ချင်းပြည်နယ်သို့ သွားရာလမ်းကြောင်းများကို စစ်ကောင်စီတပ်က ပိတ်ဆို့ဖြတ်တောက်ထားခြင်းကြောင့် ထန်တလန်မြို့ခံ စစ်ရှောင်များနှင့် ဒေသခံများ စားနပ်ရိက္ခာနှင့် ဆေးဝါးလိုအပ်ချက် များပြားလာနေသည်ဟု သိရသည်။
ချင်းပြည်နယ်မြောက်ပိုင်းရှိ ဟားခါး – ထန်တလန်လမ်းမကြီးနှင့် ဖလမ်း၊ ကလေးမြို့များရှိ အဓိကလမ်းမများကို ပိတ်ဆို့ထားသလို စစ်တပ်က ခြေကုပ်စခန်းများချကာ စစ်ဆေးရေးဂိတ်များ ဖွင့်ထားသည်ဟု ချင်းပြည်သူ့ကာကွယ်ရေးတပ် CDF တာဝန်ရှိသူတစ်ဦးက ပြောသည်။
“ဟားခါး-ထန်တလန် လမ်းမကြီးဆိုရင် စစ်ကောင်စီရဲ့ ထန်တလန်မြို့မရဲစခန်းဖြစ်တဲ့ တပ်ကုန်းဆိုတဲ့ ခြေကုပ်စခန်းရှိနေလို့ သုံးလို့မရဘူး၊ ပိတ်နေတာ ကြာပြီ။ ပြည်သူတွေကပဲ အခြားတောင်ကြောတွေကနေ လမ်းကြောင်းအသစ်တွေ ဖောက်ပြီး ရိက္ခာတွေ သယ်နေရတယ်။ လမ်းဖောက်တာတောင် တော်တော်ကြာတယ်။ ပြည်သူတွေ စားနပ်ရိက္ခာအတွက် အရမ်းရုန်းကန်နေရတယ်” ဟု သူက ပြောသည်။
ထန်တလန်မြို့စစ်ရှောင်များ၏ ကျန်းမာရေးစောင့်ရှောက်မှုကို ယင်းမြို့ပြည်သူ့အုပ်ချုပ်ရေး၏ ကျန်းမာရေးဌာနနှင့်အစိုးရမဟုတ်သော အဖွဲ့အစည်း (INGO) များက ဆောင်ရွက်ပေးနေသော်လည်း စစ်ကောင်စီ၏ လမ်းပန်းဆက်သွယ်ရေးဖြတ်တောက်ထားမှုများကြောင့် အခက်အခဲဖြစ်နေကြောင်းလည်း ချင်းအမျိုးသားတပ်မတော် (CNA) ၏ပြောခွင့်ရ ဆလိုင်းထက်နီက ပြောသည်။
“စစ်တွေကနေ ပလက်ဝလမ်းပိုင်းတွေကို ပိတ်တာလည်းရှိတယ်။ ချင်းပြည်တောင်ပိုင်းဖြစ်တဲ့ ပခုက္ကူဘက်ကနေ မင်းတပ်၊ မတူပီလမ်းတွေကိုပါ ပိတ်ထားတာအပြင် ကလေးမြို့ကနေ ဖလမ်း၊ ဟားခါးအထိပါ ပိတ်ထားတော့ စစ်ရှောင်တွေအတွက် ရိက္ခာရော၊ ကျန်းမာရေးစောင့်ရှောက်မှုအတွက် ဆေးဝါးတွေရောရဖို့ အတော်လေးခက်နေတယ်။ စားနပ်ရိက္ခာပြတ်လို့ ကိုယ်ခံအားကျဆင်းတဲ့ ရောဂါမျိုးတွေလည်း စစ်ရှောင်နေရသူတွေ အဖြစ်များနေတယ်” ဟု သူက ပြောသည်။
ချင်းပြည်နယ် ထန်တလန်မြို့ရှိ CNA နှင့် CDF (ထန်တလန်) တို့က ယခုလ ၈ ရက်နေ့တွင် မြို့မရဲစခန်းကို ဝင်ရောက်စီးနင်းပြီး လက်နက်ပေါင်း ၄၀ ကျော်ကို သိမ်းယူသွားရာ လေတပ်က ထိုဒေသကို ၅ ကြိမ်ထက်မနည်း သွားရောက် တိုက်ခိုက်ခဲ့သည်။
အဆိုပါ အခြေအနေတွင် စစ်ကောင်စီက ကုန်းလမ်းခရီးလမ်းကြောင်းများကို ဖြတ်တောက်ပိတ်ဆို့ထားရာ ချင်းပြည်နယ်တောင်ပိုင်း မတူပီမြို့ပေါ်တွင်ပါ ဆန်နှင့် ဆေးဝါးများ ပြတ်လပ်နေသည်ဟု ယင်းမြို့ခံများက ဆိုကြသည်။
ပိတ်ဆို့ခံနေရသည့် ချင်းတောင်သည် စပါးစိုက်ပျိုးနိုင်မှု နည်းပါးလွန်းသဖြင့် ပြည်နယ်ပြင်ပမှ ဆန်တင်သွင်းနေရသည့်ဒေသဖြစ်သည်။
