အထိနာနေသည့် စစ်ကောင်စီတပ်၏ လက်နက်ကြီးဖြင့် ပစ်ခတ်မှုကြောင့် ရှမ်း-ကယားနယ်စပ် မိုးဗြဲမြို့ရှိ ဘုန်းကြီးကျောင်းတစ်ခုတွင် ခိုလှုံနေကြရသည့် အရပ်သားပြည်သူများ ထိခိုက်၊ သေဆုံးကြရပြီး သေဆုံးသူများအနက် အသက် ၇နှစ်နှင့် ၁၂နှစ် အရွယ် မိန်းကလေးငယ် ညီအစ်မ နှစ်ဦးလည်း ပါဝင်ခဲ့သည်။
စစ်ဘေးရှောင်ရင်း စစ်ကောင်စီလက်ချက်ကြောင့် လက်နက်ကြီးထိမှန်ကာ ရုတ်တရက် သေဆုံးခဲ့ရသည့် သမီးငယ်နှစ်ဦးအတွက် ကျန်ရစ်သူ ကယန်းတိုင်းရင်းသား မိဘနှစ်ဦးမှာ ဖြေမဆည်နိုင်အောင် ယူကြုံးမရ ဖြစ်ကြရသည်။
“ဘုရားကျောင်းဝင်းထဲမှာ သေတယ်ဆိုတော့ ဘုရားသခင် ခေါ်တယ်လို့ပဲ ပြောရမှာပေါ့။ အရေးတော်ပုံအောင်မှ ရမယ်။ လူတွေအားလုံး ခက်ခဲနေကြပြီ” ဟု သမီးနှစ်ဦး ဆုံးရှုံးလိုက်ရသည့် ဖခင်က ပြောသည်။
စက်တင်ဘာ ၁၆ရက်၊ နံနက်အစောပိုင်းတွင် စစ်ကောင်စီတပ် ပစ်ခတ်မှုကြောင့် မွေတော်ဘုန်းကြီးကျောင်းဆောင်ထဲ လက်နက်ကြီးကျခဲ့ရာ ထိုကျောင်းတွင် ယာယီခိုလှုံနေသည့် အရပ်သား ၅ဦး သေဆုံးခဲ့ပြီး ၁၀ဦးကျော် ပြင်းထန်ဒဏ်ရာ ရခဲ့သည်။
