လွန်ခဲ့သည့် ၂၅ နှစ်က အာဏာရှင် ဗိုလ်ချုပ်မှူးကြီးဟောင်းသန်းရွှေ အုပ်ချုပ်သည့် မြန်မာနိုင်ငံအပေါ် အပြည်ပြည်ဆိုင်ရာအလုပ်သမားအဖွဲ့ချုပ်(ILO)၏ ဖွဲ့စည်းပုံဥပဒေ ပုဒ်မ ၃၃ အရ အရေးယူခြင်းသည် စစ်ကောင်စီလက်ထက်တွင် သမိုင်းတစ်ကျော့ ပြန်လည်လာခဲ့သည်။
၁၉၈၈ ခုနှစ် အာဏာသိမ်းဗိုလ်ချုပ်ကြီးများက တောင်သူလယ်သမား၊ အလုပ်သမားများနှင့် ပြည်သူလူထုတစ်ရပ်လုံးကို တစ်အိမ် တစ်ယောက် လုပ်အားပေးစေခိုင်းခြင်းအပါအဝင် အမျိုးမျိုးသော အဓမ္မခိုင်းစေမှုများကြောင့် ၂၀၀၀ ပြည့် နှစ် ဇွန် ၁၄ ရက်နေ့တွင် ILO က မြန်မာနိုင်ငံကို ပထမဆုံးအကြိမ် ပိတ်ဆို့အရေးယူခဲ့သည်။
၂၀၂၁ ခုနှစ် ဖေဖော်ဝါရီ ၁ ရက်နေ့တွင် NLD ဦးဆောင်သော အရပ်သားအစိုးရကို ဖြုတ်ချကာ အာဏာ သိမ်းခဲ့သည့် အာဏာရှင်လက်သစ် ဗိုလ်ချုပ်မှူးကြီးမင်းအောင်လှိုင်လက်ထက်တွင် ယခုလ ၅ ရက်နေ့ တွင် ILO က မြန်မာကို ဒုတိယအကြိမ် အရေးယူခြင်း ဖြစ်သည်။
ILO အရေးယူမှုတွင် စစ်ကောင်စီ အထိနာစေမည့် ဝင်ငွေရလမ်းပိတ်ဆို့ရေး၊ လက်နက်နှင့် လေယာဉ်ဆီဖြတ်တောက်ရေးတို့ ပါဝင်သည်။ ဝင်ငွေနည်း အလုပ်သမားများလည်း ထိမည် ဖြစ်သည်။
ကြံခိုင်ရေးပါတီ၏ လက်ရှိ ထိပ်သီးခေါင်းဆောင်တစ်ဦးလည်းဖြစ်၊ ဦးသိန်းစိန်အစိုးရလက်ထက် အလုပ်သမားဝန်ကြီးလည်းဖြစ်ခဲ့သူ ဦးမောင်မြင့် ခေါ် မင်းကင်းမောင်မြင့်က နိုင်ငံတကာအသိုင်းအဝန်း ဖယ်ကျဉ်ခံထားရသည့် စစ်ကောင်စီသည် ILO ညီလာခံတွင် သံတမန်ရေးအရ အသိမှတ်ပြုမခံရ၍ ကြီးမားစွာ ဆုံးရှုံးနေကြောင်း၊ ယခုအရေးယူမှုမှာ ပေါ့ပေါ့တန်တန်မဟုတ်ကြောင်း ပြောဆိုထားသည်။
