မန္တလေးတိုင်း၊ မတ္တရာမြို့နယ်အနောက်ခြမ်းတွင် စစ်ကောင်စီတပ်က ကျေးရွာ ၄ ရွာမှ ဘုန်းကြီးတစ်ပါး၊ အမျိုးသမီးနှစ်ဦး၊ အမျိုးသားတစ်ဦးကို ပြီးခဲ့သည့် ရက်ပိုင်းအတွင်း သတ်ဖြတ်လိုက်သည်ဟု ဒေသအခြေစိုက် ကာကွယ်ရေးအဖွဲ့များက ပြောကြသည်။
မန္တလေးမြို့ဘက်မှ စက်လှေ၊ မော်တော်များဖြင့် မြစ်ကြောင်းအတိုင်း လာသည်ဟု ယူဆရသော စစ်ကောင်စီတပ်သည် မတ် ၁၃ မှ ၁၈ ရက်အတွင်း အင်အား ၁၀၀ ဝန်းကျင်စီဖြင့် စစ်ကြောင်း နှစ်ကြောင်းခွဲကာ မတ္တရာမြို့နယ်အနောက်ခြမ်းနှင့် စစ်ကိုင်းတိုင်း၊ စစ်ကိုင်းမြို့နယ်အတွင်း ဧရာဝတီမြစ်ကမ်းဘေး ကျေးရွာများကို စီးနင်းခဲ့စဉ် ထိုကိစ္စများ ပေါ်ပေါက်ခဲ့ခြင်းဖြစ်သည်။
စစ်ကိုင်းမြို့နယ် မဲဇလီကျေးရွာမှ သက်တော် ၅၀ ခန့်အရွယ် ရဟန်းမှာ ၆၀ မမ လက်နက်ကြီးကျည် ထိမှန်ခဲ့သည်ဟု ဒေသတွင်းတော်လှန်ရေးအဖွဲ့ ခေါင်းဆောင်တစ်ဦးက ဆိုသည်။
“ပိုဝရွာက အမျိုးသားက ဖမ်းပြီး သတ်ခံရတာ။ မြွေခလ (ရွာ) က အမျိုးသမီးက မသန်မစွမ်း၊ မပြေးနိုင်ဘဲ အိမ်မှာ ကျန်နေတဲ့အချိန် မီးရှို့ခံရတာ။ မဲဇလီက ဆရာတော်က ကျောင်းတိုက်မှာ ရှိနေတုန်း ၆၀ တွေနဲ့ ပစ်ခံရတာမှာ ဦးခေါင်းပေါ် တည့်တည့်ကျပြီး ပျံတော်မူသွားတာ” ဟု ပြင်ဦးလွင်ခရိုင် ပြည်သူ့ကာကွယ်ရေးအဖွဲ့ (ပကဖ) ဒုတာဝန်ခံ ဗိုလ်ကောင်းကင် ဆိုသူက ပြောသည်။
ထိုစစ်ကြောင်း နှစ်ကြောင်းသည် မတ် ၁၃ ရက်မှ ယနေ့ (မတ် ၂၂) အထိ ပိုဝ၊ မြွေမြစ်ရိုး၊ မြွေခလ၊ ရွှေဂဲပြန်၊ မြွေရေယဉ်၊ မြွေပုသိမ်၊ မြွေကတို့ဆိပ်၊ စိန်ပန်းကုန်း ကျေးရွာများအပြင် ဧရာဝတီမြစ်တစ်ဖက်ကမ်း စစ်ကိုင်းမြို့နယ်အတွင်းသို့ လက်နက်ကြီးများဖြင့် ပစ်ခတ်ခဲ့ကြောင်း သိရသည်။
ရွှေဂဲပြန်ကျေးရွာတွင် မတ်လ ၁၄ ရက်နေ့က ပစ်သတ်ခံရသော အမျိုးသမီးမှာ ၁၀ နှစ်အရွယ် ကလေးတစ်ဦး၏ မိခင်ဖြစ်ကြောင်း၊ မုဒိမ်းကျင့်ခံထားရသည်ဟု ယူဆကြောင်း ဗိုလ်ကောင်းကင်က ဆိုသည်။
“ဒီအမျိုးသမီးရဲ့အလောင်းကို ပြန်တွေ့ချိန်မှာ ကုတ်ဖဲ့ထားတဲ့ ဒဏ်ရာတွေ၊ အဝတ်အစားတွေ ဆွဲချွတ်ခံထားရတာ၊ အပေါ်ပိုင်း (အဝတ်) တွေကို ဆွဲဖြဲထားတဲ့ ဒဏ်ရာတွေလည်း တွေ့ခဲ့ရတယ်။ တော်တော် ရုပ်ပျက်ဆင်းပျက်နဲ့ ပြန်တွေ့ရတာပါ” ဟု သူက ပြောသည်။
ကာကွယ်ရေးအဖွဲ့ထံမှ ရရှိသည့် ဓာတ်ပုံတွင် တံခါးအနီး လဲကျနေသည့် အသက် ၃၀ အရွယ် အမျိုးသမီး၏ ရုပ်အလောင်းကို လုံခြည်အစင်းနှင့် အစိမ်းရောင်အကျီ၊ အပေါ်ထပ်တို့ဖြင့် တွေ့ရသည်၊ အမြင်မသင့်တော်သဖြင့် အလောင်းကို အဝတ်များ ပြန်ဝတ်ပေးကာ ဓာတ်ပုံမှတ်တမ်းယူခဲ့ခြင်း ဖြစ်သည်ဟု ဆိုသည်။
