သတင်း

နိုင်ငံရေးဆိုင်ရာ လုပ်ကြံသတင်းများတွင် အစ္စလာမ်ဘာသာဝင်များ ပစ်မှတ်ထားခံနေရ

ရွေးကောက်ပွဲနီးလာသည်နှင့်အမျှ နိုင်ငံရေးဆိုင်ရာသတင်းတု ဖြန့်ဝေမှုများသည်လည်း တစ်နေ့ထက်တစ်နေ့ များပြားလာနေသည်။ ရွေးကောက်ပွဲကျင်းပမည့်ရက် ကြေညာပြီးသည်နောက် ပါတီတစ်ခုနှင့်တစ်ခု သတင်းတု သတင်းမှားများဖြင့် တိုက်ခိုက်နေမှုများသည် ယနေ့အချိန်အထိ ရာထောင်ချီရှိနေသည်။ ယင်းသတင်းတုအများစုသည် အစ္စလာမ်ဘာသာဝင်များကို ဦးတည်တိုက်နေသည့် လုပ်ကြံသတင်းများ ဖြစ်နေကြသည်။

အမျိုးသားဒီမိုကရေစီအဖွဲ့ချုပ် (NLD) ပါတီ၏ ရွေးကောက်ပွဲကိုယ်စားလှယ်လောင်းစာရင်း မထုတ်ပြန်သေးချိန်တွင် NLD ပါတီတွင် မွတ်စလင်အမတ်လောင်း ၅၀ ရာခိုင်နှုန်းကျော်ပါဝင်မည် ဆိုသည့် သတင်းတုများအပါအဝင် မွတ်စလင်အမတ်လောင်းများ ဝင်ရောက်ရွေးချယ်ပိုင်ခွင့်ကို ဖိအားပေး ထိခိုက်စေသည့် သတင်းတု သတင်းမှားအများအပြားဖြန့်ခဲ့ကြသည်။

အဆိုပါ သတင်းတု ဖြန့်ဝေသူများသည် သူတို့၏ အကောင့်များတွင် အမျိုးသားရေးသမားများအဖြစ် ဖော်ပြထားကြပြီး အမျိုးသားရေး အမည်တပ်ထားသည့် Facebook Group များ၊ တပ်မတော်ကို ထောက်ခံသူများအဖြစ် အမည်တပ်ထားသည့် Group များတွင် အဆိုပါ သတင်းမှား သတင်းတုနှင့် လုပ်ကြံသတင်းများကို ဖြန့်ဝေနေကြသည်။

ပြီးခဲ့သည့် ၂၀၁၅ ရွေးကောက်ပွဲတွင်လည်း NLD ပါတီ အာဏာရပါက မွတ်စလင်နိုင်ငံဖြစ်မည်ဟု ရေးသားထားသည့်စာများ ဖြန့်ဝေပြီး NLD ကို မဲမပေးရန် လှုံ့ဆော်မှုများရှိခဲ့သည်။ NLD ပါတီ၏ ထိုအချိန်က ကိုယ်စားလှယ်လောင်းများတွင် အစ္စလာမ်ဘာသာဝင်များ မပါရှိခဲ့‌ပေ။ ယင်းကဲ့သို့မပါရှိခြင်းသည် ဘာသာရေးအရတိုက်ခိုက်မှုများကြောင့် မပါရှိခြင်းဖြစ်သည်ဟု သုံးသပ်မှုများလည်းရှိခဲ့သည်။ သို့သော် လာမည့် ၂၀၂၀ ရွေးကောက်ပွဲတွင် NLD ပါတီကိုယ်စားပြု ရွေးကောက်ပွဲဝင်ရောက်ယှဉ်ပြိုင်မည့်သူများစာရင်းတွင် ပထမဦးဆုံးအကြိမ်အဖြစ် အစ္စလာမ်ဘာသာဝင်နှစ်ဦး ပါဝင်လာခဲ့သည်။

