နှစ်ပေါင်းနှစ်ဆယ်ကျော်ကြာ သိမ်းဆည်းခံထားရသော လယ်ယာမြေများပြန်လည်ရရှိစေရန် မန္တလေးတိုင်းဒေသကြီး၊ ကျောက်ဆည်မြို့နယ်၊ ဆူးလေကုန်းအုပ်စုမှ ယနေ့ ဧပြီ ၆ ရက်နေ့တွင် တောင်သူများက ထွန်တုံးတိုက်ပွဲ ဆင်နွှဲကြသည်ကို တွေ့ရသည်။
“မိသားစုစားဝတ်နေရေး အခက်အခဲတွေဖြစ်လို့။ ဌာနဆိုင်ရာတွေ အမျိုးမျိုးတင်ပြပေမဲ့ အရေးယူဆောင်ရွက်မပေးလို့ ခုလို ထွန်တုံးတိုက်ပွဲဆင်နွှဲရတာပါ” ဟု မြေသိမ်းခံတောင်ရသူ တစ်ဦးဖြစ်သည့် ကိုအေးကျော်က ပြောသည်။
တောင်သူ ၂၄ ဦး သိမ်းဆည်းခံရသည့်မြေ ၂၂၂ ဧက ရှိကြောင်း၊ သိမ်းသူတို့မှာ ဌာနဆိုင်ရာများ ဖြစ်ပြီး သီးစားအငှားချ စိုက်ပျိုးထားကြကြောင်း ၎င်းက ဆက်ပြောသည်။
“စီမံကိန်းစားကျက်မြေဆိုပြီး သိမ်းဆည်းခဲ့ပြီး စီမံကိန်း အကောင်အထည် မဖော်ခဲ့ဘဲ သူတို့ အသီးသီး ခွဲဝေယူပြီး စီးပွားရေးလုပ်ငန်းရှင်တို့ကို အငှားချထားတာ နှစ်ပေါင်း ၂၀ ကျော်ပြီ။ ၂၀၁၂ မှာ ဌာနဆိုင်ရာအသီးသီးကို တိုင်ခဲ့ပေမယ့် ဘာမှ လုပ်မပေးခဲ့ဘူး” ဟု ၎င်းက ဆိုသည်။
မြေ ၁၂ ဧက သိမ်းခံရသူ တောင်သူအမျိုးသမီးတစ်ဦးမှာ ဒေါ်တုတ် ဖြစ်သည်။
“ဘိုးဘွားပိုင်မြေတွေပါ၊ အထောက်အထားတွေ အကုန်ရှိပါတယ်၊ သိမ်းဆည်းခံရကတည်းက သားသမီးတွေလည်း အခြား အငှား ထွက်လုပ်နေရပါတယ်” ဟု ဒေါ်တုတ်က ပြောသည်။
