ရှမ်းလက်နက်ကိုင် နှစ်ဖွဲ့ လားရှိုး – နမ္မတူလမ်းဘေး တိုက်ပွဲဖြစ်ပြီး ဒေသခံများ ထွက်ပြေးနေရ

ဒေသခံများ၏ အဆိုအရ ရှမ်းပြည်တိုးတက်ရေးပါတီ/ရှမ်းပြည်တပ်မတော် SSPP/SSA နှင့် ရှမ်းပြည် ပြန်လည်ထူထောင်ရေးကောင်စီ/ ရှမ်းပြည်တပ်မတော် RCSS/SSA တို့သည် ယမန်နေ့ ည ၉ နာရီ ခန့်မှစ၍ ညဉ့်သန်းခေါင်အထိ တိုက်ခိုက်ခဲ့ကြပြီး လက်နက်ကြီး ပစ်ခတ်သံများပါ ကြားခဲ့ရသည်။

SSPP/SSA ဘက်က ၎င်းတို့၏ မဟာမိတ်ဖြစ်သည့် တအာင်း/ပလောင်အမျိုးသား လွတ်မြောက်ရေး တပ်မတော် (PSLF/TNLA) ကလည်း ဝင်ရောက်တိုက်ခိုက်ခဲ့ဖွယ်ရှိကြောင်းလည်း ဒေသခံများကဆိုသည်။

ထွက်ပြေးလာသူများသည် ယနေ့မနက် ၁၁ နာရီခန့်တွင် တိုက်ပွဲဖြစ်ပွားသည့် နေရာမှ ၁၀ မိုင်ခန့်ကွာဝေးသည့် လားရှိုးမြို့မန်ဆူဘုန်းကြီးကျောင်းသို့ ရောက်ရှိလာကြောင်း ကမ္ဘောဇနာရေးကူညီမှုအသင်း၏ ပြန်ကြားရေးတာဝန်ခံ ဦးစိုးမင်းနိုင်က ပြောသည်။

“အခုအထိကိုလာနေတုန်းပဲ ရုတ်တရက်ရွှေ့ပြောင်းရတာဆိုတော့ စားရေးသောက်ရေးကအဓိက လိုအပ်နေတယ် ” ဟု သူကပြောသည်။

ဒေသတွင်း စစ်ပွဲအရှိန် မြင့်တက်နေခဲ့သော်လည်း ဒေသခံအချို ့သည် သီးနှံရိတ်သိမ်းကာလ ဖြစ်သည့်အတွက် နေရပ်ကို စွန့်ခွာရန် ငြင်းဆန်ခဲ့ကြကြောင်းလည်း ကချင်စစ်ရှောင်တာဝန်ခံ ဦးဇော်ရော်က ပြောသည်။

နေရပ်စွန့်ခွာရန် ငြင်းဆန်နေသည့် ကချင်စစ်ရှောင် ၂၀၀ ခန့် ရှိပြီး ၎င်းတို့အား အီနိုင်းကျေးရွာရှိ ခရစ်ယာန်နှစ်ခြင်း ဘုရားကျောင်းတွင် စုပေါင်းထားရှိကြောင်း ၎င်းကပြောသည်။

အီနိုင်းကျေးရွာအနီးဖြစ်ပွားသည့် တိုက်ပွဲနှင့်ပတ်သက်ပြီး TNLA နှင့် RCSS/SSA ပြောရေးဆိုခွင့်ရှိသူများအား Myanmar Now က ဖုန်းဖြင့်ဆက်သွယ်မေးမြန်းသော်လည်း ဆက်သွယ်၍မရပေ။

ရှမ်းပြည်နယ် မြောက်ပိုင်း နမ္မတူ၊ သီပေါ၊ လားရှိုး စသည့် မြို့နယ်များတွင် အောက်တိုဘာ ၂၃ ရက်နေ့မှစ၍ တိုင်းရင်းသားလက်နက်ကိုင်များအချင်းချင်း တိုက်ပွဲများ ဖြစ်ပွားခဲ့သဖြင့် အနည်းဆုံး ဒေသခံ ၉၀၀ ခန့် နမ္မတူမြို့ပေါ်သို့ ထွက်ပြေးခဲ့ရသေးသည်။