အမျိုးသမီးနှင့် သက်ကြီးရွယ်အို အများစု ခိုလှုံနေထိုင်သည့် ကရင်နီ(ကယား)ပြည်နယ်အတွင်းရှိ စစ်ရှောင်စခန်းကို ပြီးခဲ့သည့် ကြာသာပပေးနေ့ညပိုင်းက ဗုံးကြဲခံရမှုကြောင့် စစ်ဘေးရှောင်ပြည်သူ ကိုးဦး ပွဲချင်းပြီး သေဆုံးခဲ့ရသည်။ သေဆုံးသူ ကိုးဦးအနက် ခြောက်ဦးမှာ တစ်မိသားစုထဲဖြစ်ပြီး၊ ၎င်းတို့မှာ မုဆိုးမမိခင်နှင့် သားသမီးငါးဦးတို့ ဖြစ်ကြသည်။ ‘ဘန်ကောက်’ ဟု အမည်ရသည့် အထက်ပါ စစ်ဘေးရှောင်စခန်းတွင် လူဦးရေ ၆၀၀ ကျော် နေထိုင်ကြပြီး၊ ၎င်းတို့အတွက် ပြန်လည်ထူထောင်ရေးနှင့် နေထိုင်စားသောက်ရေး အခက်အခဲများစွာ ရှိနေသည်။ အာဏာသိမ်း စစ်တပ်သည် ၎င်းတို့ လက်လွတ်ဆုံးရှုံးခဲ့ရသည့် နယ်မြေများကို လေကြောင်းဖြင့် ဗုံးကြဲတိုက်ခိုက်မှုများ အဆက်မပြတ် လုပ်ဆောင်လာသည်။ ရိုက်ကူး၊ တင်ဆက် – မြတ်မိုးသူ