ယင်းကဲ့သို့ NLD ပါတီ၏ ကိုယ်စားလှယ်လောင်းစာရင်းတွင် အစ္စလာမ်ဘာသာဝင်နှစ်ဦး ပါဝင်လာသည့်အ‌ပေါ် တိုက်ခိုက်မှုများထွက်ပေါ်လာပြီး ကိုယ်စားလှယ်လောင်းနှစ်ဦးဖြစ်သည့် ဒေါ်ဝင်းမြမြနှင့် ကိုစည်သူမောင်ကို သတင်းတုသတင်းမှားများဖြင့် အဓိကထား တိုက်ခိုက်လာကြသည်။

တိုက်ခိုက်နေသည့် သတင်းတုသတင်းမှားများတွင် “သတင်းထောက်မောင်ပါကြီးနဲ့ ကျောင်းသားလေးကိုစည်သူမောင် မဲဆောက်မှာ ဖောက်ခွဲရေးသင်တန်းတက်စဉ် အမှတ်တရပါဓာတ်ပုံတဲ့ဗျ” ဟုရေးသားသည့် ဓာတ်ပုံဖြင့် သတင်းတုသည် ပျံ့နှံ့မှုအားကောင်းခဲ့ပြီး ယင်းသတင်းတုကို Zaw Thet Linn account က ဇူလိုင် ၂၃ တွင် ဖြန့်ဝေထားသည်။

Myanmar Now ၏ အချက်အလက်စစ်ဆေးမှုများအရ ကိုစည်သူမောင်သည် ၂၀၀၇ ရွှေဝါရောင်တော်လှန်ရေးတွင် ပါဝင်ခဲ့ခြင်းကြောင့် စစ်အစိုးရ၏ဖမ်းဆီး ထောင်ချမှုကိုခံခဲ့ရပြီး ၂၀၁၂ ခုနှစ်တွင် လွတ်ငြိမ်းချမ်းသာခွင့်ဖြင့်လွတ်မြောက်ခဲ့သည်။ ဖောက်ခွဲရေးကိစ္စ ကဲ့သို့သော အမှုမျိုးဖြင့် အရေးယူခံရသည်ဆိုသည့် အချက်အလက်များမရှိပေ။

ထို့အပြင် ယင်းဓာတ်ပုံသည် ရှစ်လေးလုံး ငွေရတုအခမ်းအနားဖြစ်မြောက်ရေးခရီးစဉ်တွင် ရိုက်ကူးထားကြောင်း ကိုစည်သူမောင်၏ Facebook အကောင့်တွင် ၂၀၁၄ အောက်တိုဘာ ၂၄ ရက်စွဲဖြင့် တင်ထားသည်ကိုတွေ့ရပြီး ယင်း ခရီးစဉ်နှင့်ပတ်သက်သည့်ဓာတ်ပုံအချို့ကိုလည်း ၂၀၁၄ ဧပြီတွင် တင်ထားခဲ့သည်ကို ကိုစည်သူမောင်၏ Facebook အကောင့်တွင်တွေ့နိုင်သည်။ Myanmar Now က ကိုစည်သူမောင်ထံ အဆက်အသွယ်အတည်ပြုသည့်အခါ သတင်းမှားသာဖြစ်ကြောင်း ၎င်းကပြောသည်။

NLD ပါတီ ကိုယ်စားပြုကာ ပန်းဘဲတန်းမြို့နယ် ပြည်သူ့လွှတ်တော်ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်မည့် ကိုစည်သူမောင်ကို တိုက်ခိုက်ထားသည့် သတင်းမှားများ

