၂၀၂၁ တွင် အနည်းဆုံး အသက် ၃၀ ကျော်ဝန်းကျင် ရှိနေသူများပင်လျှင် သန်းခေါင်ယံဧည့်ဆိုးအကြောင်း ကောင်းကောင်းသိကြသည်။
ကိုလိုနီအုပ်ချုပ်ရေးမှ စတင်မွေးဖွားခဲ့သော သန်းခေါင်ယံဧည့်ဆိုးကို စစ်အုပ်ချုပ်ရေးခေတ်အဆက်ဆက် ဆင့်ကဲမွေးမြူခဲ့ကြသည်။
ဖေဖော်ဝါရီ ၁ အာဏာသိမ်းအပြီး ပူပူနွေးနွေးဖွဲ့စည်းလိုက်သော နစအစစ်ကောင်စီကလည်း NLD အစိုးရလက်ထက် ပျောက်ကွယ်သွားသည့် သန်းခေါင်ယံဧည့်ဆိုးကို ပြန်အသက်သွင်းရန် ကြိုးစားနေပြီဖြစ်သည်။
ဧည့်ဆိုးကြီး အသက်ဝင်သည့်အခါ လူအများ အိပ်မောကျနေသည့် ညဉ့်နက်သန်းခေါင်တွင် ကြိုတင်အကြောင်းမကြားဘဲ အိမ်ရှေ့တံခါးပေါက်သို့ ရောက်ချလာမည် ။ တံခါးကို ခေါက်မည်။ လူစိမ်းရှိလား စစ်မည်ဆိုကာ တစ်အိမ်လုံး ဗြောင်းဆန်အောင် ရှာဖွေကောင်းရှာဖွေလိမ့်မည်။ လင်မယား သို့မဟုတ် သားပျိုသမီးပျိုတို့၏ ခြင်ထောင်ကို လှန်ကြည့်ကြလိမ့်မည်။
ထိုအဖြစ်အပျက်များကို ဧည့်ဆိုးကြီး တန်ခိုးထွားစဉ် တစ်နည်းအားဖြင့် မည်သူမျှ လွတ်လပ်စွာ သွားလာခွင့်မရှိဘဲ ရပ်ကွက်အုပ်ချုပ်ရေးရုံးထံ ဧည့်စာရင်းမှန်မှန် တိုင်ရသည့်ခေတ်တွင် ကြုံခဲ့ရသူများ ရှိသည်။
10 D လှုပ်ရှားမှုဟု ထင်ရှားသော ၁၉၉၁၊ ဒီဇင်ဘာ ၁၀ ကျောင်းသားလှုပ်ရှားမှုဖြင့် ထောင် ၁၅ နှစ် ချမှတ်ခံခဲ့ရသည့် ကိုအောင်မျိုးကျော်က နိုင်ငံရေးသမားများကို ပုဒ်မတပ်စရာ မရှိပါက ဧည့်စာရင်းမှုဖြင့် ထောင်ချတတ်သည့်အပြင် ဧည့်စာရင်းစစ်သည်ဟု အကြောင်းပြကာ လူရှာဖွေခြင်းထက် စာရွက်စာတမ်းများ၊ ပစ္စည်းများ မွှေနှောက်ရှာဖွေပြီး မိသားစုဝင်များကိုလည်း ဒုက္ခပေးကြောင်းဆိုသည်။
“ကျွန်တော်တို့ ထောင်ကျနေတဲ့အချိန်မှာ ကျွန်တော်တို့ အိမ်တွေကို ဝင်စစ်တယ်။ ကျွန်တော်တို့ ညီမငယ်တွေရဲ့ ခြင်ထောင်တွေကို လှန်တယ်။ အတင်းဝင်ရှာတယ်။ ကျွန်တော်တို့ကို ထောင်ထဲမှာ ထည့်ထားတာ အားမရဘူး။ နောက်က မိသားစုကိုပါ စိတ်ဒုက္ခပေးတာ။ မိသားစုက တံခါးလာခေါက်ပြီဆိုရင် စိုးရိမ်နေရတယ်။ စိတ်ပူတယ်။ စိတ်ဒုက္ခတွေ ရောက်တယ်” ဟု ၎င်းက ပြောသည်။
