‘ဝ’ ကို ထိန်းချုပ်ပြီး ရှမ်းမြောက်စစ်ရေးချိန်ခွင်လျှာညှိလာသော တရုတ်စွက်ဖက်မှု

တိုင်းရင်းသားလက်နက်ကိုင်အဖွဲ့များထဲတွင် လျှို့ဝှက်သိုသိပ်လွန်းလှပြီး၊ အထူးသဖြင့် အဖွဲ့တွင်း အရေးကြီး ကိစ္စရပ်များကို အများပြည်သူသို့ ထုတ်ပြန်အသိပေးသည့် သမိုင်းကြောင်း အလျဉ်းမရှိခဲ့ဖူးသော UWSA သည် တရုတ်နိုင်ငံ၏ ဖိအားများကြောင့် ဆယ်စုနှစ် လေး ခု အတွင်း ၎င်းတို့၏ “ရှင်သန်ရပ်တည်မှုဆိုင်ရာ အဆိုးရွားဆုံး အကျပ်အတည်း”နှင့် ရင်ဆိုင်နေရသည် ဟု ထုတ်ဖော်ပြောဆိုလာခြင်းက ထူးခြားသည်။  

စင်စစ် လွန်ခဲ့သောနှစ်၊ ယခုလို ဩဂုတ်လ၊ ၂၇ ရက်နေ့၌ ယူနန်ပြည်နယ်တောင်ပိုင်း၊ ဖူအာမြို့ (Pu’er City) တွင် တရုတ်နိုင်ငံခြားရေးဝန်ကြီးဌာန၊ အာရှရေးရာ အထူးကိုယ်စားလှယ် တိန့်ရှီကျွင်း နှင့် UWSA ဒု-ဥက္ကဌ ကျောက်ကော်အန်း ဦးဆောင်သည့်အဖွဲ့ တွေ့ဆုံခဲ့ကြသည့် လျှို့ဝှက်အစည်းအဝေးမှတ်တမ်း အသေးစိတ် အချက်အလက်များကို Myanmar Now က ဦးစွာလက်ခံရရှိခဲ့ချိန်က၊ ပေါက်ကြားရိုးထုံးစံမရှိဖူးသော UWSA ၏ အလွန်အရေးကြီးသည့် လျှို့ဝှက်မှတ်တမ်း ပေါက်ကြားခဲ့ခြင်းကြောင့် အစစ်အမှန် ဟုတ်၊ မဟုတ် သတိထားစိစစ် ဖော်ပြခဲ့ရသည်။ 

ထိုအချိန်ကတည်းက တရုတ်အစိုးရသည် UWSA ကို အပြင်းအထန် ဖိအားပေးနေခဲ့သည့်အချက်အား လူသိရှင်ကြား သိရှိထားပြီး ဖြစ်သည်။ ယခုတစ်ဖန် တရုတ်ဖိအားကြောင့်ပင် တစ်နှစ်နီးပါးအကြာ ဩဂုတ်လ၊ ၂၀ ရက်နေ့တွင် ကျောက်ကော်အန်း က လက်နက်နှင့် ငွေကြေးအကူအညီ မပေးတော့ဟု MNDAA ၊ TNLA နှင့် SSA-N ခေါင်းဆောင်များကို အသိပေးခဲ့ခြင်း ဖြစ်သည်။

ထိုဆုံးဖြတ်ချက်ကို ထုတ်ဖော်ပြောဆိုလာခြင်း အပြုအမူ နောက်ကွယ်မှ ရည်ရွယ်ချက်ကို ဆန်းစစ်ရန် လိုအပ် ပါသည်။ အများဝေဖန်နေကြသလို တရုတ်ဖိအားကြောင့် ဆိုသည်က သိသာထင်ရှားသော အချက်ဖြစ်သည်။ သို့သော် အကူအညီပေးခဲ့ချိန်တုန်းက လူသိမခံနိုင်သော ထိပ်တန်းလျှို့ဝှက် စစ်ရေးကိစ္စရပ်ကို၊ အကူအညီ ပေးမှု ရပ်တန့်ချိန်မှ လူသိရှင်ကြား ကြေညာခဲ့သည် အပြုအမူက စိတ်ဝင်စားစရာ ဖြစ်နေပါသည်။ 

