အာဏာသိမ်းစစ်တပ်ဟာ ရာနှင့်ချီတဲ့ လမ်းသွားလမ်းလာလူငယ်တွေကို ဖမ်းဆီးပြီး သူတို့ အသက်သွင်းထားတဲ့ စစ်မှုထမ်းဥပဒေနဲ့ အတင်းအကျပ်စစ်ထဲသွင်းနေကြောင်း စစ်ကောင်စီ ကိုးကွယ်တဲ့ ပြည်သူ့စစ်ခေါင်းဆောင် သင်္ကန်းဝတ်တစ်ပါးက ဝန်ခံလိုက်ပါတယ်။
ပြီးခဲ့တဲ့ သြဂုတ်လ ၁၆ရက်က မန္တလေးတိုင်း၊ တံတားဦးမြို့နယ်မှာ အရပ်သား အယောက် (၁၀၀) နီးပါး ကို စစ်တပ်က ပေါ်တာဆွဲခဲ့ ပြီး အဲ့ဒီအထဲက သူရဲ့ မိတ်ဆွေတွေ အပါအဝင် (၄၅)ယောက် ကို စစ်သင်တန်းကို အတင်းအကျပ်ပို့ခဲ့ကြောင်း ‘ပေါက်ကိုယ်တော်’ အမည်ရသူက ပြောပါတယ်။
ပေါက်ကိုယ်တော်ရဲ့ ပြောကြားချက်ဟာ အတင်းအဓမ္မစစ်မှုထမ်းခိုင်းနေတယ်လို့ စွပ်စွဲချက်တွေအပေါ် စစ်ကောင်စီ ပြည်သူ့စစ်ခေါင်းဆောင်တစ်ဦးရဲ့ ရှားရှားပါးပါးဝန်ခံမှုလည်း ဖြစ်ပါတယ်။
အာဏာသိမ်း စစ်တပ်ရဲ့ လမ်းမပေါ်က ပေါ်တာဆွဲတဲ့ သတင်းတွေကို သတင်းဌာနတွေက ထုတ်ဖော်ရေးသားခဲ့ပေမယ့် လုပ်ကြံဖန်တီးတဲ့သတင်းတွေသာဖြစ်ကြောင်း စစ်တပ်က မကြာခဏ တုန့်ပြန်လေ့ရှိပါတယ်။