ပိတ်ဆို့မှုကြောင့် IDP ခေါ် စစ်ဘေးတိမ်းရှောင်နေရသူတို့ ပိုမိုခက်ခဲစေမည်ဟု ဒေသခံတစ်ဦးက Myanmar Now ကို ယနေ့ ပြောသည်။
“အခုက ပြီးခဲ့တဲ့တစ်ပတ်ကပဲ ဆန်တွေက ပြတ်နေပြီ။ မြို့ထဲက ပြည်သူတွေအတွက် ဝယ်စရာဆန်က မရှိတော့ဘူး။ မြို့အဝင်မှာရှိတဲ့ စစ်တပ်ရဲ့ဗျူဟာကုန်းကနေ မြို့ထဲဝင်မယ့် ရိက္ခာတွေကို အကုန်သိမ်းတာ။ အကုန် အထဲပေးမဝင်ဘူး။ ဆန်တွေပေးမဝင်ဘူး။ အခုက IDP မပြောနဲ့ မြို့ပေါ်က စစ်မရှောင်ရသူတောင် ရိက္ခာပြတ်နေတာဖြစ်လို့ စစ်ရှောင်နေရသူတွေဆို ပြောစရာမလိုတော့ဘူး” ဟု မတူပီမြို့ဒေသခံ အမျိုးသမီးတစ်ဦးက ပြောသည်။
စစ်ကောင်စီ၏ တင်းကျပ်ထားမှုများကြောင့် ကုလသမဂ္ဂကမ္ဘာ့စားနပ်ရိက္ခာအစီအစဉ် (WFP) က ၎င်းတို့သည်ပင်လျှင် ချင်းပြည်နယ် ပလက်ဝနှင့် မင်းတပ်မြို့များရှိ စစ်ဘေးဒုက္ခသည်များအတွက် အရေးပေါ်စားနပ်ရိက္ခာများကို အကြိမ်ကြိမ်ကြိုးစားပြီးမှသာ ပို့ဆောင်ပေးနိုင်ခဲ့ကြောင်း ယမန်နှစ်က နှစ်ကြိမ်တိုင် ထုတ်ပြန်ခဲ့ဖူးသည်။
ချင်းပြည်နယ်သည် စစ်ကောင်စီကို ခုခံမှုအားကောင်းသည့် ပြည်နယ်တစ်ခုဖြစ်ရာ ထန်တလန်တွင် တပ်စွဲထားသည့် စစ်ကောင်စီတပ်မ ၆၆ ကလည်း ၂၀၂၂ ခုနှစ် စက်တင်ဘာ ၁၉ ရက်တွင် မြို့ကို မီးရှို့ခဲ့ကြသည်။ ထိုမီးရှို့မှုတွင် Church on the Rock (COTR) နှင့် Presbyterian အစရှိသည့် အထင်ကရ ဘာသာရေးအဆောက်အအုံ နှစ်ခုအပါအဝင်လူနေအိမ်ခြေ ၁၇၀ ကျော် မီးလောင်ပျက်စီးခဲ့ကြောင်း ချင်းလူ့အခွင့်အရေးအဖွဲ့က ထုတ်ပြန်ခဲ့သည်။
စစ်ကောင်စီကမူ ဒေသခံတော်လှန်ရေးသမားတို့က ရှို့ခြင်းဖြစ်သည်ဟု တုံ့ပြန်ထားသည်။
ချင်းပြည်နယ်အတွင်း တိုက်ပွဲများကြောင့် ထန်တလန်ဒေသခံ ၁၀,၀၀၀ ကျော်မှာ မြန်မာ – အိန္ဒိယနိုင်ငံနယ်စပ် စစ်ဘေးရှောင်စခန်းနှစ်ခုတွင် ခိုလှုံနေသည်။
ယင်းအနက် ထန်တလန်မြို့မှ စစ်ရှောင် ၃,၀၀၀ ဝန်းကျင်မှာ အိန္ဒိယနိုင်ငံ၊ မီဇိုရမ်ပြည်နယ်ရှိ စစ်ရှောင်စခန်းများတွင် ရောက်ရှိနေကြသည်။
အိန္ဒိယနိုင်ငံ မီဇိုရမ်းပြည်နယ် စစ်ရှောင်စခန်းများသို့ ရောက်ရှိသွားကြသူ ၅၀,၀၀၀ ဝန်းကျင်ရှိသည်။ ၃၀,၀၀၀ ဝန်းကျင်မှာ ချင်းပြည်နယ်အတွင်းရှိ စစ်ရှောင်စခန်းများတွင် နေထိုင်နေကြရကြောင်း ချင်းလူ့အခွင့်အရေးအဖွဲ့မှ တာဝန်ရှိသူဖြစ်သည့် ဆလိုင်းဇယူကေလင်းက ပြီးခဲ့သည့် ၂၀၂၂ ခုနှစ် ဒီဇင်ဘာ ၂၁ ရက်တွင် Myanmar Now ကို ပြောထားသည်။
မြန်မာနိုင်ငံတွင် အာဏာသိမ်းပြီးနောက်ပိုင်း ထွက်ပြေးတိမ်းရှောင်နေရသူ ၁ ဒသမ ၄ သန်းကျော် ရှိလာပြီဖြစ်ကြောင်း ကုလသမဂ္ဂ၏ နောက်ဆုံးစာရင်းများအရ သိရသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