အစိုးရက မနှစ်မြို့သည့် နိုင်ငံရေးသမားများကို ရှာဖွေပေးသည့်စနစ်တွင် သာမန်မိသားစုများလည်း သောကမျိုးစုံခံစားခဲ့ရကြောင်း ထိုခေတ်ကို ပြန်ပြောင်းပြောပြသူများက ဆိုသည်။
သန်းခေါင်ယံ ဧည့်ဆိုး
အမေရိကန်ပြည်ထောင်စု၌ နေထိုင်သည့် အသက် ၃၀ အရွယ် ဆရာဝန် ဒေါက်တာချစ်ဆွေသည် စစ်အစိုးရလက်ထက် ၂၀၀၀ ပြည့် ကာလများကို အမှတ်ရနေသေးသည်။
မန္တလေးမှ ရန်ကုန်၊ ပန်းဘဲတန်းမြို့နယ်သို့ ပြောင်းရွှေ့နေထိုင်သည့်အခါ မိသားစုသန်းခေါင်စာရင်း (အိမ်ထောင်စုစာရင်း) ရရှိရန် ခက်ခဲသောကြောင့် ဧည့်စာရင်းတိုင်ကြားရတော့သည်။
အိမ်ထောင်စုဇယား မရှိပါက တစ်ပတ်တစ်ခါ ပုံမှန်တိုင်ရပြီး အိမ်ထောင်စုစာရင်း ရှိပါကလည်း နေအိမ်တွင် ဧည့်သည်ရောက်လျှင် ဧည့်စာရင်းမတိုင်ပါက ငွေဒဏ် သို့မဟုတ် အိမ်ထောင်ဦးစီးကို ထောင် ၇ ရက် ပြစ်ဒဏ်ချနိုင်သည်။
ထို့ကြောင့် မိသားစု ၉ ယောက်ရှိသော ဒေါက်တာကျော်ဆွေတို့မိသားစုသည် တစ်ပတ်လျှင်တစ်ခါ ရပ်ကွက်ရုံးတွင် မှန်မှန်ဧည့်စာရင်းတိုင်ရတော့သည်။
ငွေကြေးပေးရန် မသတ်မှတ်ထားသော်လည်း အလှူငွေဟု ခေါ်မလား လက်ဖက်ရည်ဖိုးဆိုလား မသိသည့် ဧည့်စာရင်းတစ်ခါတိုင်လျှင် ငါးရာ၊ တစ်ထောင် ပေးရလေ့ရှိသည်။
“လာစစ်လို့ ဧည့်စာရင်းမတိုင်ထားရင် ကျွန်တော့အဖေ အဖမ်းခံရမှာလေ။ ရပ်ကွက်အုပ်ချုပ်ရေးမှူး အရက်သမားက ညဉ့်သန်းခေါင်ကျော်မှ မူးရူးပြီးရောက်လာတာ။ (ဧည့်စာရင်း) တခြားတိုင်ချင်တဲ့ သုံး၊ လေးယောက်နဲ့ စောင့်ရတာ ” ဟု ဒေါက်တာချစ်ဆွေက ပြောသည်။
ဧည့်စာရင်းက ပုံမှန်စစ်သည်တော့ မဟုတ်ပေ။ သို့ရာတွင် ညကြီးအချိန်မတော်မှ “ဧည့်စာရင်း စစ်မယ်ဟေ့” ဆိုတာ ဓာတ်မီးတဝင်းဝင်းနဲ့ ရောက်ချလာလေ့ရှိသည်။
ထိုအခါ မိသားစုအကုန်လုံး ထ၍ တိုင်ကြားထားသော ဧည့်စာရင်းစာရွက်ကို ပြ၍ မိသားစုအကုန်လုံး လူစေ့ တန်းစီပြရသည်။ အိပ်နေသော ကလေးရှိသည်ဆိုရင်လည်း မပြောမဆို ခြင်ထောင်လှန်ကြည့်ကာ စစ်ဆေးတတ်သည်။
“ညဉ့်အိပ်ညဉ့်နေ ဧည့်သည်တွေလည်း လက်မခံရဲဘူး။ မလွဲသာမရှောင်သာ လာပြီဆိုလည်း ညတွင်းချင်း ဧည့်စာရင်းတိုင်၊ ရပ်ကွက်အုပ်ချုပ်ရေးမှူး အဲဒီကောင်မလာမချင်း ထိုင်စောင့်” ဟု ၎င်းက ဆိုသည်။
