ခုခံတော်လှန်မှုအားကောင်းပြီး တော်လှန်ရေးတပ်တွေ နယ်မြေစိုးမိုးမှု အများအပြားရထားတဲ့ စစ်ကိုင်းတိုင်းထဲက ၁၀မြို့နယ်ထက်မနည်းမှာ စစ်တပ်က အင်အားအလုံးအရင်းသုံးပြီး မြေပြင်၊ ဝေဟင်ကနေ ထိုးစစ်ဆင်နေတာကြောင့် တော်လှန်ရေးတပ်ဖွဲ့တွေဟာ လက်နက်၊ ခဲယမ်းမပြည့်စုံတဲ့ကြားကနေ ခုခံကာကွယ်နေရပါတယ်။
ဇူလိုင်လကုန်ပိုင်းကစပြီး စစ်ကိုင်းတိုင်းထဲက စစ်ကိုင်း၊ ပုလဲ၊ မုံရွာ၊ ချောင်းဦး၊ အရာတော်၊ ဝက်လက်၊ ကန့်ဘလူ၊ တန့်ဆည်၊ ရေဦး၊ ရွှေဘိုစတဲ့ မြို့နယ်တွေမှာ ဖြန့်ကျက်ပြီး စစ်တပ်က စစ်ကြောင်းထိုးလာတာပါ။
လေယာဉ်နဲ့ ဗုံးကြဲတာအပြင် တင့်ကားတွေ၊ ဟောင်ဝစ်ဇာ အမြောက်တွေနဲ့ပါ တိုက်ခိုက်နေတဲ့ စစ်တပ်ရဲ့ စစ်ကြောင်းတွေကို တော်လှန်ရေးတပ်တွေဘက်က လက်နက်၊ ခဲယမ်း မလုံလောက်မှုကြောင့် အလုံးစုံ ဟန့်တား၊ ဖြတ်တောက်နိုင်တဲ့ အခြေအနေ မရှိသေးပါဘူး။
မြို့နယ်ပေါင်း ၃၇မြို့နယ်ရှိတဲ့ စစ်ကိုင်းတိုင်းမှာ စစ်တပ်က မြို့တွေကိုသာ အဓိက ထိန်းချုပ်နိုင်ပြီး၊ ကျေးလက်ဒေသအများစုကိုတော့ တော်လှန်ရေးတပ်တွေက နယ်မြေစိုးမိုးမှု ရထားတာပါ။
ရွေးကောက်ပွဲကျင်းပဖို့ ၄လကျော်အလိုမှာ ဆုံးရှုံးထားတဲ့နယ်မြေတွေကို ပြန်ထိန်းချုပ်ဖို့ စစ်တပ်က အင်အားအများအပြားနဲ့ တိုက်ခိုက်လာတာကြောင့် တော်လှန်ရေးတပ်တွေဘက်က နယ်မြေတချို့ ပြန်ဆုတ်ပေးလိုက်ရတာတွေလည်း ရှိနေပါတယ်။
ကိုလှိုင်း/ Myanmar Now