ဤတစ်ကြိမ် ကျောက်ကော်အန်း ပြောကြားချက်များထဲမှ ထူးခြားသော အချက်အလက်အသစ်မှာ တရုတ် နိုင်ငံအတွင်းရှိ UWSA အဖွဲ့အစည်းနှင့် ခေါင်းဆောင်များ၏  တရုတ်ယွမ်ငွေ ဘီလီယံပေါင်းများစွာ” တန်ဖိုးရှိသော ပိုင်ဆိုင်မှုများကို တရုတ်အစိုးရ သိမ်းဆည်းထားသည့်အချက် ဖြစ်သည်။ 

ထိုပြောဆိုချက် မှန်ကန်ပါက တရုတ်၏ အသံတိတ် အနိုင်ကျင့်မှု (China’s silent bullying) ကို UWSA ခေါင်းဆောင်များ မခံနိုင်တော့သည့်အဆုံး ယခုလို လူသိရှင်ကြား ထုတ်ဖော်ပြောဆိုလာခြင်း ဖြစ်နိုင်ပါသည်။  

နောက်ဆက်တွဲ ဆင်ခြင်စရာ အကြောင်းရင်းတစ်ခုမှာ UWSA ခေါင်းဆောင်များသည် တရုတ်ခေါင်းဆောင်များ ခိုင်းသည့်အတိုင်း အစည်းအဝေးခေါ်ယူ၍ MNDAA ၊ TNLA နှင့် SSA-N တို့ကို စစ်ရေးအကူအညီ ဖြတ်တောက်ကြောင်း လူသိရှင်ကြား အသိပေးကြေညာခြင်းသည် ၎င်းတို့၏ပိုင်ဆိုင်မှုများ ပြန်လည်ရရှိရေး အတွက် ကာလရှည်ကြာ စစ်ရေးနှင့်နိုင်ငံရေး ညီနောင်မဟာမိတ်များအဖြစ် လက်တွဲ ရပ်တည်ခဲ့သော ရပ်တည်ချက်ကို UWSA အလဲအလှယ်ပြုလုပ်လိုက်ပြီလားဟု မေးခွန်းထုတ်စရာ ဖြစ်လာပါသည်။  

မြန်မာ့နိုင်ငံရေးပြဿနာများထဲ တရုတ်အစိုးရ ဝင်ရောက်စွက်ဖက်နေခဲ့သည်မှာ မသိမသာ အခြေအနေမှ ယခု အခါ သိသိသာသာ ပြောင်ပြောင်တင်းတင်း ဖြစ်လာနေပြီ ဖြစ်သည်။ သို့ရာတွင် အမျိုးသားညီညွတ်ရေးအစိုးရ (NUG) နှင့် တိုင်းရင်းသား လက်နက်ကိုင်တော်လှန်ရေးအဖွဲ့များ (EROs) တွင် တရုတ်၏ စွက်ဖက်မှုများကို ပြတ်သားစွာ တုံ့ပြန်မည့် မူဝါဒတစ်ရပ် ရှိမနေခြင်းက အကြီးမားဆုံး စိန်ခေါ်ချက် ဖြစ်နေသည်။

တော်လှန်ရေးအင်အားစုများအကြား တရုတ်စွက်ဖက်မှုကြောင့် ရင်ဆိုင်နေရသော စိန်ခေါ်မှု မည်မျှ ကြီးမားနေသနည်းဆိုလျှင် “စစ်အာဏာရှင်စနစ် ချုပ်ငြိမ်းရေး” မြန်မာပြည်သူများ ဆင်နွှဲနေသော နွေဦးတော်လှန်ရေး တစ်ခုလုံး ယခုအခါ ကြီးစွာသော အဟန့်အတားနှင့် ကြုံတွေ့နေရပြီး၊ ဟန့်တားတုံ့ပြန်နိုင်ခြင်း မရှိပါက တော်လှန်ရေးရည်မှန်းချက်များ ထိခိုက်ပျက်စီးသည်အထိ အန္တရာယ်ကြီးမားပါသည်။