စစ်အာဏာရှင်ဆန့်ကျင်ရေး ဆန္ဒပြပွဲများတွင် ပါဝင်မှုဖြင့် ဖမ်းဆီးထိန်းသိမ်းခံထားရသူများအနက် ယနေ့ (မတ် ၂၄) တွင် ၇၀၀ ကျော် ပြန်လည်လွတ်မြောက်လာနိုင်ခြေရှိသည်ဟု ဥပဒေရေးရာ အကူအညီပေးနေသည့် ရှေ့နေများက ယနေ့နံနက်ပိင်းတွင် Myanmar Now ကို ပြောကြားသည်။
“ကျွန်မအမှုသည် တစ်ယောက်က ဒီနေ့ရုံးချိန်ရှိတယ်။ ဒီနေ့ ပေးမဝင်သေးဘူး။ ထောင်ပိုင်က ပြန်လွတ်မယ့်သူတွေကို ဩဝါဒပေးနေတယ်။ တော်တော်များများ (ပြန်လွတ်မည့်သူများ) က အချုပ်ကားပေါ်ရောက်နေပြီ” ဟု ပြည်သူ့ရှေ့နေများအဖွဲ့မှ ရှေ့နေတစ်ဦးဖြစ်သူ ဒေါ်နီလာခိုင်က ပြောသည်။
အာဏာသိမ်းစစ်ကောင်စီက ပြန်လွှတ်ပေးမည့် ဖမ်းဆီးထိန်းသိမ်းခံထားရသူများတွင် နိုင်ငံတော် အကြည်ညိုပျက်စေမှု ပုဒ်မ ၅၀၅ (က) ဖြင့် တရားစွဲဆိုခံထားရသူများလည်း ပါဝင်သည်ဟု ၎င်းက ဆိုသည်။
စစ်အာဏာသိမ်းသည့် ဖေဖော်ဝါရီ ၁ ရက်မှ ယမန်နေ့ (မတ် ၂၃) အထိ တစ်နိုင်ငံလုံးအတိုင်းအတာဖြင့် အာဏာသိမ်းစစ်ကောင်စီ၏ အကြမ်းဖက်ပစ်ခတ် ဖမ်းဆီးမှုများကြောင့် သေဆုံးသူ ၂၇၅ ဦးရှိကာ ဖမ်းဆီးထိန်းသိမ်းခံထားရသူ ၂၈၀၀ ကျော်ရှိသည်ဟု နိုင်ငံရေးအကျဉ်းသားများ ကူညီစောင့်ရှောက်ရေး အသင်း (AAPP) က ထုတ်ပြန်ထားသည်။
အင်းစိန်အကျဉ်းထောင်ရှေ့တွင် ရောက်ရှိနေသည့် “သင့်အတွက်ရှေ့နေများအဖွဲ့” မှ တာဝန်ခံ ရှေ့နေ ကမူ သက်ဆိုင်ရာမြို့နယ်အသီးသီးရှိ ရှေ့စခန်းများတွင်သာ စောင့်ဆိုင်းနေရန် ဖမ်းဆီးထိန်းသိမ်းခံ ထားရသူများ၏ မိသားစုဝင်များကို တိုက်တွန်းသည်။
“သက်ဆိုင်ရာ နယ်မြေရဲစခန်းမှာပဲ အေးဆေးဆေးဆေးလေး သွားပြီးတော့ စောင့်နေတာက ပိုပြီးတော့ကောင်းပါတယ်။ ကျွန်တော်တို့ ရှေ့နေအဖွဲ့တွေလည်း ရှိတာကြောင့် အင်းစိန်ထောင်ရှေ့ကနေ လွတ်တာနဲ့ ကျွန်တော်တို့ကနေ ဖုန်းနဲ့ဆက်သွယ်ပေးပါ့မယ်” ဟု ၎င်းက ပြောသည်။