ရှစ်လေးလုံးငွေရတုအခမ်းအနားဖြစ်မြောက်ရေးကော်မတီတွင် ၎င်းပါဝင်ခဲ့သဖြင့် တိုင်းရင်းသားအဖွဲ့အစည်း၊ နိုင်ငံရေးအဖွဲ့အစည်းအချို့နှင့် တွေ့ဆုံရန် ထိုင်းနိုင်ငံ မဲဆောက်မြို့သို့ သွားရောက်ခဲ့စဉ် ကိုပါကြီးနှင့် တွေ့ဆုံခဲ့ခြင်း ဖြစ်သည်ဟု ကိုစည်သူမောင်က ပြောသည်။

“ကိုပါကြီးက ၈၈ မျိုးဆက်ဖြစ်တယ်။ သုံးရောင်ခြယ်ကျောင်းသားမျိုးဆက်ဖြစ်တယ်။ ကျွန်တော်တို့ရဲ့ကော်မတီမှာကလည်း ၈၈ မျိုးဆက်တွေပါတော့ ကိုပါကြီးနဲ့ဆုံကြ စကားပြောကြ အမှတ်တရဓာတ်ပုံရိုက်ကြတာပါ။ အဲ့ဒါကို သူတို့တမင်ဖန်တီးလိုက်တာပါ” ဟု ကိုစည်သူမောင်က ပြောသည်။

ပျံ့နှံ့နေသည့်သတင်းတုတွင် ပါဝင်သည့် အခြားဓာတ်ပုံတစ်ပုံမှာမူ ဓာတ်တော်ချိုင့်ရေတံခွန်တွင် ရိုက်ကူးထားခြင်းဖြစ်သည်ဟု ဆိုသည်။

“နောက်တစ်ပုံက ဓာတ်တော်ချိုင့်ရေတံခွန်ကို သူငယ်ချင်းတွေနဲ့အတူတူဆင်းရင်း အမှတ်တရရိုက်ထားတာ နိုင်ငံခြားသူပါတော့ သူတို့က သူပုန်စခန်းတစ်ခု ဆိုပြီးတော့ ဖန်တီးပြီးသုံးလိုက်တာ” ဟု ၎င်းကပြောသည်။

ထို့အပြင် “မွတ်အမတ် ၄၈ ဦီး NLD ကိုယ်စားပြု ပါဝင်ယှဉ်ပြိုင်မည်” ၊ “၂၀၂၀ NLD ပါတီအနိုင်ရပါက မွစ္စလင်ရေးရာဝန်ကြီးခန့်မည်” ၊ “အကုန်ဖွင့်ချလိုက်ရင် NLD တစ်ဖွဲ့လုံး ထောင်နန်းစံရမယ်”၊ “စက်တင်ဘာတွင် ကျင်းပမည့် မွတ်စလင် ပြည်လုံးကျွတ်ညီလာခံ ဖြစ်မြောက်ရေး NLD ပါတီ အားဖြည့်ကူညီမည်” စသည့် သတင်းတုများသည်လည်း ပျံ့နှံ့မှုအားကောင်းခဲ့ပြီး လူမျိုးရေးဘာသာရေး အမုန်းစကားများပါ ရေးသားထားကြသည်။

ယင်းသတင်းတုများနှင့်ပတ်သက်ပြီး NLD ၏ ဗဟိုပြန်ကြားရေးကော်မတီအတွင်းရေးမှူး မုံရွာအောင်ရှင် ထံ ဆက်သွယ်မေးမြန်းသည့်အခါ ၎င်းသတင်းများသည် မဟုတ်မမှန်ကြောင်း ပြောသည်။

“‌အဲဒါတွေက တမင်လုပ်နေတာဗျ။ မဟုတ်ပါဘူး။ မွတ်စလင်အမတ် လက်ချိုးရေလို့တောင် ရပါတယ်။ ကျွန်တော်တို့ထဲမှာပါတဲ့ အစ္စလာမ်ဘာသာဝင်ကိုယ်စားလှယ်က ကျွန်တော်သိသလောက် နှစ်ယောက်ပဲပါပါတယ်။ မွတ်စလင်ရေးရာဝန်ကြီးဌာနဆိုတာ မဟုတ်တာပဲ။ အဲဒီဟာတွေက သတင်းမှားတွေပါ” ဟု မုံရွာအောင်ရှင်က ပြောသည်။