အဆိုပါ စစ်ကောင်စီစစ်ကြောင်းနှစ်ခုကို ဒေသအခြေစိုက် ကာကွယ်ရေးအဖွဲ့များ ပူးပေါင်းပြီး အကြိမ်ကြိမ် ခုခံရာ စစ်သား ၁၂ ဦး သေဆုံးသည်ဟု အထက်ပါ ခရိုင်ပကဖ ဒုတာဝန်ခံက ပြောသည်။
“ကျွန်တော်တို့ကလည်း ဒီစစ်ကြောင်းနှစ်ခုကို ခုခံတိုက်ခိုက်တာမှာ ထိတွေ့တိုက်ပွဲ လေးကြိမ်အထိ ဖြစ်ပွားပြီးတော့ လေးကြိမ်အတွင်းမှာ စစ် xx ၁၂ ကောင် ရခဲ့ပါတယ်” ဟု ဗိုလ်ကောင်းကင်က ဆိုသည်။
စစ်ကောင်စီလက်နက်ကိုင်တို့ ထိခိုက်သေဆုံးမှု အရေအတွက်ကို Myanmar Now အနေဖြင့် သီးခြား အတည်မပြုနိုင်သေးပေ။
ထို ၅ ရက်တာ စီးနင်းမှုအတွင်း စစ်တပ်က ပိုဝရွာမှ စာသင်ကျောင်းနှစ်ကျောင်း၊ စိန်ပန်းကုန်းရွာမှ နေအိမ်တစ်လုံး၊ မြွေမြစ်ရိုးရွာ မှ နေအိမ် ၂၉ လုံး၊ မြေခလမှ နေအိမ်၂၇ လုံး၊ မြွေရေယဉ်မှ နေအိမ် ၄၅ လုံး၊ မြွေပုသိမ်မှ နေအိမ်တစ်လုံး၊ မြွေကတို့ဆိပ်ရွာမှ နေအိမ်တစ်လုံးတို့ကိုလည်း မီးရှို့ဖျက်ဆီးခဲ့ကြောင်း ခရိုင်ပကဖ၏ စာရင်းများအရ သိရသည်။
ထို့နောက် မတ် ၁၈ တွင် စစ်ကြောင်းများ မြစ်ကြောင်းအတိုင်း ပြန်ထွက်သွားကာ ရုပ်အလောင်းများကို ဒေသခံကာကွယ်ရေးအဖွဲ့များက ကောက်ယူသင်္ဂြိုဟ်ခဲ့ကြောင်း သိရသည်။
ယနေ့ (မတ် ၂၂) တွင် အင်အား ၅၀ စီဖြင့် စစ်ကြောင်း နှစ်ကြောင်းခွဲကာ မတ္တရာအနောက်ခြမ်း မြစ်ကမ်းဘေးကျေးရွာများအနီး ရောက်ရှိလာပြီး နံနက် ၇ နာရီခန့်တွင် စစ်ကြောင်းတစ်ခုက ပိုဝကျေးရွာကို ဝင်ရောက် မီးရှို့ခဲ့ကာ၊ ဒေသကာကွယ်ရေးတပ်ဖွဲ့များနှင့် ထိတွေ့တိုက်ပွဲဖြစ်ပွားနေကြောင်း သိရသည်။
မတ္တရာမြို့နယ်အတွင်း စစ်ကြောင်းများဖြင့် ထိုးစစ်ဆင်နေသလို မြို့နယ်အတွင်းရှိ စကျင်တောင်တန်းများပေါ်တွင် လက်နက်ကြီးများ တပ်ဆင်၍ ကျေးရွာများအတွင်း ချိန်ရွယ်ပစ်ခတ်ခြင်းများ လုပ်ဆောင်နေကာ စစ်ကြောင်းများကိုလည်း ပြင်ဦးလွင်ခရိုင်ပကဖ၏ တပ်ဖွဲ့များ၊ ဒေသတွင်းမှ တော်လှန်ရေးတပ်ဖွဲ့များက စုပေါင်းကာ ခုခံတိုက်ခိုက်နေသည်။
ယမန်နှစ် ဒီဇင်ဘာအတွင်းကလည်း စစ်ကိုင်းတိုင်း၊ စစ်ကိုင်းမြို့နယ်နှင့် မန္တလေးတိုင်း၊ မတ္တရာမြို့နယ်အတွင်းရှိ ဧရာဝတီမြစ်ကမ်းဘေးကျေးရွာများကို အလယ်ပိုင်းတိုင်းစစ်ဌာနချုပ် လက်အောက်ခံ မန္တလေးမြို့အခြေစိုက်တပ်များက ဝင်ရောက်စီးနင်းခဲ့၍ အနည်းဆုံး ကျေးရွာ ၂၀ ခန့်မှ ဒေသခံများ ထွက်ပြေးတိမ်းရှောင်ခဲ့ရသည်။
ဒီဇင်ဘာ ၂၇ က ဧရာဝတီမြစ်အရှေ့ဘက်ရှိ ပိုဝရွာ စီးနင်းခံရပြီး စစ်ကောင်စီစစ်ကြောင်းကို ကင်းထောက်နေသည့် ကျေးရွာကာကွယ်ရေးအဖွဲ့ဝင် သက် ၁၉ အရွယ် ကိုပြည့်ပြည့်ကျော်နှင့် ကိုနိုင်းနိုင်တို့ နှစ်ဦး ဖမ်းဆီးသတ်ဖြတ် မီးရှို့ခံရသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
