စစ်တပ်လက်အောက်ခံ ပြည်ထောင်စုရွေးကောက်ပွဲကော်မရှင် (UEC)၏ တတိယအကြီးဆုံး ရွေးကောက်ပွဲအရာရှိ ဦးအောင်လွင်ဦးသည် ယမန်နေ့(ဇန်နဝါရီလ ၆ ရက်) မွန်းလွဲပိုင်းက မကွေးတိုင်းအတွင်း တော်လှန်ရေးတပ်ဖွဲ့များ၏ စောင့်ကြိုတိုက်ခိုက်ခဲ့ခြင်းခံခဲ့ရသော်လည်း ထွက်ပြေးလွတ်မြောက် သွားခဲ့သည်။
မကွေးတိုင်း၊ မြို့သစ်မြို့နယ်၊ ရွှေပန်းရွာအနီး၌ဖြစ်ပွားခဲ့သည့် အဆိုပါကြားဖြတ်တိုက်ခိုက်မှုတွင် ဦးအောင်လွင်ဦး လွတ်မြောက်ခဲ့သော်လည်း သူ၏ကိုယ်ရေးအရာရှိနှင့် ရဲအရာရှိတစ်ဦးသေဆုံးသွားပြီး အခြားရဲလေးဦး ဒဏ်ရာရခဲ့သည်ဟု ရဲတပ်ဖွဲ့အတွင်းအကြောင်းကြားသည့် ကြေးနန်းစာကဆိုသည်။
အဆိုပါတိုက်ခိုက်မှုသည် ၎င်းတို့လက်ချက်ဖြစ်ကြောင်း အမျိုးသားညီညွတ်ရေးအစိုးရ NUG ၏ ပြည်သူ့ကာကွယ်ရေး တပ်မတော် (နေပြည်တော်-PDF) အမှတ်(၉၀၃)တပ်ရင်းကဆိုပြီး သေဆုံးသွားသည့် ရဲအရေအတွက်သည် ခုနစ်ဦးအထိရှိနိုင်သည်ဟုဆိုသည်။
တိုက်ခိုက်မှုအတွင်း လွတ်မြောက်သွားခဲ့သည့် ဦးအောင်လွင်ဦးသည် ပြီးခဲ့သည့်နှစ် ဇူလိုင်လအတွင်းက စစ်တပ်က ပြန်လည်ဖွဲ့စည်းခဲ့သည့် ပြည်ထောင်စုအဆင့်ရွေးကောက်ပွဲကော်မရှင်တွင်အဖွဲ့ဝင်ဖြစ်သည်။ ၎င်းသည် အဆိုပါအဖွဲ့တွင် ဥက္ကဋ္ဌဦးသန်းစိုးနှင့် အဖွဲ့ဝင်ဦးအောင်မိုးမြင့်တို့ပြီးနောက် တတိယအကြီးဆုံး ရွေးကောက်ပွဲအရာရှိဖြစ်သည်။
စစ်တပ်သည် ဦးအောင်လွင်ဦးအား လာမည့်တနင်္ဂနွေနေ့တွင် ကျင်းပမည့် စစ်တပ်၏ရွေးကောက်ပွဲ အပိုင်း(၂)အတွက် မကွေးတိုင်းတစ်ခုလုံးကို ကြီးကြပ်ရန် တာဝန်ပေးထားသည်။
ဦးအောင်လွင်ဦးသည် ၎င်းတို့လိုက်ပါလာသည့် ယာဉ်တန်းကြားဖြတ်တိုက်ခိုက်ခံခဲ့ရသည့် မြို့သစ်မြို့နယ် အပါအဝင် မကွေးတိုင်းထဲမှ မြို့နယ် ၁၁ ခုတွင်လုပ်မည့် ရွေးကောက်ပွဲကို ကြီးကြပ်ရန် တာဝန်ရှိသည်။
နေပြည်တော်မှလွှတ်လိုက်သည့် ဦးအောင်လွင်ဦးနှင့် စစ်တပ်ရွေးကောက်ပွဲအရာရှိများသည် ရဲများခြံရံလျက် ကားငါးစီးဖြင့် သွားလာခဲ့ကြောင်း၊ ၎င်းတို့လမ်းကြောင်းကို သတင်းကြိုတင်ရသဖြင့် စောင့်ကြိုတိုက်ခိုက်ခဲ့ခြင်း ဖြစ်ကြောင်း ယင်းတိုက်ခိုက်မှုကို ဦးဆောင်သည့် နေပြည်တော်-PDF အမှတ်(၉၀၃)တပ်ရင်းမှူးက Myanmar Now ကိုပြောသည်။
