နိုင်ငံအလယ်ပိုင်းဒေသမန္တလေးနှင့် စစ်ကိုင်းတိုင်း၌ ၂၀၂၅ ခုနှစ်အတွင်း စစ်ရေး အရှိန်မြှင့်လုပ်ဆောင်ရန် စစ်ကိုင်းတိုင်း တပ်မဟာအသစ်ကို ဖွဲ့စည်းသွားမည်ဟု ပြည်သူ့ကာကွယ်ရေးတပ်မတော်(မန္တလေး) MDY-PDF က ဒီဇင်ဘာ ၃၀ ရက်က ထုတ်ပြန်သည်။
၂၀၂၅ စစ်ဆင်ရေးများအတွက် ချိတ်ဆက်စဉ်းစားရာတွင် ၎င်းတို့ထိန်းချုပ်စိုးမိုးနယ်မြေများ နှင့် ထိစပ်သော စစ်ကိုင်းတိုင်းကိုပါ ထည့်သွင်းလာရသည့်အတွက် ယခုလို စစ်ကိုင်းတပ်မဟာအသစ်ကို ဖွဲ့စည်းရခြင်းဖြစ်သည်ဟု MDY-PDF ၏ ပြောရေးဆိုခွင့်ရှိသူ ကိုအော်စမွန်က Myanmar Now ကို ပြောသည်။
“ ကျနော်တို့ စစ်ဆင်ရေးအရှိန်မြှင့်ဆောင်ရွက်လာရင် သေချာပေါက် တိုက်ပွဲဖြစ်လာမယ့် နယ်မြေဒေသ တွေဟာ မြန်မာနိုင်ငံအလယ်ပိုင်းပြောလို့ရတဲ့ မကွေး၊ စစ်ကိုင်း ၊ မန္တလေး ဒီဒေသတွေဟာ တိုက်ပွဲပြင်း ထန်လာနိုင်တယ်” ဟု သူက ပြောသည်။
ပြီးခဲ့သည့် ၂၀၂၄ အတွင်း၌ မြန်မာနိုင်ငံ၏ အထက်ပိုင်းဒေသများ ဖြစ်သော ရှမ်းပြည်နယ် နှင့် ကချင် ပြည်နယ် ဒေသအများစုကို တိုင်းရင်းသား မဟာမိတ်တပ်ဖွဲ့များက ထိန်းချုပ်စိုးမိုးထားနိုင်ခဲ့ပြီး ဖြစ်ရာ ၂၀၂၅ တွင် စစ်ရေးဗဟိုချက်သည် နိုင်ငံအလယ်ပိုင်းဖြစ်လာမည်ဟု သူက ဆိုသည်။
MDY-PDF ၏ စစ်ကိုင်းတပ်မဟာတွင် မိတ်ဖက်တော်လှန်ရေးတပ်ဖွဲ့များ နှင့် စစ်သည် တော်များကို လာရောက်ပူးပေါင်းကြရန်လည်း ကြိုဆိုဖိတ်ခေါ်ထားပြီး စစ်ကိုင်းတိုင်းရှိ အခြားသော တော်လှန်ရေးတပ်ဖွဲ့များ နှင့်လည်း စစ်ဆင်ရေးများကို ဟန်ချက်ညီညီ ပူးပေါင်းဆောင်ရွက်သွားရန် အသင့်ရှိနေသည်ဟုလည်း MDY-PDF က ထုတ်ပြန်ထားသည်။
MDY-PDF ၏ စစ်ကိုင်းတိုင်းတပ်မဟာအသစ်ဖွဲ့စည်းမည်ကို ကြိုဆိုကြောင်း၊ ထိုကိစ္စရပ်အတွက်လည်း အခြားသော အဖွဲ့အစည်းများနှင့် ညှိနှိုင်းသုံးသပ်ထားပြီးမှ ထုတ်ပြန်ခြင်း ဖြစ်နိုင်သည်ဟု မြန်မာနိုင်ငံလုံး ဆိုင်ရာကျောင်းသားများ ဒီမိုကရက်တစ်တပ်ဦး (ABSDF)၏ ပြောရေးဆိုခွင့်ရှိသူ ရဲဘော်ဆန်နီက မှတ်ချက်ပြုသည်။
“ ဒါဟာ စစ်ကောင်စီကို တိုက်ပွဲဝင်ဖို့အတွက် အင်အားချဲ့ထွင်တဲ့အပေါ်ကို ကျွန်တော်တို့ ကြိုဆိုရမယ်။ အဲဒီဒေသတွင်းမှာ တချို့အချင်းချင်းကြားမှာရှိနေတဲ့ စိန်ခေါ်မှုတွေ၊ ပွတ်တိုက်မှုတွေကိုလည်း မိတ်ဖက်ပဋိပက္ခအသွင်နဲ့ ကျွန်တော်တို့ ဆွေးနွေးညှိနှိုင်းပြီးတော့မှ လက်တွဲအလုပ်လုပ်နေကြပါတယ် ” ဟု သူက ဆိုသည်။
