ကချင်ပြည်နယ် ဝိုင်းမော်မြို့နယ် အရှေ့ဘက်ရှိ စစ်တပ်နှင့် ပြည်သူ့စစ်များ ထိန်းချုပ်ထားသည့် စခန်းငယ်နှစ်ခုကို ကချင်လွတ်လပ်ရေးတပ်(KIA)က အောက်တိုဘာလ ၈ ရက်နေ့တွင် သိမ်းပိုက်နိုင်ခဲ့သည်ဟု သိရသည်။
KIA သိမ်းလိုက်သည့် စခန်းများသည် ဝိုင်းမော်မြို့ အရှေ့ဘက် ငါး မိုင်ခန့်အကွာ လမြန်ရွာအနီးရှိ စစ်တပ်စခန်းများဖြစ်သည်။
ယမန်နေ့နံနက် ၆ နာရီခန့်မှစတင်ကာ တိုက်ပွဲပြင်းထန်ခဲ့ပြီး နံနက် ၈ နာရီခန့်တွင် လမြန်ရွာ အနောက်ဘက် ရှိ စစ်တပ်နှင့် ပြည်သူ့စစ်များ ပူးပေါင်းတပ်ထိုင်ထားသည့် ကင်းစခန်း နှစ်ခုကို KIA က သိမ်းပိုက်နိုင်ခဲ့ခြင်း ဖြစ်သည်ဟု ဝိုင်းမော်ဒေသခံ အမျိုးသားတစ်ဦးက ပြောသည်။
“ကင်းစခန်းလိုမျိုး စခန်းအသေးလေးပါပဲ နှစ်ခုရလိုက်တာ ဟုတ်တယ်။ စစ်တပ်ရော၊ ပြည်သူ့စစ်အဖွဲ့ရော ရောပြီးထိုင်တာ။ အခုကတော့ ငြိမ်သွားပြီး တစ်မနက်လုံး လက်နက်ကြီးတွေ တော်တော်ပစ်လိုက်တယ်” ဟု ထိုသူက ဆိုသည်။
ထိုစခန်းများတွင် တပ်ထိုင်အင်အား မည်မျှရှိသည်ကိုမူ အတည်ပြုနိုင်ခြင်းမရှိပါ။
ထိုတိုက်ပွဲတွင် ဧရာဝတီမြစ်အနောက်ဘက်ကမ်း မြစ်ကြီးနားမြို့ပေါ်ရှိ စစ်တပ်၏ မြောက်ပိုင်းတိုင်း စစ်ဌာနချုပ်မှလည်း လက်နက်ကြီးများ ကူညီပစ်ခတ်ပေးသည်ဟု ဒေသခံများက ပြောသည်။
လမြန်ရွာအနီး ပြီးခဲ့သည့် အောက်တိုဘာလ ၆ ရက်နေ့မှ စတင်ကာ တိုက်ပွဲများ ပြင်းထန်နေကြောင်းနှင့် ယမန်နေ့နံနက်တွင်လည်း တိုက်ပွဲများပြင်းထန်ခဲ့ကြောင်း KIA ပြန်ကြားရေးတာဝန်ခံ ဗိုလ်မှူးကြီးနော်ဘူက ပြောသည်။
“၆ နာရီလောက်ကတည်းကနေ တိုက်ပွဲတွေရှိပါတယ်။ အခုတော့နည်းနည်း ပြန်ငြိမ်ပါတယ်။ အခု အချိန်မှာကတော့ ရှေ့တန်းစခန်းတွေ ကာကင်းစခန်းတွေကိုတော့ စစ်တပ် ဘက်ကနေ စစ်ထိုးလိုက် ကျွန်တော်တို့ဘက်ကနေ ပြန်သိမ်းလိုက်နဲ့ အဲဒီလို မတည်မငြိမ်ဖြစ်တဲ့ အချိန်ကာလပဲ ဖြစ်ပါတယ်” ဟု ဗိုလ်မှူးကြီးနော်ဘူက ယမန်နေ့ညနေက ပြောသည်။
KIA ထိန်းချုပ်ထားသည့် ဝိုင်းမော်မြို့ အရှေ့ဘက်ဒေသများကို ဝိုင်းမော်မြို့အခြေစိုက် အမှတ် (၅၈) ခြေလျင်တပ်ရင်း အခြေစိုက်တပ်အပြင် စစ်တပ်၏ မြောက်ပိုင်းတိုင်းစစ်ဌာနချုပ်လက်အောက်ခံတပ် များ၊ ပြည်သူ့စစ်အဖွဲ့များ ပူးပေါင်းအင်အားဖြင့် စစ်တပ်က ပြန်လည်ထိုးစစ်ဆင်နေသည်မှာ နှစ်လကျော် ကြာမြင့်နေပြီဖြစ်သည်။
တိုက်ပွဲများကြောင့် လမြန်ရွာနှင့် အနီးဝန်းကျင်ရှိ ပြည်သူ ၁,၀၀၀ နီးပါး စစ်ရှောင်နေကြရသည်ဟုလည်း ဒေသခံအချို့က ပြောသည်။
၂၀၂၄ ခုနှစ် မတ်လ ၇ ရက်မှ စတင်သည့် KIA ၏ ကချင်ပြည်နယ် ထိုးစစ်အတွင်း ၁၅ မြို့ကို သိမ်းပိုက်ထားနိုင်ခဲ့ပြီးဖြစ်သည်။
ပြည်သူ့စစ်မှုထမ်းဥပဒေကြောင့် ရရှိလာသည့် စစ်အင်အားများဖြင့် စစ်တပ်က ယခုနှစ် နှစ်ဆန်းပိုင်းမှ စတင်ကာ ထိုးစစ်ဆင်မှုများပြန်လည် ပြုလုပ်လာနိုင်သော်လည်း ဆုံးရှုံးလက်လွတ်ခဲ့ရသည့် မြို့နယ်များနှင့် နယ်မြေများ၏ ရာခိုင်နှုန်းအနည်းငယ်ကိုသာ ပြန်လည်သိမ်းပိုက်နိုင်သည်။