သတင်းတုအများစုကို Radio Free Myanmar (RFM) ဆိုသည့် အမှတ်တံဆိပ်ဖြင့်ဖြန့်ဝေလေ့ရှိသည်။ ယင်း Radio Free Myanmar ဆိုသည့် အမှတ်တံဆိပ်ဖြင့် အယောင်ဆောင်သတင်းဌာနသည် Facebook စာမျက်နှာနှင့် ဝက်ဆိုက်အမှန်တကယ်မရှိဘဲ အကောင့်တုများမှတဆင့် သတင်းတုဖြန့်ဝေရန် အသုံးပြုနေခြင်းဖြစ်သည်။

ထို့အပြင် ဒေါ်ခင်ကြည်နှင့် မိသားစုများဟု ရေးသားထားသည့် ဓာတ်ပုံဖြင့် ဒေါ်အောင်ဆန်းစုကြည်၏ အဘိုး အဘွားများသည် မွတ်စလင်များဖြစ်သည်ဆိုသော သတင်းတုကိုလည်း ဖြန့်ဝေနေသည်ကိုတွေ့ရသည်။ Myanmar Now ၏အချက်အလက်စစ်ဆေးမှုများအရ အဆိုပါဓာတ်ပုံသည် တစ်စိတ်တစ်ပိုင်း ဖြတ်တောက်ထားသည့်ဓာတ်ပုံ ဖြစ်သည်။

ဒေါ်ခင်ကြည် မိသားစုဟု ဖော်ပြထားသည့် သတင်းတု

ဓာတ်ပုံအပြည့်အစုံတွင် လူ ၁၀ ဦးပါရှိပြီး သတင်းတုတွင်ဖော်ပြထားသည့် ဒေါ်ခင်ကြည်၏ မိခင် မွတ်စလင်ဘာသာဝင်ဆိုသူမှာ ဦးရာဇတ်၏ ဇနီးဖြစ်သည်။ ထို့အပြင် ဒေါ်ခင်ကြည်၏ဖခင်ဟု ဖော်ပြထားသူမှာလည်း အမှန်မဟုတ်ဘဲ ဝန်ကြီးချုပ်‌ဟောင်း ဦးနုဖြစ်ကြောင်းတွေ့ရသည်။ ယင်း သတင်းတုကို လူထုဟစ်တိုင် ဆိုသည့် Facebook စာမျက်နှာက ဇွန် ၁၇ တွင် ဖြန့်ဝေခဲ့သည်။ ၎င်း စာမျက်နှာသည်လည်း မကြာခဏဆိုသလို နိုင်ငံရေးသတင်းတုများဖြန့်ဝေနေသည့် စာမျက်နှာဖြစ်သည်။

ဒေါ်ခင်ကြည်ပါဝင်သည့် မူလဓာတ်ပုံ

ရွေးကောက်ပွဲနီးလာချိန်တိုင်းတွင် ပါတီတစ်ခုနှင့်တစ်ခု တိုက်ခိုက်သည့် အမုန်းစကားများ၊ သတင်းတုများတွင် အစ္စလာမ်ဘာသာဝင်များသည် အဓိကပစ်မှတ်ထားခံရလေ့ရှိသည်။ နိုင်ငံရေးပါတီများမှတ်ပုံတင်ခြင်းဥပဒေ၊ သက်ဆိုင်ရာလွှတ်တော်ရွေးကောက်ပွဲဥပဒေများတွင် ဘာသာ‌ရေး လူမျိုးရေးအရမဲဆွယ်စည်းရုံး၊ ဘာသာရေး လူမျိုးရေးအ‌ပေါ်မူတည်ပြီး မဲပေးရန်၊ မဲမပေးရန် လှုံ့ဆော်မှုများကို တားမြစ်ထားသော်လည်း လူမှုကွန်ရက်တွင် ဘာသာရေး၊ လူမျိုးရေးခွဲခြားကာ မဲပေးရန် ၊မဲမပေးရန် လှုံ့ဆော်မှု အများအပြားရှိနေသည်။