မြေပြင်တွင်လည်း MDY-PDF နှင့် ABSDF တပ်ရင်းတပ်ဖွဲ့များကြား ချိတ်ဆက်ဆောင်ရွက် ဆွေးနွေးမှု များလည်း ရှိသည်ဟု ရဲဘော်ဆန်နီက ပြောသည်။
“ ဒီ ၂၀၂၅ မှာက မြေပြန့်ဒေသမှာ ဒီထက်ပိုမိုကြီးမားကျယ်ပြန်တဲ့ တိုက်ပွဲတွေ ရှိလာလိမ့်မယ်။ ပြင်းထန်မှုတွေရှိလာလိမ့်မယ်။ တချိန်တည်းမှာဘဲ စစ်ကောင်စီဘက်က အပြင်းအထန်ခုခံဆောင် ရွက်မှုတွေလည်း ပိုပြီးတော့လုပ်လာလိမ့်မယ်” ဟု ABSDF ၏ ပြောရေး ဆိုခွင့်ရှိသူ ရဲဘော်ဆန်နီ က မှတ်ချက်ပြုသည်။
ကရင်ပြည်နယ်နှင့် ရှမ်းပြည်နယ်မြောက်ပိုင်းတို့တွင် တိုင်းရင်းသားလက်နက်ကိုင်များနှင့်ပူးပေါင်းကာ အာဏာသိမ်းစစ်ကောင်စီတပ်ကို တိုက်ခိုက်နေသည့် ဗမာပြည်သူ့လွတ်မြောက်ရေးတပ်တော် (BPLA) ကလည်း နိုင်ငံအလယ်ပိုင်း အညာဒေသသို့ အခြေချ၍ စစ်ရေးလှုပ်ရှားသွားမည်ဟု ယမန်နှစ်ကုန်ပိုင်းတွင် ထုတ်ပြန်ထားသည်။
အမျိုးသားညီညွှတ်ရေးအစိုးရ (NUG)၏ ကာကွယ်ရေးဝန်ကြီးဌာနလက်အောက်ခံ ပြည်သူ့ကာကွယ်ရေး တပ်မတော်(မန္တလေး) MDY-PDF သည် ပြီးခဲ့သည့် ၂၀၂၄ ခုနှစ်အတွင်း မြောက်ပိုင်း ညီနောင်မဟာမိတ် ၃ ဖွဲ့ ၏ ၁၀၂၇ စစ်ဆင်ရေး နှင့်အတူ ရှမ်း-မန်း စစ်ဆင်ရေးကို အကောင်အထည်ဖော် ခဲ့ကာ မန္တလေးတိုင်းရှိ မတ္တရာ၊ စဉ့်ကူး နှင့် သပိတ်ကျင်း မြို့နယ်တို့ကို ထိန်းချုပ်စိုးမိုးနိုင်ခဲ့သည်။
ထို့အပြင် တအာင်းအမျိုးသားလွတ်မြောက်ရေးတပ်မတော် (TNLA) နှင့်လည်း ပူးပေါင်းကာ မန္တလေး နှင့် ရှမ်းပြည်နယ်မြောက်ပိုင်း ထိစပ်နေသော ဒေသများတွင်လည်း စစ်ဆင်ရေးများ အကောင်အထည်ဖော် လျက်ရှိနေသည်။
ရှမ်း-မန်း စစ်ဆင်ရေးကို MDY-PDF သည် စစ်ကိုင်းမှ ရွှေဘိုခရိုင်တပ်ရင်းများ၊ ကျောက်ဆည်၊ မြင်းခြံ၊ ညောင်ဦး တို့မှ တပ်ဖွဲ့များအပါအဝင် ၂၁ ဖွဲ့နှင့်အတူ ပူးပေါင်းတိုက်ပွဲဝင်ခဲ့ခြင်းဖြစ်သည်။
လက်ရှိအချိန်တွင် ပြည်သူ့ကာကွယ်ရေးတပ်မတော် (မန္တလေး)ကို တပ်ရင်းအမှတ် ၁၂၀၁၊ ၁၂၀၂၊ ၁၂၀၃၊ ၁၂၀၄၊ ၁၂၀၅၊ ၁၂၀၆နှင့် ၁၂၀၇ ဟူ၍ တပ်ရင်း ခုနှစ်ရင်းဖြင့် စုဖွဲ့ထားပြီး တပ်ဖွဲ့ဝင်အင်အားကို ထုတ်ပြန်ထားခြင်းမရှိပေ။