လက်ရှိတွင် အမေရိကန်ပြည်ထောင်စု၌ နေထိုင်သော ဒေါက်တာချစ်ဆွေအတွက် အဓိကကွာခြားမှုမှာ အကြောက်တရားသာဖြစ်သည်ဟု ဆိုသည်။
“ကြောက်လန့်ပြီး မရှင်သန်ချင်ဘူး။ ကိုယ်တစ်ခုခု ပြောလိုက်လို့ ကြောက်နေရမှာ၊ ကိုယ့်ကို တစ်ခုခုထိခိုက်သွားမှာ၊ ကိုယ့်မိသားစု ထိခိုက်သွားမှာ၊ ဒီနိုင်ငံမှာ အဲဒါတွေ ကြောက်ဖို့ မလိုဘူး။ မြန်မာပြည်မှာ စစ်အုပ်ချုပ်မှုသာ ရှိခဲ့ရင် အဲဒါတွေ တကယ်ကြောက်ရတော့မှာ” ဟု ၎င်းက ပြောသည်။
နိုင်ငံရေးသမားများနှင့် ၎င်းတို့၏ မိသားစုဝင်ကို စိတ်ဒုက္ခပေးရန်အပြင် အိမ်ရှင်များက အိမ်ငှားများကို မောင်းထုတ်ချင်သည့်အခါတိုင်း ဧည့်စာရင်းမတိုင်ပေးသောနည်းဖြင့် အနိုင်ကျင့်နှိပ်စက်မှုများ၊ ရပ်ကွက်အုပ်ချုပ်ရေးမှူးများ၏ ငွေတောင်းအနိုင်ကျင့်မှုများ ရှိခဲ့ကြောင်း တရားလွှတ်တော်ရှေ့နေ ဦးကြီးမြင့်က ဆိုသည်။
“အိမ်ရှင်တွေကလည်း လက်မခံရဲ၊ လက်မခံရဲလို့ ဧည့်စာရင်းတိုင်တော့လည်း လိုက်ဖမ်း။ အဲဒီလို ခေတ်အဆက်ဆက်က နိုင်ငံရေးသမားတွေကို အဓိကနှိပ်စက်ခဲ့တဲ့ ဥပဒေပဲဗျ။ အာဏာရှိတဲ့သူနဲ့ ပစ္စည်းရှိတဲ့သူဘက်က ကာကွယ်တဲ့ ဥပဒေအနေနဲ့ ဧည့်စာရင်းက ပြဋ္ဌာန်းခဲ့တာ။ ဘယ်နိုင်ငံမှလည်း ဧည့်စာရင်းဥပဒေဆိုတာ မရှိဘူး” ဟု ၎င်းက ဆိုသည်။
စစ်အစိုးရ၏ လူဖမ်း၊ လူစစ်ကို အထောက်အကူပေးသည့် ဧည့်စာရင်းတိုင်ခြင်းသည် ၂၀၁၆ ခုနှစ်လောက်ထိ သက်ဆိုးရှည်ခဲ့သည်။
မြန်မာနိုင်ငံ စစ်အာဏာရှင်လက်အောက်သို့ ကျရောက်ပြီး ရာစုနှစ်ဝက်နီးနီးကြာမြင့်ပြီးနောက် ပထမဆုံးအရပ်သားအစိုးရဖြစ်သည့် အမျိုးသားဒီမိုကရေစီအဖွဲ့ချုပ်အစိုးရထက်ထက်၌ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေ၏ ပုဒ်မ ၁၃ (ဆ) ဖြစ်သည့် အခြားရပ်ကွက် သို့မဟုတ် ကျေးရွာအုပ်စုမှ လာရောက်တည်းခိုသော ဧည့်သည်များအတွက် ဧည့်စာရင်းတိုင်ကြားခြင်းကို လက်ခံ၊ ခွင့်ပြု၊ စစ်ဆေးခြင်းနှင့် ပျက်ကွက်ပါက အရေးယူခြင်းဆိုသည့် အချက်များကို လွှတ်တော်၌ ၂၀၁၆ တွင် တရားဝင်ပယ်ဖျက်ခဲ့သည်။
ဧည့်စာရင်း ပြန်အသက်သွင်း
