ကုလသမဂ္ဂအဖွဲ့ဝင်နိုင်ငံများသည် မြန်မာအာဏာသိမ်းစစ်ကောင်စီအပေါ် ပြင်းထန်သော ဒဏ် ခတ် အရေးယူမှုများဖြင့် အားကောင်းညီညွတ်သည့်လက်တွေ့လုပ်ဆောင်မှုစံချိန်သစ်တင်ရန် အချိန်ကျရောက်ပြီဟု မြန်မာ့လူ့အခွင့်အရေး ဆိုင်ရာအထူးအစီရင်ခံစာတင်သွင်းသူက ယနေ့ တိုက် တွန်းသည်။
မြန်မာ့လူ့အခွင့်အရေးဆိုင်ရာအထူးအစီရင်ခံစာတင်သွင်းသူ Tom Andrews က မတ်လ ၁၂ ရက် တွင် ကုလသမဂ္ဂလူ့အခွင့်အရေးကောင်စီသို့ မိန့်ခွန်းပြောကြားခဲ့ပြီးနောက် ကုလအဖွဲ့ဝင်နိုင်ငံများ စစ်ကောင်စီအပေါ် ပြင်းထန်သော ဒဏ်ခတ်အရေးယူမှု စံချိန်သစ်တင်ရန် ၎င်း၏တွစ်တာ စာမျက်နှာမှတစ်ဆင့် ယနေ့ ထပ်မံတိုက်တွန်းသည်။
မြန်မာစစ်ကောင်စီက ကုလသမဂ္ဂလူ့အခွင့်အရေးကောင်စီမှတစ်ဆင့် နိုင်ငံတကာအသိုက်အဝန်းသို့ တင်ပြချက်များမှာ မျက်နှာပြောင်တိုက်ကာ စိတ်ပျက်ဖွယ်ရာဖြစ်သည်ဟု Tom Adrews က ကောင်စီ၌ ပြောကြားခဲ့သည်။
စစ်ကောင်စီကိုယ်စားလှယ်က ‘အာဏာပိုင်များသည် အကြမ်းဖက်သော ဆန္ဒပြမှုများအား အင်အားမသုံးရန် အစွမ်းကုန် ထိန်းချုပ်နေပါသည်’ သို့ ကောင်စီသို့ ပြောကြားခဲ့သည်။
ထိုပြောကြားမှုနှင့် စစ်ကောင်စီသည် ‘ဒီမိုကရေစီ’ ကို ကတိစောင့်တည်သည်ဟူသော စကား ရပ်များမှာ စိတ်ပျက်ဖွယ်ကောင်းလှသည်ဟု Tom Andrews က ကောင်စီသို့ ပြောကြားခဲ့သည်။
စစ်ကောင်စီ၏ ပြောကြားချက်များနှင့် လုပ်ဆောင်ချက်များမှာ စိတ်ညစ်ညူးဖွယ်ကောင်းလှသော်လည်း မြန်မာပြည်သူပြည်သားများ၏ လုပ်ဆောင်မှုများမှာ ကမ္ဘာတစ်ဝန်းမှ ချီးကျူး အားကျဖွယ်ပင်ဖြစ်ကြောင်း အထူးအစီရင်ခံစာတင်သွင်းသူက ဆက်ပြောသည်။
“ငြိမ်းချမ်းသော၊ မဆုတ်မနစ်သော ဇွဲဖြင့် ပြည်သူသန်းပေါင်းများစွာ တွန်းလှန်နေမှုသည် ၎င်းတို့ နိုင်ငံ ကာကွယ်ရန်အတွက်၊ ၎င်းတို့၏ကလေးသူငယ်များအနာဂတ်များအတွက်ပင်ဖြစ်သည်” ဟု ဟု Tom Andrews က မတ်လ ၁၂ ရက်တွင် ကောင်စီသို့ ပြောကြားခဲ့သည်။
ထို့အပြင် မြန်မာနိုင်ငံတွင် တရားမျှတမှုရှိရေး၊ တာဝန်ယူရေး၊ အကြမ်းဖက်ခြိမ်းခြောက်ခြင်းမှ ကင်းလွတ်နိုင်ရေး၊ လူ့အခွင့်အရေးများရရှိစေရေး စသည်တို့အတွက် နိုင်ငံတကာအသိုက်အဝန်းနှင့် ကုလသမဂ္ဂအဖွဲ့ဝင်နိုင်ငံအားလုံးက လက်တွေ့လုပ်ဆောင်ရန်နှင့် ထိုသို့ဆောင်ရွက်ရာတွင် နိုင်ငံပေါင်းများစွာ၊ နိုင်ငံတကာမှ လူထု၏ညီညွတ်မှု၊ မြန်ဆန်ထိရောက်မှုရှိသော လုပ်ထုံးလုပ်နည်း အသစ်များနှင့်လုပ်ဆောင်ရမည်ဟု အထူးအစီရင်ခံစာတင်သွင်းသူက တိုက်တွန်းခဲ့သည်။
