ရှမ်းပြည်နယ်မြောက်ပိုင်းမှ အကြီးဆုံးမြို့ဖြစ်သည့် လားရှိုးမြို့တွင် မြို့တွင်းတိုက်ပွဲများ ဆက်လက်ပြင်းထန်နေပြီး မြို့ဧရိယာထက်ဝက်နီးပါးနှင့် လားရှိုးလေယာဉ်ကွင်းကို MNDAA ကိုးကန့်တပ်က ထိန်းချုပ်ထားလိုက်ကြောင်း ဒေသခံတို့က ဆိုသည်။ ယနေ့နံနက်ပိုင်းတွင် မြို့ပေါ်ရှိ ရပ်ကွက် အမှတ် ၁၊ ၂၊ ၃ နှင့် ၁၂၊ မန်ဆူဘုရားအနီး၊ လားရှိုးမြို့တော်ခန်းမနှင့် လားရှိုးဆေးရုံအနီးတို့တွင် တိုက်ပွဲများ ပြင်းထန်နေသည်။ လားရှိုးမြို့လယ် ပြည်သူ့ဆေးရုံကြီးရှေ့တည့်တည့်တွင် တည်ရှိသော စစ်တပ်ပိုင် အင်းဝဘဏ်ရှေ့တွင် စစ်ကောင်စီတပ်သားတစ်ဦး သွေးအိုင်ထဲ၌ သေဆုံးနေပြီး ကိုးကန့်တပ်သားများက ထိုနေရာတွင် လှုပ်ရှားသွားလာနေသည်ကို ယနေ့ ပျံ့နှံ့လာသည့် ရုပ်သံဖိုင်ထဲတွင် မြင်တွေ့ရသည်။ လားရှိုးမြို့လယ်ကောင်တွင် ပြည်သူ့ဆေးရုံ၊ အင်းဝဘဏ်၊ လားရှိုးရဲစခန်း၊ မီးသတ်ဌာနနှင့် အစိုးရရုံးများ တည်ရှိသည်။