အာဏာရ NLD ပါတီ ၂၀၂၀ အထွေထွေရွေးကောက်ပွဲကို အပြတ်အသတ် ထပ်မံအနိုင်ရသည့်အခါ တပ်မတော်က အာဏာသိမ်းယူပြီးနောက် ဖွဲ့စည်းလိုက်သည့် စစ်ကောင်စီသည် ဧည့်စာရင်းဥပဒေအပါအဝင် လူ့အခွင့်အရေးအလေးထား၍ NLD သက်တမ်းအတွင်း အတည်ပြုခဲ့သည့် အခြားသော ဥပဒေများကို ပြောင်းလဲအတည်ပြုနေသည်။
ယင်းဥပဒေအရ ညဉ့်အိပ်ညဉ့်နေ ဧည့်သည်လာရောက်ခြင်းနှင့် ပြန်လည်ထွက်ခွာသွားခြင်းတို့ကို ရပ်ကွက်အုပ်ချုပ်ရေးမှူးထံ ခွင့်တောင်းရမည် ဖြစ်သည်။
ဧည့်စာရင်းတိုင်ရန် ပျက်ကွက်ပါက ဒဏ်ငွေ တစ်သောင်း သို့ မဟုတ် ထောင်ဒဏ် ၇ ရက်ကို သက်ဆိုင်ရာတရားရုံးက ချမှတ်ရမည်ဟု ပါရှိသည်။ စစ်ကောင်စီက ယင်းအချက်များကို အာဏာသိမ်းပြီး ၁၃ ရက်မြောက်တွင် ပြဋ္ဌာန်းခြင်းဖြစ်သည်။
စစ်အာဏာရှင်လက်ထက်များအတိုင်း ဧည့်စာရင်းတိုင်ရတော့မည်ဟု စစ်ကောင်စီက ကြေညာလိုက်သည့်အခါ သန်းခေါင်ယံအိပ်မက်ဆိုးကြီးများ ပြန်လာတော့မည်၊ ဧည့်ဆိုးကြီးတွေ ပြန်အသက်ဝင်လာတော့မည်ဟု ထိုခေတ်များကို ဖြတ်သန်းသူများက ခါးခါးသီးသီး ငြင်းဆန်နေကြခြင်း ဖြစ်သည်။
အာဏာသိမ်းမှုကို ပြည်လုံးကျွတ်ဆန့်ကျင်နေသည့် အချိန်တွင် ဧည့်စာရင်းတိုင်ရမည်ဟု ဥပဒေပြန်လည်ပြဋ္ဌာန်းခြင်းမှာ ဆန္ဒပြသူများကို ဖမ်းဆီးရေးသက်သက်အတွက်ဟု လူအများက နားလည်ကြသည်။
လူရှာစာရင်း
လက်ရှိအချိန်တွင် စစ်အုပ်ချုပ်မှုယန္တရားရပ်တန့်ပြီး အာဏာရှင်စနစ်ပျက်သုဉ်းရေးအတွက် “မတရားသည့် အမိန့်ဟူသမျှ တာဝန်အရ ဖီဆန်ကြ” ဟူသည့် နိုင်ငံ့ဝန်ထမ်းများ ရုံးမတက်ရေးလှုပ်ရှားမှုသည် အလွန်ပြင်းထန်ပြီး ဘဏ်လုပ်ငန်း ရပ်တန့်သည်အထိ ဖြစ်ပေါ်နေသည်။ ၎င်းလှုပ်ရှားမှုသည် Civil Disobedience Movement (CDM) ၏ အစိတ်အပိုင်းတစ်ခုဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP)၏ ထုတ်ပြန်ချက်များအရ ဧည့်စာရင်းတိုင်ရမည့်ဥပဒေ ပြဋ္ဌာန်းခြင်းနှင့်အတူ စစ်အာဏာရှင်ကို အထိနာစေသည့် အာဏာဖီဆန်ရေးလှုပ်ရှားမှု-CDM ၌ ပါဝင်သော ဝန်ထမ်းများ၊ အာဏာရ NLD ပါတီဝင်များအပါအဝင် သတင်းသမားများ၊ နိုင်ငံရေးတက်ကြွလှုပ်ရှားသူများ၊ ကျောင်းသားသမဂ္ဂခေါင်းဆောင်များ၊ ရွေးကောက်ပွဲကော်မရှင်အဖွဲ့ဝင် စသည်ဖြင့် ဖမ်းဆီးခံရသည်မှာ ၅၀၀ ကျော်ပြီဖြစ်သည်။