ဒီမိုကရေစီနှင့်လူ့အခွင့်အရေးပါတီဥက္ကဋ္ဌ ဦးကျော်မင်းသည်လည်း လူမျိုးရေးဘာသာရေးခွဲခြားတိုက်ခိုက်မှုများခံနေရပြီး ၎င်းသည် NLD တွင် ဝင်ရောက်ယှဉ်ပြိုင်မည်ဆိုသည့် သတင်းတုလည်း ပျံ့နှံ့ခဲ့သည်။

ဒီမိုကရေစီနှင့်လူ့အခွင့်အ‌ရေးပါတီအနေဖြင့် လာမည့် ၂၀၂၀ ရွေးကောက်ပွဲတွင် အမတ်လောင်း ၂၀ ဝန်းကျင် ဝင်ရောက်ယှဉ်ပြိုင်ရန် ရှိနေသည်။ ပါတီလုပ်ငန်းများလုပ်ဆောင်သည့်အခါ လူမျိုးရေး ဘာသာရေးခွဲခြားတိုက်ခိုက်မှုများ၊ သတင်းတုများဖြင့်တိုက်ခိုက်နေမှုများကြောင့် မွတ်စလင်အမတ်လောင်းများအတွက် အတားအဆီးများရှိနေသည်ဟု ပါတီဥက္ကဋ္ဌ ဦးကျော်မင်းက ပြောသည်။

“အဲ့ဒီလိုတိုက်ခိုက်လို့ လူတွေက မလုပ်ရဲဘူးပေါ့။ အမတ်လောင်းစာရင်းမသွင်းရဲဘူး။ မနည်း စည်းရုံးပြီးတော့ လုပ်မယ့်သူကိုရှာရတယ်။ နိုင်ငံရေးရာသီရောက်တိုင်း ကျွန်တော်တို့ကို ဒီလိုတိုက်ခိုက်မှုတွေက အစဉ်အလာဓလေ့ဖြစ်နေပြီ” ဟု ဦးကျော်မင်းကပြောသည်။

ဒီမိုကရေစီနှင့်လူ့အခွင့်အ‌ရေးပါတီဥက္ကဋ္ဌ ဦးကျော်မင်းကို တိုက်ခိုက်ထားသည့် သတင်းတု သတင်းမှားများ

ဘာသာတရားဆိုသည်မှာ လူတစ်ဦးချင်းစီ၏ တစ်သီးပုဂ္ဂလရွေးချယ်မှုသာဖြစ်ပြီး နိုင်ငံရေးနှင့် မရောယှက်သင့်ဟု NLD ကိုယ်စားပြု လွှတ်တော်ကိုယ်စားလှယ်လောင်း ကိုစည်သူမောင်က ပြောသည်။

“နိုင်ငံရေးလုပ်တဲ့အခါမှာ ကျွန်တော်မြင်တာက ဘာသာရေးက နိုင်ငံရေးထဲကို ဆွဲမခေါ်လာသင့်ဘူး။ သူတို့ ယုံကြည်ရာဘာသာတရားရှိမယ်။ ဒါပေမယ့် နိုင်ငံရေးမှာကျတော့ ဘာသာရေးကိုအခြေခံတဲ့ နိုင်ငံရေးက ဖွဲ့စည်းပုံအခြေခံဥပဒေမှာလည်း တားမြစ်ပါတယ်”

