စစ်ကိုင်းတိုင်းရှိ ရွာပေါင်းမြောက်မြားစွာ မီးတင်ရှို့ခံရသည့် ဖြစ်စဉ်များတွင် စစ်ကောင်စီတပ်များက ကျူးလွန်ကြောင်း ခိုင်မာသည့် ရုပ်သံအထောက်အထားများကို Myanmar Now က ယမန်နှစ်ကစ၍ ရရှိခဲ့သည်။ စစ်ကိုင်းတိုင်း၊ ဆားလင်းကြီးမြို့နှင့် မကွေးတိုင်း၊ ရေစကြိုမြို့ရှိ ရွာများကို စစ်ကောင်စီတပ်များက မီးရှို့နေသည့် အထောက်အထားများဖြစ်သည်။ ၂၀၂၁ ဖေဖော်ဝါ ၁ တွင် စစ်တပ်အာဏာသိမ်းမှုကို ကြုံရချိန် နိုင်ငံတစ်ဝန်းရှိ ဆန့်ကျင်သူများကို စစ်တပ်က ပစ်ခတ်သတ်ဖြတ်မှုများပြုလာရာ မခံနိုင်တော့သည့် ပြည်သူများက လက်နက်ကိုင် ခုခံတွန်းလှန်ခဲ့ကြသည်။ လက်နက်ကိုင်ခုခံမှုများ နိုင်ငံအနှံ့ ပေါ်ပေါက်လာချိန် စစ်ကောင်စီတပ်ကလည်း ရွာစဉ်လှည့်စစ်ကြောင်းထိုးရင်း မြေလှန်မီးရှို့သည့်ဗျူဟာကို အကြမ်းပတမ်းသုံးစွဲလာခဲ့ခြင်းဖြစ်သည်။ ၎င်းတို့ကို ဆန့်ကျင်သူများအပေါ် စစ်တပ်က ဖြတ် ၄ ဖြတ်ဗျူဟာဟု လူသိများသည့် သတင်းဖြတ်၊ ရိက္ခာဖြတ်၊ လူသစ်စုဆောင်းမှုကို ဖြတ်တောက်ခြင်းနှင့် ဝင်ငွေရလမ်း/ရန်ပုံငွေ ဖြတ်တောက်ခြင်းတို့ကို ယခင်ကတည်းက သုံးစွဲခဲ့သလို အာဏာသိမ်းမှုဆန့်ကျင်သူများအပေါ်တွင်လည်း ဆက်တိုက်သုံးစွဲနေသည်။ သတင်း၊ တင်ဆက် – မောင်ရွှေဝါ၊ ဟန်သစ်