ဖမ်းဆီးခံရသူအများအပြားသည် ညဉ့်နက်သန်းခေါင်တွင် လက်နက်ကိုင်လုံခြုံရေးတပ်ဖွဲ့ဝင်တို့က အိမ်တံခါးခေါက်၍ မေးမြန်းစရာရှိသည်ဆိုကာ ခေါ်ဆောင်သွားခံရခြင်း ဖြစ်သည်။
စစ်တပ်က အာဏာသိမ်းအပြီး ၈ ရက်အကြာတွင် ပုဒ်မ ၁၄၄ ထုတ်ပြန်၍ ည ၈ နာရီမှ နံနက် ၄ နာရီ အထိ အိမ်အပြင်မထွက်ရ အမိန့်ထုတ်ပြန်ပြီး “သန်းခေါင်ယံ လူဖမ်းပွဲ”ဟု အများက ခေါ်ဝေါ်သည့် ဖမ်းဆီးထိန်းသိမ်းရေးလုပ်ဆောင်မှုများအနက် တချို့ကို မှတ်တမ်းတင်ရိုက်ကူးထားသည့် ရုပ်သံများ အင်တာနက်လူမှုကွန်ရက်တွင် ပျံ့နှံ့နေသည်။
ညဉ့်နက်သန်းခေါင် ဖမ်းဝရမ်းပြသခြင်း မရှိဘဲ ဖမ်းဆီးခေါ်ဆောင်ခြင်းမှာ ဥပဒေနှင့် မညီညွတ်ကြောင်း ဥပဒေကျွမ်းကျင်သူများ ဝေဖန်သံ ညံစီပြီးသည့်နောက် ရပ်ကွက်သို့မဟုတ် ကျေးရွာအုပ်စုအုပ်ချုပ်ရေးဥပဒေ၌ ဖမ်းဝရမ်းမပါဘဲ ရပ်ကွက်အုပ်ချုပ်ရေးမှူးအဆင့်ဖြင့် အိမ်တွင်းဝင်ရောက် စစ်ဆေးရှာဖွေနိုင်သည့် ဧည့်စာရင်းတိုင်ကြားရေးအချက်ကို ယခင် စစ်ကောင်စီခေတ်များအတိုင်း ပြန်လည်ထည့်သွင်းလိုက်သည်။
ကိုယ်ထူကိုယ်ထ ကင်းသမား
ဧည့်စာရင်းဥပဒေ မထုတ်ပြန်မီ သန်းခေါင်ယံလူဖမ်းပွဲ စပြီး တစ်ရက်၊ နှစ်ရက်အတွင်း မြို့ကြီးများတွင် လူထုက ရပ်ကွက်အတွင်း ကိုယ်ထူကိုယ်ထကင်းစောင့်ကြခြင်းဖြင့် ဝင်ရောက်ဖမ်းဆီးခွင့်ကို အဟန့်အတားပြုကြသည်။ ကင်းစောင့်သည့် အစီအစဉ်မှာ ရုတ်တရက် ရောက်လာတတ်သည့် လူဆိုးသူခိုးများရန်မှ ကာကွယ်ရေးအတွက် ပေါ်ပေါက်လာခြင်းဖြစ်သည်။
ပြည်သူများက ရပ်ကွက်အတွင်း လူလာဖမ်းပါက သံပုံးများ တရစပ်တီးလွှတ်၍ ဝိုင်းထားလိုက်ကြပြီး ဖမ်းဆီးခံရမည့်သူကို ကာကွယ်ပေးကြသည်။
စစ်အာဏာရှင်ဆန့်ကျင်ရေး လူထုလှုပ်ရှားမှုသပိတ်ခေါင်းဆောင် အသက် ၂၆ နှစ်အရွယ် အိသဉ္ဇာမောင်က စစ်ကောင်စီ၏ ဧည့်စာရင်းတိုင်ကြားရေးစနစ်မှာ CDM လှုပ်ရှားမှု ပြုလုပ်နေသည့် နိုင်ငံ့ဝန်ထမ်းများကို အရေးယူရန် ဦးတည်နေခြင်းဖြစ်၍ ပြည်သူများက မလိုက်နာဘဲ ဖမ်းဆီးလာပါက မောင်းထုတ်ကြရန် တိုက်တွန်းသည်။
