ဖောက်ခွဲရေးပစ္စည်းများနှင့်အတူ မန္တလေးတွင်ဖမ်းဆီးရမိခဲ့သော ရက္ခိုင့်တပ်တော်(AA) တပ်ဖွဲ့ဝင်သုံးဦးနှင့် ဆက်စပ်တရားခံသုံးဦးကို မန္တလေး ခရိုင်တရားရုံးက အကြမ်းဖက်မှုတိုက်ဖျက်ရေး ဥပဒေဖြင့် ယနေ့စွဲချက်တင်လိုက်သည်။
ယင်းအမှုတွင် တရားလိုပြသက်သေ ၁၉ ဦးကို စစ်ဆေးခဲ့ပြီး စစ်ဆေးပေါ်ပေါက်ချက်အရ အကြမ်းဖက်တိုက်ဖျက်ရေးဥပဒေပုဒ်မ ၅၁ – ဂ နှင့် ၅၂ – က တို့ဖြင့် စွဲချက်တင်ခဲ့ခြင်းဖြစ်ကြောင်း မန္တလေး ခရိုင်တရားရုံး ပြန်ကြားရေးအရာရှိ ဦးကျော်ကျော်မိုးကဆိုသည်။
၂၀၁၉ စက်တင်ဘာ ၁၀ တွင် ချမ်းမြသာစည်မြို့နယ်ရှိ နေအိမ်တစ်လုံးမှ ဂြိုဟ်တုဖုန်း အလုံး ၄၀ ၊ ရှရှားထုတ် မှန်ပြောင်း ၃၀ ခုနှင့်အတူ ယမ်းတုံးများ၊ ဖောက်ခွဲရေးသုံး ဆက်စက်ပစ္စည်းများကို ဖမ်းဆီးရမိခဲ့ကြောင်း ရဲတပ်ဖွဲ့က သတင်းထုတ်ပြန်ခဲ့သည်။
နောက်တစ်လအကြာတွင်စတင်တရားစွဲတင်ခဲ့သော ယင်းအမှုတွင် ဆက်စပ်ဖမ်းဆီး တရားစွဲဆိုခံထားရသူ ကိုးဦးရှိပြီး ခြောက်ဦးကိုဖမ်းဆီးရမိကာ သုံးဦးထွက်ပြေးတိမ်းရှောင်နေသည်။
ဖမ်းဆီးရမိသော တရားခံ ခြောက်ဦးတွင် AA ဒုအရာခံဗိုလ်တစ်ဦးနှင့် ဒုတပ်ကြပ် နှစ်ဦးပါဝင်ပြီး ဆက်စပ်တရားခံ သုံးဦးမှာ ကျောက်အရောင်းအဝယ်သမားနှင့် ပြည်တွင်းကားဂိတ်မှူး တစ်ဦးဖြစ်ကြောင်း တရားရုံးမှတ်တမ်းများအရ သိရသည်။
၎င်းတို့ကို အကြမ်းဖက်မှု တိုက်ဖျက်ရေး ဥပဒေပုဒ်မ ၅၁(ဂ) ၊ ၅၂ (က) တို့ဖြင့် ၂၀၁၉ အောက်တိုဘာ ၈ တွင် ဒုရဲမှူးဇော်နိုင်က တရားစွဲဆိုထားခြင်းဖြစ်ပြီး ယင်းအမှုနှင့်ပတ်သက်၍ ထွက်ပြေးနေသူ သုံးဦးကိုလည်း တရားခံပြေးအဖြစ် တရားရုံးက ကြေညာထားသည်။
ပုဒ်မ ၅၁ (ဂ) မှာ ထောင်ဒဏ် ၁၀ နှစ်အထိ ချမှတ်နိုင်ပြီး ပုဒ်မ ၅၂ (က) မှာ ထောင်ဒဏ် ၇ နှစ်အထိ အများဆုံးချမှတ်နိုင်သော ပုဒ်မများဖြစ်သည်။
