မန္တလေးတိုင်း၊ မြင်းခြံခရိုင်အတွင်းရှိ ကျေးရွာတစ်ရွာမှ အုပ်ချုပ်ရေးမှူး သေနတ်ပစ်ခံရကာ သေဆုံးပြီးနောက်တွင် ဒေသခံအမျိုးသား ၃ ဦးကို စစ်တပ်က သတ်ဖြတ်လိုက်သည်။
မြင်းခြံမြို့တောင်ဘက် ၃ မိုင်ခန့်အကွာ ဂျုပ္ပင် (ဂျုပ်ပင်) ရွာ အုပ်ချုပ်ရေးမှူးဖြစ်သူ အသက် ၅၀ အရွယ် ဦးဝင်းလှိုင်မှာ ယခုလ ၁၀ ရက်နေ့က နေအိမ်တွင် ရှိနေစဉ် သေနတ်ဖြင့် ပစ်ခတ် လုပ်ကြံခံရသည်။
စစ်တပ် ကျောထောက်နောက်ခံ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ ရပ်ကျေးဥက္ကဋ္ဌလည်းဖြစ်သူ ဦးဝင်းလှိုင် အသတ်ခံရပြီးနောက် ရွာကို စစ်တပ်ရောက်လာကာ ထင်တိုင်းကြဲခဲ့ခြင်းဖြစ်သည်။
စက်တင်ဘာ ၁၂ ရက်၊ ညသန်းခေါင်ခန့်တွင် ကျေးရွာအရှေ့ဘက်သို့ စစ်ကောင်စီ ကားတစ်စီး ရောက်လာပြီးနောက် သေနတ်သံ သုံးချက် ကြားခဲ့ရကြောင်း၊ နံနက်မိုးလင်းမှ ရွာသားများ အပြင်စူးစမ်းစဉ် ရွာအရှေ့ဘက် ယာခင်းထဲ၌ အမည်မသိ ၃ ဦး လဲကျသေဆုံးနေသည်ကို အဝေးမှ တွေ့ရကြောင်း ဂျုပ္ပင်ကျေးရွာခံ အမျိုးသားတစ်ဦးက ပြောသည်။
ထိုနေ့ နံနက် ၈ နာရီခန့်တွင် အလောင်း ၃ လောင်းကို မော်တော်ယာဉ်ပေါ်တင်ကာ စစ်သားများ ပြန်ထွက်သွားကြကြောင်း၊ စစ်ကောင်စီရန်ကြောင့် အနီးမကပ်ဝံ့သဖြင့် သေဆုံးသူများ မည်သူမည်ဝါဖြစ်သည်ကို မသိရကြောင်း ၎င်းက ဆက်ပြောသည်။
“ရှေ့က ဖြစ်ထားတာတွေရောဆိုတော့ ကြောက်လန့်နေတာ။ ဘယ်သူမှ အနီးကပ်မကြည့်ရဲဘူး၊ သုံးယောက်တည်းက တစ်ယောက်က မနက်ထိ မသေသေးဘူး။ လက်လေး (လှုပ်) ပြနေတာကို အဝေးက မြင်နေရတယ်”။
စစ်ကောင်စီခန့်အုပ်ကြီး သတ်ဖြတ်ခံရသဖြင့် ဂျုပ္ပင်ကျေးရွာရှိ ပြည်သူများကို စစ်တပ်က ခြိမ်းခြောက်ခြင်းဖြစ်ပြီး သေဆုံးသူများမှာ ရွာခံများမဟုတ်ဟု မြင်းခြံခရိုင်သပိတ်ကော်မတီမှ တာဝန်ရှိသူတစ်ဦးက ဆိုသည်။
“သူတို့လူ အသတ်ခံရရင် လက်စားချေသလို လုပ်ပြပြီး ပြည်သူကို ကြောက်အောင် ခြောက်ပြတဲ့လုပ်ရပ်မျိုး လုပ်တတ်တာလည်း စခ၊ ပျူတွေပဲ လုပ်တတ်တာ”။