၎င်းတို့ကဲ့သို့ နိုင်ငံရေးတက်ကြွလှုပ်ရှားသူများ၊ ကျောင်းသားသမဂ္ဂအဖွဲ့ဝင်များက ရပ်ကွက်လုံခြုံရေးဆောင်ရွက်ကြရန်နှင့် မတရားသော အမိန့်အာဏာဟူသမျှကို ဆန့်ကျင်ရေးအတွက် စစ်ကောင်စီက ထုတ်ပြန်သော အမိန့် ၊ ညွှန်ကြားချက်များကို မလိုက်နာရန် လှုံ့ဆော်ထားသည်။
AAPP ၏ ရန်ကုန်ရုံးတာဝန်ခံ ကိုအောင်မျိုးကျော်က “ပြည်သူအတွက် အကျိုးပြုတဲ့ ဥပဒေမဟုတ်ဘူး။ ဒီအတွက် လွှတ်တော်ကနေ ဒီဥပဒေကို (ဧည့်စာရင်းတိုင်ရမည့် ဥပဒေ) ပယ်ဖျက်ထားတာ ဖြစ်တယ်။ ဒါကို သူတို့က လက်နက်ကို အားကိုးပြီးတော့ မတရားသဖြင့် ပြန်ပြီးတော့ ပြဋ္ဌာန်းလိုက်တာ ဖြစ်တယ်။ ဒါကြောင့် လိုက်နာမှာလည်း မဟုတ်ဘူး။ ဧည့်စာရင်းတိုင်မှာလည်း မဟုတ်ဘူး။ လိုလည်းမလိုဘူး။ ကျွန်တော်တို့ နိုင်ငံသားတွေဖြစ်တယ်” ဟု ပြောသည်။
CDM ပါ ထွေအုပ်ဝန်ထမ်း
သာကေတမြို့နယ် ထူပါရုံ ၁ ရပ်ကွက်အုပ်ချုပ်ရေးမှူးဖြစ်သည့် အသက် ၄၉ နှစ်အရွယ် ကိုမျိုးမင်းလတ်က ဧည့်စာရင်းတိုင်ရခြင်းစနစ်မှာ ရပ်ကွက်အတွင်း လူစိမ်းဝင်လျှင် ချက်ချင်းသိရှိအောင် ဆောင်ရွက်ရသည့် စနစ်ဖြစ်ပြီး သန်းခေါင်ယံ ဧည့်စာရင်းစစ်သည့်အခါ မသင်္ကာဖွယ်ရှိသည့် အိမ်များကို ဦးတည်ရှာဖွေပြီး တစ်အိမ်လုံး အိပ်မှုန်စုံမွှားဖြင့် ထထိုင်ကြရ၍ တစ်အိမ်လုံး မွှေနှောက်ရှာဖွေသည်ကို ထိုင်ကြည့်နေရကြောင်း ၎င်းက ဆိုသည်။
“ဧည့်စာရင်းတိုင်ရမယ်ဆိုတာက သူတို့ လုပ်ချင်တာ သူတို့လုပ်တာလေ။ ကျွန်တော်တို့ ပြည်သူတွေက ဘယ်သူကမှ လက်မခံဘူး။ ရှုတ်လည်းရှုတ်ချတယ်။ အချိန်မရွေးတံခါးခေါက်ပြီး ဝင်ရှာလို့ရတဲ့ စနစ်ဆိုးကတော့ မကြိုက်ဘူး။ ပြည်သူတွေကို အချိန်မရွေးဒုက္ခပေးလို့ရတဲ့ ပုံစံကြီး ကျွန်တော်တို့ကတော့ မကြိုက်ပါဘူး” ဟု ဆိုသည်။
၎င်းသည် သာကေတမြို့နယ်တွင် အာဏာဖီဆန်ရေးလှုပ်ရှားမှု (CDM) တွင် ပထမဆုံးပါဝင်သည့် ရပ်ကွက်အုပ်ချုပ်ရေးမှူးတစ်ဦးဖြစ်ပြီး စစ်အာဏာရှင်၏ ဖိအားပေးခိုင်းစေမှုများကို မဆောင်ရွက်လို၍ CDM တွင် ပါဝင်ရကြောင်း Myanmar Now ကို ပြောသည်။