နာရီဝက်ခန့်ကြာ နှစ်ဖက်ပစ်ခတ်ခဲ့ပြီးနောက် စစ်တပ်ဘက်က စစ်ကူရောက်လာသဖြင့် ပြန်ဆုတ်ခဲ့ရသည်ဟု ၎င်းကိုယ်၎င်း ဗိုလ်အောင်ဒင်ဟု မိတ်ဆက်သည့် အသက် ၃၄ နှစ်အရွယ် အဆိုပါတပ်ရင်းမှူးကဆိုသည်။
“ပစ်ခတ်ပြီးတဲ့အချိန်မှာ သူတို့က နည်းနည်းလေးခွာသွားတာပေါ့။ မီတာ ၃၀၀ လောက် ဆုတ်သွားပြီးမှ ကျွန်တော်တို့ကို ပြန်ပစ်တာ။ သူတို့ဆုတ်တဲ့အချိန်မှာ ကားထဲ ကျန်ခဲ့တဲ့ပစ္စည်းတွေကို ကျွန်တော်တို့က ဇွတ်ယူတာ။ ယူတော့ ကားကြီးက မှောက်နေတာ၊ ပက်လက်လန်နေတာဆိုတော့ သေနေတဲ့ကောင်တွေက ပိနေတာပေါ့လေ” ဟု ၎င်းကဆိုသည်။
တိုက်ပွဲအတွင်း ရဲများကိုင်လေ့ရှိသည့် G3 အမျိုးအစား သေနတ် နှစ်လက်၊ ကျည် ၁၆၁ တောင့်၊ ကျည်ဘောက် သုံးခုနှင့် ရွေးကောက်ပွဲ စာရွက်စာတမ်းအချို့ကို သိမ်းဆည်းရရှိခဲ့ကြောင်းလည်း နေပြည်တော်-PDF ဓာတ်ပုံနှင့်တကွ ထုတ်ပြန်ထားသည်။
တပ်ရင်းမှူး ဗိုလ်အောင်ဒင်၏ လူမှုကွန်ရက်ဖေ့စ်ဘွတ်တွင်လည်း နှစ်မိနစ်နီးပါးကြာ တိုက်ပွဲရုပ်သံ ထုတ်ပြန်ထားပြီး၊ အပြန်အလှန်ပစ်ခတ်နေသည့် ထိုရုပ်သံဖိုင်ထဲတွင် တော်လှန်ရေးတပ်ဖွဲ့များက ကားလမ်း၏အပေါ်စီးမှ အကာအကွယ်ယူ ပစ်ခတ်နေကြပြီး ကားလမ်းမပေါ်တွင် ကားတစ်စီး ပက်လက်လန်နေသည်ကို တွေ့ရသည်။
ယမန်နေ့ မွန်းလွဲ ၁နာရီခွဲစတင်ကာ နေပြည်တော်-မြို့သစ်လမ်းပိုင်း၊ ရွှေပန်းရွာအနီး နာရီဝက်ကျော်ကြာ ပစ်ခတ်သံများ ကြားရကြောင်း လုံခြုံရေးအရ အမည်မဖော်လိုသည့် ဒေသခံအမျိုးသားတစ်ဦးက ပြောသည်။
တိုက်ပွဲဖြစ်ပြီးနောက် ယမန်နေ့ညနေပိုင်းကတည်းက စစ်တပ်သည် ထိုလမ်းပိုင်းကို လုံခြုံရေး တင်းကျပ်ထားပြီး ယနေ့တွင် တိုက်ပွဲဖြစ်သည့်နေရာအနီး တောမီးရှို့နေသည်ဟုလည်း အထက်ပါ ဒေသခံက ဆိုသည်။
ကော်မရှင်အဖွဲ့ဝင်ယာဉ်တန်းတိုက်ခိုက်ခံရမှုကြောင့် နေပြည်တော်ရှိ၊ ပြည်ထောင်စုရွေးကောက်ပွဲကော်မရှင် ရုံးဝန်ထမ်းများကြား လုံခြုံရေးစိုးရိမ်မှု ပိုများလာသည်ဟု ထိုရုံးမှ အမည်မဖော်လိုသည့် ဝန်ထမ်းတစ်ဦးက ပြောသည်။
“မနေ့က ညနေလောက် ရုံးမှာ အဲဒီသတင်းကြားပြီး ပျာယာတွေခတ်ကြတာ။ ဒီခရီးစဉ်လမ်းကြောင်း သတင်းနဲ့ လုံခြုံရေး ချိုးဖောက်တယ်ဆိုပြီး ဌာနတွင်းမှာတော့ မေးမြန်းနေတာရှိတယ်။ ဒီခရီးစဉ်ကိုသိတဲ့ ရုံးပိုင်းက ဝန်ထမ်းတွေကို မေးနေတာ” ဟု UEC ရုံးဝန်ထမ်းက ယနေ့( ဇန်နဝါရီလ ၇ ရက်) မွန်းလွဲပိုင်းတွင် ပြောသည်။
