ပြည်သူအများ ရေဘေးသင့်နေချိန် နယ်မြေလက်မလွှတ်ရရေး စစ်ကောင်စီ ဆက်လက်ဗုံးကြဲနေ

တိုက်ပွဲတွေပြင်းထန်နေတဲ့ ကချင်ပြည်နယ်၊ ဖားကန့်မြို့အနီးက ရဲစခန်းတစ်ခုကို စက်တင်ဘာလ ၁၂ရက်နေ့ မနက်ပိုင်းမှာ ကချင်လွတ်လပ်ရေးတပ်မတော် KIA ဦးဆောင်တဲ့ တော်လှန်ရေးပူးပေါင်းတပ်တွေ သိမ်းပိုက်လိုက်ပြီးတဲ့နောက် နေ့လည်ပိုင်းမှာ စစ်ကောင်စီတပ်က လေကြောင်းကနေ လာရောက်ဗုံးကြဲခဲ့တာပါ။

ဖားကန့်မြို့တောင်ဘက် ငါးမိုင်ခန့်အကွာမှာရှိတဲ့ ‘ဆိုင်းတောင်’ ရဲစခန်းကို ဒီကနေ့မနက် ၇နာရီဝန်းကျင်လောက်မှာ KIA က တိုက်ခိုက်၊ သိမ်းပိုက်နိုင်ခဲ့ပါတယ်။ အဲ့ဒီနောက် စစ်ကောင်စီဘက်က လက်နက်ကြီးနဲ့ လေကြောင်းတိုက်ခိုက်မှုတွေကြောင့် အရပ်သားနေအိမ်တွေ မီးလောင်နေတယ်လို့ KIA ပြောခွင့်ရ ဗိုလ်မှူးကြီးနော်ဘူက ပြောပါတယ်။

‘ရာဂိ’ တိုင်ဖွန်းမုန်တိုင်းအရှိန်ကြောင့် ဒေသအများအပြားမှာ ရေကြီးရေလျှံမှုတွေဖြစ်ပေါ်ပြီး လူအများအပြား ရေဘေးဒုက္ခရောက်နေကြရပါတယ်။ ဒီလိုအခြေအနေမှာ လေယာဉ်၊ ရဟတ်ယာဉ်တွေ ပိုင်ဆိုင်တဲ့ စစ်ကောင်စီဟာ ကူညီကယ်ဆယ်ရေးတွေလုပ်ဖို့ထက် နယ်မြေတွေ ဆက်လက်မဆုံးရှုံးရဖို့အရေး ဗုံးကြဲတိုက်ခိုက်နေတာ ဖြစ်ပါတယ်။