“ဧည့်စာရင်းဥပဒေနဲ့ ပတ်သက်ပြီး ကိုယ့်ရပ်ရွာက ပြည်သူတွေကို ဒီလိုမျိုးလုပ်မယ်ဆိုရင် ကျွန်တော်တော့ လုပ်ဖို့ ဆန္ဒမရှိဘူး။ ကျွန်တော့်ပြည်သူကို ကျွန်တော် ဘယ်တော့မှ ဒုက္ခမပေးဘူး။ ပြည်သူက တင်မြှောက်တဲ့ အုပ်ချုပ်ရေးမှူးကောင်းတစ်ယောက်ပဲ ဖြစ်ချင်တာပါ။ အစိုးရက တင်မြှောက်တဲ့ အုပ်ချုပ်ရေးမှူး ဘယ်တော့မှ မဖြစ်ချင်ဘူး” ဟု ၎င်းက ဆိုသည်။
စတင်လှုပ်ရှား
ဧည့်ဆိုးကြီးကို အသက်သွင်းနိုင်ရေးအတွက် ရပ်ကွက်တချို့တွင် ဧည့်စာရင်းတိုင်ကြားရမည့် စာရွက်စာတမ်းများကို ရပ်ကွက်နေ ပြည်သူများထံ စတင်ဝေပေးနေပြီ။
တစ်လနှင့်အထက် နေထိုင်မည်ဖြစ်၍ အနေကြာစာရင်း ထည့်သွင်းပေးပါရန်ဟူသည့် စာရွက်စာတမ်းဖြစ်ပြီး “ဧည့်သည်များသည် ပြေး(၄)ပြေး၊ ခိုး၊ဆိုး၊ခါး၊ နှိုက်မှုများနှင့်သော်လည်းကောင်း၊ နိုင်ငံတော်အစိုးရကို ဆန့်ကျင်သည့်ကိစ္စများ၊ လက်နက်ခဲယမ်းကိစ္စများ လုံးဝ (လုံးဝ) ကင်းရှင်းကြောင်း ကျွန်တော်/ကျွန်မ အိမ်ရှင်က ဝန်ခံကတိပြုပါသည်” ဟု စာသားပါရှိပြီး ဧည့်သည်ရောက်ရှိချိန်မှစ၍ လေးနာရီအတွင်း သတင်းပို့ရမည်ဟု ပါရှိသည်။
အထက်တန်းရှေ့နေ ဒေါ်သဇင်မြတ်မြတ်ဝင်းက ဖေဖော်ဝါရီ ၁၆ တွင် သင်္ဃန်းကျွန်းမြို့နယ် ရန်အောင်ရပ်ကွက် နှင့် (က) ရပ်ကွက်တို့ရှိ ပြည်သူများ အဆိုပါစာရွက်ကို ကိုင်ဆောင်၍ ကြောက်ရွံ့ထိတ်လန့်နေသည်ကို တွေ့ရှိခဲ့ရသည်။
“ရပ်ကွက်က လူတွေက နားမလည်ကြဘူး။ မတိုင်ဘူးဆိုရင် အဖမ်းခံရမှာလား အရေးယူရမှာလား မသိကြဘူးပေါ့။ ကျွန်မကတော့ တိုင်စရာမလိုဘူးလို့ ပြောပြခဲ့တယ်။ သူတို့က ရွေးကောက်ထားတဲ့ ဥက္ကဋ္ဌတွေလည်း မဟုတ်ဘူး။ စစ်ကောင်စီဥက္ကဋ္ဌတွေ။ ဒါကြောင့် တိုင်စရာမလိုဘူးလို့ ရှေ့နေတစ်ယောက်အနေနဲ့ လမ်းညွှန်မှုပေးခဲ့တယ်။ သူတို့က ဘာမှတော့ မတုံ့ပြန်ဘူး။ ကြောက်နေကြတယ်။ တိုင်မယ် မတိုင်ဘူး။ မသိရသေးဘူး။ ဒီည စုံစမ်းကြည့်ရမယ်” ဟု ရှေ့နေက ပြောသည်။
သန်းခေါင်ယံဧည့်ဆိုးကြီးများကို နစအ စစ်ကောင်စီက အသက်သွင်းနေပြီဖြစ်ပြီး ယခုဖြစ်ပွားနေသည့် ဒီမိုကရေစီတိုက်ပွဲမအောင်မြင်ပါက မကြာမီ သင့်အိမ်ရှေ့တံခါးသို့လည်း ရောက်ရှိလာနိုင်သည်။