စစ်တပ်လက်အောက်တွင် တာဝန်ထမ်းနေသော အဆင့်မြင့်အရာရှိများသည် နေပြည်တော်ပြင်ပသို့ ခရီးသွားရမည်ဆိုလျှင် စစ်ရုံးနှင့် ပြည်ထဲရေးဝန်ကြီးဌာနထံ ခွင့်ပြုချက်နှင့် လုံခြုံရေးအင်အား တောင်းခံရပြီး၊ ခရီးစဉ်လမ်းကြောင်းများကို အသေးစိတ် တင်ပြရသည်ဟု ဒုဝန်ကြီးအဆင့်ရှိသူ၏ ကိုယ်ရေးအရာရှိတစ်ဦးထံက သိရသည်။
ပြည်ထောင်စုရွေးကောက်ပွဲကော်မရှင်အဖွဲ့ဝင် ယာဉ်တန်းတိုက်ခိုက်ခံရသည့် ဇန်နဝါရီလ ၆ ရက်နေ့တွင် နေပြည်တော်၏ ရွေးကောက်ပွဲကာလ လုံခြုံရေးဆိုင်ရာ ကြီးကြပ်မှု ဗဟိုကော်မတီအစည်းအဝေးတရပ် ပြုလုပ်ခဲ့ပြီး ထိုအစည်းအဝေးကို ဦးဆောင်ခဲ့သည် ပြည်ထဲရေးဝန်ကြီး ဒုတိယဗိုလ်ချုပ်ကြီး ထွန်းထွန်းနောင် က လုံခြုံရေးကျိုးပေါက်မှုမရှိစေရေးနှင့် လုံခြုံရေးစီမံချက်များကို အင်အားဖြည့်တင်းရန် တိုက်တွန်းပြောဆိုခဲ့သည်။
၂၀၂၀ ရွေးကောက်ပွဲရလဒ်ကို မျက်ကွယ်ပြုပြီး အာဏာသိမ်းခဲ့သည့် စစ်တပ်သည် ရွေးကောက်ပွဲကို အပိုင်း သုံးပိုင်းခွဲပြီး ကျင်းပနေသည်။ ဒီဇင်ဘာလ ၂၈ ရက်က ပထမပိုင်း ကျင်းပခဲ့ပြီး၊ အများစုကို စစ်တပ် ကျောထောက်နောက်ခံ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီကသာ အနိုင်ရခဲ့သည်။
ထိုရလဒ်သည် အံ့ဩစရာမရှိဘဲ လူအများထင်ထားသည့်အတိုင်း ဖြစ်သည်။ ကျန်ရွေးကောက်ပွဲများကို ယခုလ ၁၁ ရက်နှင့် ၂၅ ရက်တို့တွင် ဆက်လက် ကျင်းပမည်ဖြစ်သည်။
ဒီဇင်ဘာလ ၂၈ ရက်နေ့ ရွေးကောက်ပွဲအပိုင်း(၁)တွင် ပြည်သူအများစုက စစ်တပ်ရွေးကောက်ပွဲကို မဲထွက်မပေးခြင်းဖြင့် ၎င်းတို့ဆန္ဒအား ပြသခဲ့ကြသည်။
“ကျွန်တော်တို့ လက်မခံဘူးပေါ့။ ပြည်သူလည်း လက်မခံဘူး။ ဒါကြောင့် ဒီရွေးကောက်ပွဲကို ဟန့်တားတဲ့ ပုံစံမျိုးပါပဲ” ဟု ယာဉ်တန်းတိုက်ခိုက်မှုကို ဦးဆောင်ခဲ့သည့် ဗိုလ်အောင်ဒင်က ပြောလိုက်သည်။
မြန်မာနိုင်ငံတွင် အင်အားကြီးပါတီများဖြစ်ကြသော အမျိုးသားဒီမိုကရေစီအဖွဲ့ချုပ်ပါတီ(NLD)နှင့် ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ(SNLD) တို့ကို စစ်တပ်က ၎င်းတို့လက်အောက်တွင် မှတ်ပုံမတင်ခြင်းကြောင့် ဖျက်သိမ်းထားသည်။ NLD ခေါင်းဆောင် ဒေါ်အောင်ဆန်းစုကြည်ကိုလည်း စစ်တပ်က ဖမ်းဆီးအကျဉ်းချထားသည်။
