ခုခံတော်လှန်မှုအားကောင်းသည့် ချင်းပြည်နယ်ရှိ ဆေးရုံ၊ ဆေးခန်းများကို ပစ်မှတ်ထားကာ စစ်ကောင်စီလေတပ်က ယခုရက်ပိုင်းအတွင်း ဆက်တိုက် ဗုံးကြဲတိုက်ခိုက်နေသည်။ ကန်ပက်လက်မြို့နယ်၊ လွန်ဒုံရွာ ဆေးပေးခန်းကို ဧပြီ ၂၈ မွန်းလွဲပိုင်းက တိုက်ခိုက်ပြီး မိနစ်ပိုင်းအကြာမှာပင် မြို့နယ်ချင်းကပ်လျက် မင်းတပ်မြို့နယ်မှ ဝမ္မသူးဆေးရုံကိုလည်း လေကြောင်းမှ ဗုံးကြဲခဲ့သည်။ မင်းတပ်မြို့၊ မြောက်ဘက် မိုင် ၂၀ ကျော်အကွာရှိ ဝမ္မသူးတိုက်နယ်ဆေးရုံသည် သုံးရက်အတွင်း နှစ်ကြိမ်မြောက် တိုက်ခိုက်ခံရခြင်းဖြစ်သည်။ ဝမ္မသူးဆေးရုံသည် ဧပြီ ၂၅ ရက် ညပိုင်းကလည်း လေကြောင်းမှ တိုက်ခိုက်ခံရသဖြင့် လူနာ ၄ ဦးနှင့် လူနာစောင့် ၁ ဦး သေဆုံးခဲ့သည်။ “ဆေးရုံမှာက ဘယ်သူမှ မရှိတော့ဘူး။ ဘာမှလည်း ရစရာမရှိတော့ဘူး။ အဲ့ဒါကိုပဲ ထပ်ကြဲသွားတာ။ ဆေးရုံရဲ့ မုခ်ဦးရှေ့က အလံတိုင်စိုက်ထားတဲ့ အုတ်မြစ်လေးရှိတယ်။ အဲ့ဒီအုတ်မြစ်က အမြစ်ကနေ ကျွတ်ထွက်သွားပြီး တွင်းကြီး ဖြစ်သွားတယ်” ဟု မင်းတပ်မြို့နယ်၊ ပြည်သူ့အုပ်ချုပ်ရေးအဖွဲ့ ပြောရေးဆိုခွင့်ရှိသူ ဆလိုင်းယောမန်က ပြောသည်။