၂၀၂၁ ဖေဖော်ဝါရီ စစ်တပ်က အာဏာသိမ်းပြီး သုံးနှစ်နီးပါးရှိလာချိန်အထိ နိုင်ငံအနှံ့ ခုခံမှုများ မြင့်မားနေသည်။ စစ်ကောင်စီလက်နက်ကိုင်အဖွဲ့များကို စခ၊ စစ်တပ်က လက်နက်ပေးထားသည့် အရပ်သားအဖွဲ့ကို ပျူစောထီး (ပျူ) ဟု တော်လှန်ရေးအင်အားစုများက သတ်မှတ် ခေါ်ဆိုကြသည်။
ဂျုပ္ပင်ရွာအနီးတွင် ယမန်နှစ် နှစ်ကုန်ပိုင်းကလည်း မြင်းခြံမြို့ခံ စစ်ကောင်စီသတင်းပေးဟု လူသိများသည့် ဦးကျော်သက်ဆိုသူကို တော်လှန်ရေးသမားများက သေနတ်ဖြင့် ပစ်သတ်ခဲ့သေးသည်။
ထိုစဉ်ကလည်း စစ်သားများက သေနတ်ဒဏ်ရာအမြောက်အမြားဖြင့် သေဆုံးနေသည့် လူငယ်အလောင်းသုံးလောင်းကို ကျေးရွာအနီး လာရောက် စွန့်ပစ်ထားခဲ့ဖူးကြောင်း အထက်ပါ ရွာခံက ဆိုသည်။
“အကြောက်တရားသွင်းတာပဲ ယူဆတယ်။ ဒီလိုလုပ်ရင် ဒီလိုပြန်သတ်မယ်ဆိုတဲ့ အကြောက်တရားပဲ”။
မန္တလေးတိုင်း ဧရာဝတီမြစ်အရှေ့ဘက်ကမ်းရှိ မြင်းခြံ၊ တောင်သာမြို့နယ်၊ နွားထိုးကြီးမြို့နယ်များတွင် စစ်ကောင်စီဒေါက်တိုင်များ လုပ်ကြံခံရပါက စစ်အုပ်စုနှင့် ပျူစောထီးများက ပတ်ဝန်းကျင်ရှိ ဒေသခံပြည်သူများကို ဖမ်းဆီးသတ်ဖြတ်ပြပြီး လက်တုံ့ပြန်လေ့ရှိသည်။
ဖမ်းဆီးသတ်ဖြတ်ခံနေရသူ အများစုမှာ စစ်တပ်က အာဏာသိမ်းကာ ဖြုတ်ချခဲ့သည့် အမျိုးသားဒီမိုကရေစီအဖွဲ့ချုပ် (NLD) ပါတီဝင်နှင့် ထောက်ခံသူများဖြစ်ကြသည်။
ထိုဒေသတွင် သတ်ဖြတ်မှုများကို အဓိကကျူးလွန်သည့် ပျူစောထီးအဖွဲ့ကို ဦးဆောင်နေသူမှာ မြင်းခြံမြို့နယ် ကြံ့ခိုင်ရေးအတွင်းရေးမှူးဖြစ်သည့် အသက် ၄၀ အရွယ် ဒေါ်သီတာယုမွန်ဖြစ်သည်ဟု ဒေသခံများက စွပ်စွဲပြောဆိုကြသည်။
အထက်ပါဖြစ်စဉ်များ၊ စွပ်စွဲချက်များအပေါ် သီးခြားအတည်မပြုနိုင်သေးသလို စစ်ကောင်စီက နှုတ်ဆိတ်နေဆဲဖြစ်သည်။
မြင်းခြံမြို့နယ်အပါအဝင် မြန်မာနိုင်ငံအလယ်ဗဟိုပိုင်း မန္တလေးတိုင်းအတွင်းမှ မြို့နယ်များတွင် စစ်ကောင်စီ၏ ဩဇာခံ စစ်သား၊ ရဲ၊ အုပ်ချုပ်ရေးမှူးနှင့် သတင်းပေး ဒလန်ဆိုသူများ မကြာခဏ ပစ်မှတ်ထား တိုက်ခိုက်ခံနေရသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
