တောင်ငူထောင်ဖောက်ပြီး အောင်မြင်စွာ လွတ်မြောက်သူများမှာ စစ်သင်တန်းတက်ရောက်ပြီးသူများဖြစ်

ယမန်နေ့ (မေ ၁၈) နံနက် ၁၁ နာရီဝန်းကျင်တွင် အမျိုးသား ၉ဦး၊ အမျိုးသမီး ၁ဦးတို့က တောင်ငူ ထောင်တွင်း အထူးတရားရုံး အချုပ်ခန်းတံခါးကို ရိုက်ဖျက်၍ အစောင့်ရဲများထံမှ သေနတ်လေးလက် လုယူကာ လိုက်လံဖမ်းဆီးသူများကို ပစ်ခတ်ထွက်ပြေးခဲ့ခြင်းဖြစ်သည်။

ထွက်ပြေးလာသူများမှာ လွန်ခဲ့သော ၅လ ဝန်းကျင်က ပဲခူးတိုင်းအတွင်း မြို့ပြတော်လှန်ရေး လှုပ်ရှားမှု များအတွင်း ဖမ်းဆီးထားရသည့် PDFများဖြစ်ပြီး စစ်ကောင်စီက အကြမ်းဖက်ပုဒ်မများဖြင့် တရားစွဲ ထားကြောင်း ပဲခူးတိုင်း PDF ပြန်ကြားရေးတာဝန်ခံက ပြောသည်။

ယမန်နေ့က တောင်ငူအကျဉ်းထောင်မှ PDFတို့ ထွက်ပြေးနိုင်ခဲ့သည့် ဖြစ်စဉ်အပေါ် “ကျွန်တော်တို့နွေဦး တော်လှန်ရေးမှာ အကျဉ်းထောင်နံရံတွေကို ချိုးဖျက်ပြီးတော့ ပြည်သူ့ကာကွယ်ရေးတပ်ဖွဲ့ဝင်တွေရဲ့ အင်မတန်မှ အားပါတဲ့ ရုန်းကန်သံတစ်ခုပါ”ဟု ပဲခူးတိုင်း PDF ပြန်ကြားရေးတာဝန်ခံက ပြောသည်။