စစ်ကိုင်းတိုင်းဒေသကြီးအတွင်းရှိ ဖရဲနှင့်သခွားစိုက်ခင်းများတွင် တရားမဝင်ဝင်ရောက်လုပ်ကိုင်နေသည့် နိုင်ငံခြားသားများကို တွေ့ရှိခဲ့ပြီး စိုက်ခင်းများတွင် အစိုးရ ခွင့်မပြုသည့် စိုက်ပျိုးရေးဆေးများ သုံးစွဲနေကြောင်း စစ်ကိုင်းတိုင်း စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီး က လွှတ်တော်တွင် ယနေ့ ပြောကြား ခဲ့သည်။
မြန်မာ – တရုတ်နယ်စပ် ကုန်သွယ်ရေးစခန်း မူဆယ် ၁၀၅မိုင်မှတဆင့် တရုတ်နိုင်ငံဈေးကွက်သို့ တင်ပို့နေသည့် တရုတ်ဖရဲနှင့် သခွားမွှေးများ အဓိကစိုက်ပျိုးရာ မြန်မာနိုင်ငံအလယ်ပိုင်းရှိ စိုက်ခင်းများတွင် ဥပဒေချိုးဖောက်ပြီး နေထိုင်သည့် နိုင်ငံခြားသား ၃၈ဦးအား ၂၀၁၇ နှင့်၂၀၁၈အတွင်း ပြည်နှင်ဒဏ်ပေးခဲ့ပြီး တစ်ဦးကို တရားစွဲထားကြောင်း ဝန်ကြီးဦးကမ်ဇာမုံက လွှတ်တော်တွင် ပြောကြားခဲ့သည်။
ဘုတလင်အမတ် ဦးအောင်ကျော်က တရုတ်ဖရဲနှင့်သခွားစိုက်ခင်းများရှိ တရားမဝင် နိုင်ငံခြားသားအလုပ်သမားများအကြောင်း လွှတ်တော်တွင်း မေးခွန်းထုတ်စဉ် ဝန်ကြီးက ယင်းကဲ့သို့ ဖြေကြားခဲ့ခြင်းဖြစ်ပြီး တစ်လလျှင်တစ်ကြိမ် နိုင်ငံခြားသားထိန်းသိမ်းစိစစ်ရေးလုပ်ငန်း လုပ်ကိုင်နေသည်ဟုလည်း ဆိုသည်။
ပြည်နှင်ဒဏ်ပေးခံရသူများမှာ မည်သည့်နိုင်ငံသားဖြစ်ကြောင်း လွှတ်တော်တွင်း ထည့်သွင်းပြောကြားခြင်း မရှိသော်လည်း တရုတ်နိုင်ငံသားအများစု ဖြစ်နိုင်ကြောင်း ဦးအောင်ကျော်က Myanmar Now ကို ပြောသည်။
တရုတ်နိုင်ငံက အဓိကဝယ်ယူခဲ့ပြီးနောက် ဖရဲနှင့်သခွားစိုက်ခင်းများသည် စစ်ကိုင်းတိုင်းတွင် တစ်ဟုန်တိုး ထိုးတက်လာခဲ့ပြီးနောက် ယင်းဒေသတွင် ၂၀၁၇ – ၂၀၁၈ ဘဏ္ဍာရေးနှစ် အတွင်း ဖရဲနှင့် သခွားစိုက်ခင်း ဧက ၃၁၀၀၀ ကျော်အထိ ရှိလာခဲ့သည်။
အဆိုပါစိုက်ခင်းများတွင် မြန်မာစိုက်ပျိုးရေးဌာနများ၏ ခွင့်ပြုချက်မဲ့ ပိုးသတ်ဆေး၊ ဓာတ်မြေသြဇာများ သုံးစွဲနေသည်ကိုလည်း စိုက်ပျိုးရေးအရာရှိများက စစ်ဆေးတွေ့ရှိခဲ့ကြောင်း ဝန်ကြီးက ဆိုသည်။
ပြီးခဲ့သည့်နှစ်က ဘုတလင်မြို့နယ်အတွင်း မြန်မာနိုင်ငံအတွင်း မှတ်ပုံမတင်ထားသည့် မြေသြဇာများကို ဖရဲနှင့် သခွားစိုက်ခင်းများတွင် အသုံးပြုခဲ့သည့် ကုမ္ပဏီနှစ်ခုကို တရားစွဲဆိုခဲ့ကြောင်း ဝန်ကြီးက ဆိုသည်။ ၎င်းတို့ထံမှ တရုတ်စာတန်းပါ ရွက်ဖျန်းမြေသြဇာထုပ် ၁၅၀၀ နီးပါး သိမ်းဆည်းရမိခဲ့သည်ဟုလည်း ထည့်သွင်းပြောကြားခဲ့သည်။
ဒေသတွင်းမှ စိုက်ပျိုးရေးဆေးရောင်းချသူများနှင့် ကုမ္ပဏီများကိုလည်း မြန်မာအစိုးရထံ မှတ်ပုံမတင်ထားသည့် စိုက်ပျိုးရေးဆေးများ မရောင်းချရန် အကြောင်းကြားထားကြောင်း ဝန်ကြီးက ဆိုသည်။
