ကရင်ရွာများကို စစ်ကောင်စီက လေယာဉ်ဖြင့် ဗုံးကြဲတိုက်ခိုက် 

ကရင်ပြည်နယ် ဖာပွန်ခရိုင်အတွင်း ကရင်အမျိုးသားအစည်းအရုံး (KNU/ KNLA) တပ်မဟာ ၅ လှုပ်ရှားနယ်မြေအတွင်းရှိ ကရင်ရွာများကို အာဏာသိမ်းစစ်ကောင်စီက ယနေ့(ဧပြီ ၂၇ ) မွန်းလွဲပိုင်းတွင် လေယာဉ်ဖြင့် ဗုံးကြဲတိုက်ခိုက်ခဲ့သည်။

ယနေ့ နံနက်အစောပိုင်းက ထိုင်း − မြန်မာနယ်စပ် သော်လဲထာရှိ စစ်ကောင်စီတပ်စခန်းကို KNU တပ်မဟာ ၅ က တိုက်ခိုက်သိမ်းပိုက်ခဲ့ပြီးနောက် ထိုသို့ လေယာဉ်ဖြင့် ဗုံးကြဲတိုက်ခိုက်ခဲ့ခြင်းဖြစ်သည်။

နေ့လယ် ၁ နာရီဝန်းကျင်တွင် သောလယ်ထာစခန်းနှင့် ၁၀ မိုင်အကွာရှိ ဒါးကွယ်ဒေသ ကရင်ကျေးရွာကို စစ်ကောင်စီက လေယာဉ်ဖြင့် ဗုံးကြဲတိုက်ခိုက်ခဲ့ခြင်းဖြစ်သည်ဟု တပ်မဟာ ၅ ပြောရေးဆိုခွင့်ရှိသူ ဖဒိုမန်းမန်းက Myanmar Now ကို ပြောသည်။

“ရွာသားတွေကို မရှောင်ဘဲ ရွာတွေနဲ့အနီးအနားကို ဗုံးကြဲတာကတော့ ရွာသားတွေအတွက် တော်တော်လေးစိုးရိမ်တယ်” ဟု ဖဒိုမန်းမန်းက ပြောသည်။ 

သတင်းလွတ်လပ်ခွင့်ကို ကူညီပါ အမှန်တရား ကိုထုတ်ဖော်နိုင်ရန်အတွက်သင်၏ ပါဝင်ကူညီမှုသည် အရေး ပါပါသည်။

လစဉ် နှစ်စဉ်

$4 $10 $20

$40 $100 $200

ပါဝင်လိုက်ပါ လိုသလိုအချိန်မရွေး ဖျက်သိမ်းနိုင်ပါသည်။​

စစ်ကောင်စီက ဗုံးကြဲတိုက်ခိုက်ခဲ့သော ကရင်ရွာသည် လူဦးရေ ၂၀၀ နီးပါးနေထိုင်ပြီး စစ်ကောင်စီ၏ လေကြောင်းတိုက်ခိုက်မှုကြောင့် ထွက်ပြေးတိမ်းရှောင်နေရကြောင်း၊ လက်ရှိတွင် ထိခိုက်ဒဏ်ရာရရှိမှုအခြေအနေကို မသိရသေးကြောင်းလည်း ၎င်းက ပြောသည်။ 

ပြီးခဲ့သည် မတ် ၂၇ က ကရင်ပြည်နယ် မူတရော်ခရိုင်အတွင်းရှိ စစ်ကောင်စီ၏ နယ်စပ်စခန်းတစ်ခုဖြစ်သော သီးမူထာစခန်းကို KNU တပ်မဟာ ၅ က တိုက်ခိုက်ပြီးနောက် ထိုသို့ လေယာဉ်ဖြင့် ဗုံးကြဲတိုက်ခိုက်ခဲ့သည်။ 

တနင်္သာရီတိုင်း၊ မွန်ပြည်နယ်၊ ကရင်ပြည်နယ်နှင့် ပဲခူးတိုင်းအတွင်းရှိ KNU ထိန်းချုပ်ဒေသများတွင် အာဏာသိမ်းစစ်တပ်နှင့် စစ်ရေးအခြေအနေတင်းမာလျက်ရှိရာ ပြည်သူများအတွက် အနှောင့်အယှက်ဖြစ်စေသော၊ ခြောက်လှန့်ပစ်ခတ်နေသော စစ်ကောင်စီတပ်စခန်းများကို ထပ်မံတိုက်ခိုက်မည်ဖြစ်ကြောင်း KNU ယနေ့တွင် ကြေညာချက်ထုတ်ပြန်ထားသည်။