ပြီးခဲ့တဲ့ မေလကစလို့ ရှမ်း-ကယားအစပ်က လွိုင်ကော် – ဖယ်ခုံ ကားလမ်းမကြီးကို တကျော့ပြန်ထိန်းချုပ်ချင်တဲ့ စစ်ကောင်စီတပ်နဲ့ တော်လှန်ရေးတပ်ဖွဲ့တွေကြား ပြင်ထန်နေတဲ့ တိုက်ပွဲကြောင့် မိုးဗြဲ၊ ဖယ်ခုံနဲ့ လွိုင်ကော်မြို့နယ်အတွင်း ကျေးရွာပေါင်း ၃၀ကျော်က ပြည်သူတွေ ဒုက္ခမျိုးစုံ ကြုံတွေ့နေရပါတယ်။
သုံးလနီးပါးလာကြာချိန် အခုဇူလိုင်လမှာတော့ စစ်ကောင်စီရဲ့ထိုးစစ်ဟာ မိုးဗြဲမြို့ကို ပြန်လည်ထိန်းချုပ်နိုင်ခဲ့ပါတယ်။
အခုရက်ပိုင်းမှာတော့ ဆောင်နန်းခဲ ၊ မိုးဗြဲ၊ ကုန်သာဆောင်ကမ်းရှမ်း သုံးနေရာကို တြိဂံအနေထားနဲ့ ပိတ်ဆို့ပြီး စစ်ကောင်စီက ထိုးစစ်ဆင်နေပါတယ်။ လက်ရှိအချိန်ဟာ မိုးစပါးစိုက်ပျိုးရာသီ ကာလလည်းဖြစ်တာကြောင့် မတိမ်းရှောင်နိုင်တဲ့ ဒေသခံ ရာနဲ့ချီပြီး တိုက်ပွဲကြားမှာ ပိတ်မိနေကြပါတယ်။
နှစ်ဖက်ရင်ဆိုင်တိုက်ပွဲပြင်းထန်နေတဲ့ အခုရက်ပိုင်းအတွင်း ဒေသခံတွေဟာ အန္တရာယ်ကြားကနေ တိုက်ပွဲဇုန်ထဲက တိုးထွက်နေကြရပါတယ်။
ပြီးခဲ့တဲ့ ဇူလှိုင်လ ၆ ရက်ညမှာ လွယ်ထွန်ကျေးရွာထဲကို အချိန် ၃နာရီဝန်းကျင်လောက်ကြာတဲ့အထိ စစ်ကောင်စီရဲ့ လက်နက်ကြီးတွေ အဆက်မပြတ် ကျလာတာကြောင့် ရွာသူ၊ရွာသားတွေ ညတွင်းချင်း အသက်လုပြီး ထွက်ပြေးတိမ်းရှောင်ခဲ့ကြရပါတယ်။
သတင်းနှင့်ရိုက်ကူး – မြတ်မိုးသူ
