ရန်ကုန် – ရခိုင်ပြည်နယ်၊ စစ်တွေမြို့အနောက်ဘက်က ဒုက္ခသည်စခန်းတစ်ခုမှာ အင်္ဂါနေ့နံနက်က မီးလောင်ကျွမ်းမှု ဖြစ်ပွားတဲ့အတွက် အဆောက်အအုံ ၅၅ လုံး ပျက်စီးသွားပြီး ၂,၂၉၁ ဦး အိုးမဲ့အိမ်မဲ့ဖြစ်သွားရကြောင်း ဒေသခံများထံမှ သိရပါတယ်။
မီးလောင်ပြီး တစ်နာရီကျော်အကြာမှ မီးသတ်ကားရောက်လာကြောင်း၊ ကားရောက်လာချိန်မှာ အဆောင် ၅ဝ နီးပါး မီးထဲပါသွားပြီးဖြစ်ကြောင်း စခန်းတာဝန်ခံ ဦးမျိုးလှိုင်ဝင်းကပြောပါတယ်။
“မွေးခါစကလေးတစ်ယောက် ပျောက်နေတယ်။ ခုထိ ရှာမတွေ့သေးဘူး။ ဒဏ်ရာရထားတဲ့ ၈ ဦးကိုတော့ ဆေးကုပေးနေပါတယ်” လို့ သူကပြောပါတယ်။
စစ်တွေမြို့အနောက်ဘက်အုန်းတောရပ်ကွက်အနီးမှာ တည်ရှိတဲ့ ဘုဒုဘ(၂)ဒုက္ခသည်စခန်းမှာ ခိုလှုံနေသူ ၇,၀၀၆ ဦး ရှိပါတယ်။ ဒီစခန်းမှာ နေထိုင်သူအများစုဟာ ၂၀၁၂ လူမျိုးရေး အဓိကရုဏ်းဖြစ်ခဲ့ချိန်က စစ်တွေမြို့ထဲက အောင်မင်္ဂလာ၊ နာဇီ၊ မိဇံစတဲ့ ရပ်ကွက်တွေမှာနေထိုင်တဲ့ အစ္စလာမ်ဘာသာဝင်တွေဖြစ်ကြပါတယ်။
ဒီစခန်းမှာ မီးလောင်ကျွမ်းမှုကြောင့် နေစရာမဲ့သွားသူတွေကို အာဏာပိုင်တွေက ဘုဒူဘနဲ့ အုန်းတောကြားမှာရှိတဲ့ ဈေးဆိုင်တန်းတွေမှာ လတ်တလော နေရာစီစဉ်ပေးထားပါတယ်။
မီးဘေးဒဏ်ခံရသူ မိသားစုတွေအားလုံးနေထိုင်ဖို့ မလောက်ငဘူးလို့ သိရပါတယ်။
မီးဘေးကြုံခဲ့သူတွေထဲက တစ်ဦးဖြစ်တဲ့ ဦးချစ်လှိုင်က အာဏာပိုင်တွေ သတ်မှတ်ပေးတဲ့ နေရာသစ်ကို ပြောင်းရွှေ့မှာမဟုတ်ဘူးလို့ပြောပါတယ်။
“စခန်းမှာ မီးမလောင်ဘဲကျန်နေတဲ့အမျိုးတွေရှိတယ်။ သူတိုနဲ့ပဲ နေမှာပါ။ အသစ်ချပေးတဲ့နေရာက နေလို့မဖြစ်နိုင်ဘူး” လို့သူကပြောပါတယ်။
နေရာအသစ်ကို မပြောင်းရွှေ့သူတွေဟာ အာမခံချက်မရှိဘူးလို့ အာဏာပိုင်တွေက ပြောကြောင်း စခန်းတာဝန်ခံ ဦးမျိုးလှိုင်ဝင်းက ရှင်းပြပါတယ်။
“အများစုက မလိုက်ချင်ကြဘူး။ သူတို့ကတော့ အဲဒီကိုမပြောင်းဘူးဆိုရင်၊ စာရင်းမဝင်ထားဘူးဆိုရင် ဘာမှမပေးဘူးလို့ ပြောတယ်” လို့ သူကပြောပါတယ်။
“သူတို့ချပေးတဲ့နေရာက ရေနဲ့အိမ်သာမရှိဘူး။ မီးလောင်ထားတဲ့နေရာမှာပဲ ပြန်ဆောက်ပေးစေချင်ပါတယ်”
ဒုတိယ မြို့နယ်အုပ်ချုပ်ရေးမှူးက ဦးမင်းလွင်က ဒဏ်ရာရသူတွေကို ဆေးကုသပေးနေပြီးတော့ ဘုဒူဘဈေးဟောင်းနေရာမှာ နေရာချပေးနေတယ်လို့ ဆိုပါတယ်။
“အဲဒီနေရာမှာ မလောက်ငရင် ကျွန်တော်တို့ ရွတ်ဖျင်တဲတွေထိုးပြီးလုပ်ပေးမှာပါ။ ရေချိုးဖို့နဲ့ အိမ်သာတွေကိုလည်း စီစဉ်ပေးသွားမှာပါ” လို့ ပြောပါတယ်။
