စစ်ကောင်စီတပ်က မကွေးတိုင်း၊ မြိုင်မြို့နယ်ရှိ ကန်ရပ်ကြီးနှင့် ကင်းရွာတို့ကို ယမန်နေ့ (အောက်တိုဘာ ၂၉) မွန်းလွဲ ၁ နာရီခွဲခန့်တွင် လက်နက်ကြီးဖြင့် တိုက်ခိုက်ခဲ့ရာ အသက် ၄ နှစ်အရွယ် မိန်းကလေးငယ် အပါအဝင် အနည်းဆုံး အရပ်သား ၅ ဦး သေဆုံးကာ ၉ ဦး ဒဏ်ရာရခဲ့သည်။
စစ်ကောင်စီတပ်၏ လက်နက်ကြီးကျည်များသည် ထိုကျေးရွာများအနီးရှိ ပျူစောထီးပြည်သူ့စစ် အားကောင်းရာ ပခုက္ကူမြို့နယ်၊ အနောက်ဘုန်းကံရွာ အခြေစိုက်စခန်းမှ လာသည်ဟု ဒေသခံများက ဆိုသည်။
တိုက်ခိုက်မှုကြောင့် ကင်းရွာမှ အရပ်သား ၃ ဦး သေ၊ ၁ ဦး ဒဏ်ရာရကာ ကန်ရပ်ကြီးရွာမှ ကိုရင် ၂ ပါး ပျံတော်မူပြီး ၈ ဦး ဒဏ်ရာရခဲ့သည်။
ကင်းရွာထဲသို့ ပစ်ခတ်ခဲ့သည့် စစ်ကောင်စီ၏ လက်နက်ကြီးကျည်သည် ရွာအနောက်ပိုင်းနေအိမ် မိသားစုထမင်းဝိုင်းအနီးသို့ ကျရောက်ခဲ့ရာ အသက် ၄၀ အရွယ် ဦးစိုးတင့်ဦး၊ အသက် ၄ နှစ်အရွယ် သူ၏သမီးငယ်တို့ သေဆုံးပြီး ဇနီးသည်မှာ ဒဏ်ရာရခဲ့ကြောင်း ကင်းရွာဒေသခံ အမျိုးသားက ပြောသည်။
ထိုမိသားစုတွင် ဖခင်သည် ပွဲချင်းပြီးသေဆုံးခဲ့ပြီး၊ သမီးငယ်မှာ ဆေးကုသမှုခံယူနေစဉ် ထိုနေ့ည ၁၀ နာရီခန့်တွင် သေဆုံးခဲ့ကာ၊ မိခင်ဖြစ်သူမှာ လက်နှင့် တင်ပါးတွင် ပြင်းထန်သည့် ဒဏ်ရာများကြောင့် လုံခြုံသည့်နေရာတစ်ခုတွင် ဆေးကုသမှုခံယူနေရကြောင်း ၎င်းက ဆိုသည်။
ကင်းရွာထဲ လက်နက်ကြီးကျသည့် အထက်ပါ မိသားစု၏ အိမ်နီးချင်း အသက် ၆၀ အရွယ် ဒေါ်အေးဆင့်သည်လည်း ပေါက်ကွဲသံကြောင့် ထိတ်လန့်ကာ သေဆုံးသွားသည်ဟု ကင်းရွာဒေသခံက ပြောသည်။
“သက်သက်မဲ့ ရွာထဲကို လာပစ်သွားတာ”
ဒေသခံများက ပေးပို့သည့် ဓာတ်ပုံများတွင် သွပ်မိုးထရံကာ အိမ်ကလေးသည် လက်နက်ကြီးဒဏ်ကြောင့် ယိုင်နဲ့ပျက်စီးနေပြီး အနီးအနားတွင် သေဆုံးနေသည့် ဖခင်ဖြစ်သူ၏ ရုပ်အလောင်းကို တွေ့ရှိရသည်။
သေဆုံးသွားသည့် ၄ နှစ်အရွယ် ကလေးငယ်သည်လည်း လက်နှင့် ဒူးတို့တွင် လက်နက်ကြီးစ ထိမှန်ထားသည်ကို တွေ့ရသည်။ သွေးအလိမ်းလိမ်းဖြင့် မိခင်ဖြစ်သူသည် လူနာခုတင်ပေါ်တွင် ဆေးဝါးကုသမှုခံယူနေရသည်။
စစ်တပ်က ပစ်ခတ်ခဲ့သည့် ဒုတိယလက်နက်ကြီးကျည်သည် ကင်းရွာအနောက်တောင်ဘက် ၅ မိုင်ခန့်အကွာမှ ကန်ရပ်ကြီးရွာဘုန်းကြီးကျောင်းထဲသို့ ကျရောက်ပေါက်ကွဲခဲ့ရာ ကိုရင် ၂ ပါး ပျံတော်မူပြီး သီတင်းကျွတ်လပြည့်နေ့ဖြစ်သည့်အတွက် ဘုန်းတော်ကြီးကျောင်းသို့ ရောက်နေခဲ့သည့် ရွာခံ ၈ ဦးလည်း ပြင်းထန်သည့် ဒဏ်ရာများ ရရှိခဲ့ကြောင်း သိရသည်။
ကန်ရပ်ကြီးရွာခံများကို Myanmar Now အနေဖြင့် အသေးစိတ်အခြေအနေကို ဆက်သွယ်မေးမြန်းနိုင်ခြင်း မရှိသေးပေ။
မြိုင်နှင့် ပခုက္ကူမြို့ကြားရှိ၊ ပခုက္ကူနှင့် ၇ မိုင်ခန့် ကွာဝေးသည့် ကျေးရွာများရှိ အရပ်သားများကို တိုက်ခိုက်ခဲ့သည့် အထက်ပါ ဖြစ်စဉ်များအတွက် စစ်ကောင်စီက သတင်းထုတ်ပြန်ခြင်း မရှိသေးပါ။
(လွတ်လပ်သည့်မီဒီယာအဖြစ်ရေရှည်ရပ်တည်နိုင်ရေးသင်တို့အကူအညီလိုအပ်နေပါသည်။ဤနေရာတွင်https://www.userroll.com/site/register/m1f6penနှိပ်၍လှူဒါန်းနိုင်ပါသည်)
