မန္တလေးတိုင်း၊ မြစ်ငယ်မြို့ မီးရထားဆေးရုံမှ ဆရာဝန်တစ်ဦး ယမန်နေ့ (မေ ၁၅) ညနေ ၆ နာရီခွဲခန့်က ပစ်သတ်ခံရသည်ဟု ဒေသခံများထံမှ သိရသည်။
ဒေါက်တာတင်ချိုချိုကိုသည် စဉ့်ကိုင်မြို့နယ်၊ ပလိပ်မြို့ ဈေးကွက်သစ်ရပ်ကွက်၊ လျှပ်စစ်ရုံးရှေ့ရှိ ၎င်း၏ ဆေးခန်းတွင် ရှိနေစဉ် ပစ်ခတ်ခံရခြင်း ဖြစ်သည်ဟု သိရကြောင်း ဒေသခံ အသက် (၄၀) အရွယ် အမျိုးသားတစ်ဦးက မျက်မြင်သက်သေတစ်ဦးကို ကိုးကား၍ ပြောသည်။
“ဆေးခန်းလာပြဟန်ဆောင်ပြီး ပစ်သတ်သွားတာ။ အမျိုးသားနှစ်ဦးက လာပစ်သွားတယ်လို့ပဲ သိရတယ်။ ပွဲချင်းပြီး ဆုံးတာပါ” ဟု ထိုအမျိုးသားက ပြောသည်။
လည်ပင်းကျည်ဖောက်ဝင်ဒဏ်ရာဖြင့် သေဆုံးခဲ့သည်၊ ပစ်ခတ်မှု ဖြစ်ပွားသည့် နေရာကို စစ်ကောင်စီတပ်သားတို့ သွားရောက် စစ်ဆေးခဲ့သည်ဟု သိရကြောင်း ၎င်းက ဆက်ပြောသည်။
ဆိုင်ကယ်နှင့် လာကာ ပစ်ခတ်သွားသည်ဆိုသော အမျိုးသားနှစ်ဦး မည်သူမည်ဝါဖြစ်သည်ကို မသိရသေးပေ။
ထိုဖြစ်ရပ်ပေါ်ပေါက်ပြီး နာရီပိုင်းအတွင်း စစ်ကောင်စီ၏ ဝါဒဖြန့် လူမှုကွန်ရက်စာမျက်နှာများတွင် သတင်းဖော်ပြသည်ကို တွေ့ရပြီး ဆေးခန်းအတွင်း ရုပ်အလောင်းအနီးတွင် Thai Arms 9mm အမျိုးအစား ကျည်ခွံတစ်ခု တွေ့ရှိရသည်ဟု သတင်းရေးထားသည်။ အာဏာဖီဆန်ရေးလှုပ်ရှားမှု (CDM) တွင် ပါဝင်ထားသူလည်းဖြစ်သည်ဟုပင် ဖော်ပြထားသည်။
မြစ်ငယ်မြို့ ဒေသခံ အမျိုးသမီးတစ်ဦးကမူ ဒေါက်တာတင်ချိုချိုကိုသည် ပလိပ်မြို့ဇာတိဖြစ်ပြီး၊ မြစ်ငယ်မီးရထားဆေးရုံသို့ ပြောင်းလာသည်မှာ မကြာသေးကြောင်း၊ CDM နှင့်လည်း မသက်ဆိုင်ကြောင်း Myanmar Now ကို ပြောသည်။
“သူက ဘယ်တုန်းကမှ CDM မလုပ်ခဲ့ပါဘူး။ နောက်ပြီး ကျွန်မတို့ ကြားတာတော့ပေါ့နော်၊ သူက ဆရာဝန်တွေ CDM လုပ်တာနဲ့ ပတ်သက်ပြီး ဖိအားပေးတာတွေ ရှိတယ်။ သူ့ကြောင့် ကြောက်ပြီး အလုပ်ပြန်ဝင်သွားတာတွေ ရှိတယ်။ နောက် အလုပ်ပြန်ဝင်လာတဲ့ ဝန်ထမ်းတွေကို ဖိနှိပ်တာတွေ ရှိတယ်။ ပြဿနာရှာတာတွေ ရှိတယ်” ဟု ၎င်းက ပြောပြသည်။
“ဘယ်ဘက်က သတ်လဲကတော့ ပြောလို့လဲမရဘူး။ Personal (ကိုယ်ရေးကိုယ်တာ) ကိစ္စတွေလား၊ နိုင်ငံရေးကြောင့်လား ဆိုတာ။ အခုက ဘာကိစ္စမဆို လက်နက်နဲ့ ဖြေရှင်းနေကြတာလေ၊ ခိုးဆိုးလုနှိုက်ဆိုလည်း လက်နက်တွေနဲ့ပဲ ဆိုတော့”
အာဏာဖီဆန်ဖူးသည့် ဝန်ထမ်းများကို အနိုင်ကျင့်သည်ဟူသော ပြောဆိုချက်နှင့် ပတ်သက်ပြီး သီးခြား အတည်ပြုနိုင်ခြင်း မရှိသေးသလို ဒေါက်တာတင်ချိုချိုကို သေဆုံးမှုနှင့် ပတ်သက်ပြီး စစ်ကောင်စီက သတင်းထုတ်ပြန်ထားခြင်း မရှိသေးပေ။
မန္တလေးတိုင်းအတွင်းရှိ ပုလိပ်မြို့အပါအဝင် မြစ်သား၊ စဉ့်ကိုင်၊ မြစ်ငယ် အစရှိသည့် မြို့များသည် ၂၀၂၁ ဖေဖော်ဝါရီ ၁ အာဏာသိမ်းပြီးနောက် စစ်ကောင်စီကို ဆန့်ကျင်ဆန္ဒပြမှု အားကောင်းခဲ့သည့် ဒေသများဖြစ်သည်။ စစ်ကောင်စီ၏ လက်အောက်တွင် အလုပ်မလုပ်လိုဟု ဆိုကာ အာဏာဖီဆန်ခဲ့ကြသည့်အထဲတွင် မြစ်ငယ်မြို့ မီးရထားဝန်ထမ်းများမှာ ထင်ရှားသူများ ဖြစ်သည်။
အဆိုပါ မြို့များကို စစ်ကောင်စီက ပြင်းပြင်းထန်ထန် ဖိနှိပ်ခဲ့သလို ယင်းဒေသများတွင်လည်း လက်နက်ကိုင်ခုခံတော်လှန်သည့်အဖွဲ့များ ပေါ်ပေါက်လာကြသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