ရွေးကောက်ပွဲကာလတွင်လည်း ဘာသာနှင့်လူမျိုးကို အခြေခံပြီး မဲဆွယ်ခွင့် မရှိသည့်အပြင် ယခုကဲ့သို့ ဘာသာရေးလူမျိုးရေးအရ ခွဲခြားပြီး ကိုယ်စားလှယ်လောင်းများနှင့် နိုင်ငံရေးပါတီများကို သတင်းတုများဖြင့် တိုက်ခိုက်မှုများကို ရွေးကော်ပွဲကော်မရှင်အနေဖြင့်လည်း ထိထိရောက်ရောက် အရေးယူရန် မျှော်လင့်သည်ဟု ၎င်းက ဆိုသည်။

ယခုကဲ့သို့ လူမျိုးရေးနှင့် ဘာသာရေးအခြေပြုလှုံ့ဆော်တိုက်ခိုက်နေသူများသည် အခြေခံဥပဒေ၏ ခွင့်ပြုထားချက်ကို ချိုးဖောက်နေကြခြင်းဖြစ်သည်ဟု NLD ၏ ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်က ဆိုသည်။

“အခုလိုဝေဖန်နေတဲ့ ပုဂ္ဂိုလ်တွေက ဖွဲ့စည်းအုပ်ချုပ်ပုံ အခြေခံဥပဒေကို လက်ရှိအတိုင်းထားဖို့ လိုလားတဲ့ သူတွေပါ။ လက်ရှိ အခြေခံဥပဒေဟာ ဘာသာ၊ လူမျိုး၊ အသားအရောင် ဒါတွေအတွက် ခွဲခြားမှုကို လုံးဝ ခွင့်မပြုပါဘူး။ သူတို့ ထောက်ခံကာကွယ်နေတဲ့ အခြေခံဥပဒေက ခွင့်ပြုထားတဲ့အချက်ကို သူတို့က ပြန်ပြီး ကန့်ကွက်နေတာက ရှေ့နဲ့နောက် ပြောစကား မညီတာပဲဖြစ်ပါတယ်” ဟု သူကပြောသည်။

ထိုကဲ့သို့ သတင်းတု သတင်းမှားများလျှော့ချနိုင်ရန် Facebook နှင့် ပူးပေါင်းလုပ်ဆောင်နေသည်ဟု ရွေးကောက်ပွဲကော်မရှင်က ပြောကြားထားသည်။ သို့သော်လည်း ရွေးကောက်ပွဲနီးလာသည်နှင့်အမျှ နိုင်ငံရေးအရ တိုက်ခိုက်နေသည့်သတင်းတု သတင်းမှားများ များပြားလာမှုအပေါ် အရေးယူမှုနှင့် မည်ကဲ့သို့လုပ်ဆောင်မည်ဖြစ်ကြောင်း ပြည်ထောင်စုရွေးကောက်ပွဲကော်မရှင်အဖွဲ့ဝင် သတင်းထုတ်ပြန်ရေးအဖွဲ့ခေါင်းဆောင် ဦးမြင့်နိုင်ထံ ဆက်သွယ်ခဲ့သော်လည်း ဆက်သွယ်၍မရခဲ့ပေ။

သို့သော်လည်း တိုင်းပြည်နှင့် ရွေးကောက်ပွဲအတွက် အန္တရာယ်ကြီးသည့် ထိုကဲ့သို့သော သတင်းတု၊ သတင်းမှားများကို လူမှုကွန်ရက်တွင် ဖြန့်ချိရန် ငွေကြေးအမြောက်အမြားသုံးစွဲကာ စေခိုင်းနေသူများရှိသည်ကို သိရှိထားပြီး မည်သူ့ကိုမဆို ဖော်ထုတ်အရေးယူမည်ဟု နိုင်ငံတော်သမ္မတရုံးပြောရေးဆိုခွင့်ရှိသူ ဦးဇော်ဌေးက ဇွန်လနှင့် ဇူလိုင်လများအတွင်း နှစ်ကြိမ်တိုင်တိုင် ထုတ်ဖော်ပြောဆိုခဲ့သည်။

Show More

Related Articles

Back to top button