် ဖြစ်ပါတယ်။
မကွေးမြို့နယ်ကနေ ဝင်ပြိုင်မယ့် ဒုဗိုလ်ချုပ်ကြီးဟောင်း စိုးတင့်နိုင်ကတော့ အမ်းမြို့အခြေစိုက် အနောက်ပိုင်းတိုင်းစစ်ဌာနချုပ်နဲ့ မုံရွာအခြေစိုက် အနောက်မြောက်တိုင်းစစ်ဌာနချုပ်တွေမှာ စစ်တိုင်းမှူးအဖြစ် တာဝန်ထမ်းဆောင်ခဲ့ဖူးတဲ့အပြင် NLD အစိုးရလက်ထက် ၂၀၂၀နဲ့ ၂၀၂၁ စစ်အာဏာသိမ်းပြီးနောက်မှာ ပြည်ထဲရေးဒုဝန်ကြီး ဖြစ်ခဲ့ပါတယ်။
၂၀၂၃ခုနှစ်မှာတော့ တပ်မတော်စစ်ဆေးရေးနဲ့စာရင်းစစ်ချုပ်ဖြစ်လာခဲ့ပြီး ခုတော့ သူ့ဇာတိ မကွေးမြို့ကနေ ရွေးကောက်ပွဲပြိုင်မှာဖြစ်ပါတယ်။
ဒုဗိုလ်ချုပ်ကြီးစိုးတင့်နိုင်က သူ့အနေနဲ့ ရွေးကောက်ပွဲဝင်မှာဟာ တစ်ဦးတစ်ယောက်ရဲ့ တာဝန်ပေး၊ တိုက်တွန်းမှုကြောင့် မဟုတ်ဘဲ မိမိသဘောဆန္ဒအလျောက် ဝင်ပြိုင်တာဖြစ်တယ်၊ တပ်ကနေ နိုင်ငံရေးဘက်ကို ဖြတ်ဝင်လာတဲ့ မိုးကျရွှေကိုယ်မဟုတ်ဘူးလို့ သူ့ရဲ့ လူမှုကွန်ရက် TikTok မှာ ရေးသားထားပါတယ်။
အာဏာရှင်စစ်ခေါင်းဆောင်လက်အောက်မှာ မိမိသဘောဆန္ဒအလျောက် ရွေးကောက်ပွဲဝင်ပြိုင်တယ်ဆိုတာ ဘယ်လိုမှ ယုတ္တိမရှိဘူးလို့ တပ်အရာရှိဟောင်းတစ်ဦးက ပြောပါတယ်။
ဗိုလ်ချုပ်မှူးကြီးသန်းရွှေစီစဉ်တဲ့ ၂၀၁၀ရွေးကောက်ပွဲကစလို့ ရွေးကောက်ပွဲနီးရင် တပ်အရာရှိအများအပြားကို အနားပေးပြီး ကြံ့ခိုင်ရေးပါတီကနေ ဝင်ပြိုင်ခိုင်းတာဟာ ဓလေ့တစ်ခုလိုတောင် ဖြစ်နေပါပြီ။
ဗိုလ်ချုပ်မှူးကြီးမင်းအောင်လှိုင်စီစဉ်တဲ့ အခု ၂၀၂၅ရွေးကောက်ပွဲမှာလည်း ဗိုလ်ချုပ်ကြီးတွေ၊ ဒုဗိုလ်ချုပ်ကြီးတွေနဲ့ တပ်အရာရှိအများအပြားကို ကြံ့ခိုင်ရေးပါတီကနေ ဝင်ပြိုင်ခိုင်းထားပါတယ်။
လက်ရှိ စစ်ခေါင်းဆောင်စီစဉ်တဲ့ ရွေးကောက်ပွဲဟာ သူ့ဆရာဗိုလ်ချုပ်မှူးကြီးသန်းရွှေရဲ့ ၂၀၁၀ရွေးကောက်ပွဲအခင်းအကျင်းနဲ့ ဆင်တူတယ်လို့ စစ်တပ်ထဲမှာ နှစ် ၂၀တာဝန်ထမ်းခဲ့တဲ့ CDM တပ်အရာရှိတစ်ဦးက ပြောပါတယ်။
စထွန်းအောင်/Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် https://myanmar-now.org/mm/members/ တွင် ကူညီနိုင်ပါသည်။
