စစ်ကြောရေးရဲ့ နှိပ်စက်ညှင်းပန်းမှုဒဏ်ကို ခံခဲ့ရတဲ့အပြင် အကျဉ်းထောင်အတွင်း လုံလောက်တဲ့ ဆေးဝါးကုသခွင့်မရခဲ့တာကြောင့် နိုင်ငံရေးအကျဉ်းသူတစ်ဦးဖြစ်သူ ဒဂုံတက္ကသိုလ် ကျောင်းသားများသမဂ္ဂ တွဲဖက်အတွင်းရေးမှူး ဖြစ်တဲ့ အသက် ၂၆နှစ်အရွယ် မဝတ်ရည်အောင်ဟာ ဇူလိုင်လ (၂၀ ) ရက်နေ့က အင်းစိန်ထောင်ထဲမှာ သေဆုံးခဲ့ရပါတယ်။
စစ်အာဏာသိမ်းမှုကို ဆန့်ကျင်ရာမှာ တက်တက်ကြွကြွ ပါဝင်ခဲ့တဲ့ မဝတ်ရည်အောင်ကို ၂၀၂၁ခုနှစ်၊ စက်တင်ဘာ ၁၄ရက်နေ့က ရန်ကုန်၊ ကျောက်တံတားမြို့နယ်မှာ စစ်ကောင်စီတပ်က ဖမ်းဆီးခဲ့တာပါ။
စစ်ကြောရေးမှာ ဦးခေါင်းဒဏ်ရာရခဲ့တဲ့ မဝတ်ရည်အောင်ဟာ နာမည်ဆိုးနဲ့ကျော်ကြားတဲ့ အင်းစိန်ထောင်နဲ့ ပဲခူးတိုင်း၊ ဒိုက်ဦးထောင်တို့မှာ စုစုပေါင်း ထောင် ၇နှစ် ချမှတ်ခံခဲ့ရပြီး၊ လုံလောက်တဲ့ ဆေးဝါးကုသခွင့် မရတာကြောင့် အသက်ဆုံးရှုံးခဲ့ရတာပါ။
ကျန်းမာရေးအခြေအနေဆိုးဝါးနေတဲ့ မဝတ်ရည်အောင်ကို အကျဉ်းဦးစီးဌာနက လုံလောက်တဲ့ဆေးဝါးကုသခွင့်ကို မပေးခဲ့ဘူးလို့ နိုင်ငံရေးအကျဉ်းသူဟောင်းတစ်ဦးဖြစ်တဲ့ မသူဇာက ပြောပြပါတယ်။
၂၀၂၁ ခုနှစ် စက်တင်ဘာလအတွင်း ဖမ်းဆီးခံရပြီး ထောင် ၂နှစ်ကျခဲ့တဲ့ မသူဇာဟာ ရန်ကုန်အင်းစိန်ထောင်မှာ မဝတ်ရည်အောင်နဲ့အတူ နေထိုင်ခဲ့ရပါတယ်။
အဲ့ဒီကာလက နိုင်ကျဉ်းအမျိုးသမီးတွေအတွက် စိတ်ပိုင်း၊ ရုပ်ပိုင်းဆိုင်ရာ ခွန်းအားတွေပေးခဲ့တဲ့ မဝတ်ရည်အောင်တစ်ယောက် အကျဉ်းထောင်ထဲမှာ ဘယ်လိုဖြတ်သန်းခဲ့ပါသလဲ။ သူနဲ့အတူ အနီးကပ်နေထိုင်ခဲ့ဖူးတဲ့ နိုင်ငံရေးအကျဉ်းသားဟောင်းလည်းဖြစ်၊ သတင်းထောက်ဟောင်းတစ်ဦးလည်းဖြစ်တဲ့ မသူဇာကို Myanmar Now က ဆက်သွယ်မေးမြန်းထားပါတယ်။
ကိုလှိုင်း/ Myanmar Now
