မြောက်ပိုင်းမဟာမိတ် ၃ ဖွဲ့ဦးဆောင်တဲ့ ၁၀၂၇ စစ်ဆင်ရေးကို အာဏာသိမ်းစစ်ကောင်စီက ကျူးကျော်စစ်လို့ သုံးနှုန်းလိုက်ပြီးတဲ့နောက် စစ်တပ်ထောက်ပံ့ထားတဲ့ အမျိုးသားရေးသမားဆိုသူတွေဟာ တရုတ်သံရုံးအထိ တရုတ်ဆန့်ကျင်ရေးလှုပ်ရှားမှုတွေ ပေါ်ပေါ်ထင်ထင်လုပ်လာပါတယ်။ စစ်တပ်က ကာလကြာ ထောက်ပံ့ထားတဲ့ အသွင်ပြောင်းမဘသတွေက တစ်နိုင်ငံလုံးက မြို့ ၈ မြို့မှာ တရုတ်ဆန့်ကျင်ရေးလှုပ်ရှားမှုပေါင်း ဆယ်နဲ့ချီပြီး ဆက်တိုက်လုပ်နေတာပါ။ အာဏာသိမ်းမှုကို ဆန့်ကျင်ကြောင်း လမ်းပေါ်ထွက် ဆန္ဒမပြရဲလောက်အောင် အကြမ်းဖက်မှုမျိုးစုံနဲ့ စစ်ကောင်စီက နှိပ်ကွပ်နေချိန်မှာ တမင်ခွင့်ပြုထားတဲ့ တရုတ်ဆန့်ကျင်ရေးလှုပ်ရှားမှုတွေဟာ မင်းအောင်လှိုင်ရဲ့ စေခိုင်းမှု သို့တည်းမဟုတ် မီးစိမ်းပြမှုကြောင့်သာ ဖြစ်တယ်ဆိုတာ ထင်ရှားပါတယ်။ သတင်း၊ တင်ဆက် – ကိုချို၊ ဟန်သစ်
